រាជធានីភ្នំពេញ ៖ កន្លែងកម្សាន្តនានានៅរាជធានីភ្នំពេញក៏ដូចជានៅតាមបណ្ដាខេត្តនានាមានការពេញនិយមសម្រាប់មនុស្សគ្រប់វ័យ ព្រោះជាកន្លែងសម្រាកលំហែសម្រាប់មនុស្សដែលធ្វើការងារពេញមួយសប្ដាហ៍ និងចង់សម្រាកលំហែជាមួយនឹងក្រុមគ្រួសារ ឬមិត្តភក្តិ ។ នៅរាជធានីភ្នំពេញកន្លែងដែលពេញនិយមសម្រាប់យុវ័យ និងមនុស្សថ្នាក់កណ្ដាលដូចជា សួនកម្សាន្ត
រាជធានីភ្នំពេញ ៖ កន្លែងកម្សាន្តនានានៅរាជធានីភ្នំពេញក៏ដូចជានៅតាមបណ្ដាខេត្តនានាមានការពេញនិយមសម្រាប់មនុស្សគ្រប់វ័យ ព្រោះជាកន្លែងសម្រាកលំហែសម្រាប់មនុស្សដែលធ្វើការងារពេញមួយសប្ដាហ៍ និងចង់សម្រាកលំហែជាមួយនឹងក្រុមគ្រួសារ ឬមិត្តភក្តិ ។ នៅរាជធានីភ្នំពេញកន្លែងដែលពេញនិយមសម្រាប់យុវ័យ និងមនុស្សថ្នាក់កណ្ដាលដូចជា សួនកម្សាន្តឌ្រីមលែនឌ៍ កន្លែងកម្សាន្តសួនសុបិនចំការព្រីង និងមានកន្លែងកម្សាន្តជាច្រើនទៀតដូចជា នៅបរិវេណទីក្រុងកោះពេជ្រ វ៉តធើរផាកជាដើម ។អ្នកខ្លះនៅរៀងរាល់ថ្ងៃអាទិត្យតែងតែនាំក្រុមគ្រួសារទៅលំហែនៅតាមរមណីយដ្ឋាននានាតាមបណ្ដាខេត្ត ឬនៅតាមជាយក្រុងជាដើម ។
លោកសុផា ធ្វើការនៅក្រុមហ៊ុនឌីសាញ និងបោះពុម្ពនៅរាជធានីភ្នំពេញឱ្យដឹងថា រៀងរាល់ពេលចេញពីធ្វើការនៅពេលល្ងាចលោក និងមិត្តភក្តិមួយចំនួនទៀតតែងតែទៅញ៉ាំអាហារ និងជជែកគ្នាពីរឿងការងារខ្លះៗនៅកន្លែងកម្សាន្តទីក្រុងកោះពេជ្រ និងវ៉តធើរផាកជាដើម ។ នៅកន្លែងទាំងអស់នោះមានមនុស្សច្រើនតែងតែទៅញ៉ាំអាហារខ្លះៗដែលមានដាក់លក់ដូចជា ភេសជ្ជៈ សាច់អាំង បបរ មីឆា និងមានតន្ត្រីស្ដាប់ និងឧបករណ៍សម្រាប់ជិះលេង ដូចជា កន្ត្រកវិល សេះហោះជាដើមសម្រាប់ឱ្យកុមារតូចៗជិះលេងកម្សាន្ត ។
លោកសុផា បានបន្តថា បើនៅថ្ងៃសម្រាកដូចជា នៅថ្ងៃអាទិត្យ និងថ្ងៃបុណ្យជាតិកន្លែងកម្សាន្តដែលជាទីពេញនិយមសម្រាប់យុវវ័យនោះមានដូចជា មជ្ឈមណ្ឌលកម្សាន្តឌ្រីមលែនឌ៍ និងសួនសុបិនចំការព្រីងជាដើម ព្រោះនៅកន្លែងទាំងនោះមានឧបករណ៍សម្រាប់លេងច្រើន និងមនុស្សម្នាច្រើនទៅលេង ។ ម្យ៉ាងទៀត វាមានបរិវេណធំទូលាយដែលមានមនុស្សទាំងចាស់ទាំងក្មេង ជួនកាលនៅថ្ងៃពិសេសៗនៅកន្លែងទាំងនោះមានរៀបចំការប្រគំតន្ត្រី និងមានការចូលរួមសម្ដែងពីតារាល្បីៗនៅក្នុងព្រះរាជាណាចក្រកម្ពុជា ។
ប្រភពដដែលបន្ថែមថា បើថ្ងៃណាទំនេរខ្លាំងលោក និងមិត្តភក្តិរួមការងារ និងមិត្តភក្តិជាច្រើនទៀតធ្វើដំណើរទៅកម្សាន្តនៅជាយក្រុងដែលមានទេសភាពស្អាតៗ មានធ្វើតូបនៅលើទឹកអាចញ៉ាំអាហាររួមគ្នាបានហើយកន្លែងខ្លះមានកន្លែងឱ្យយើងស្ទូចត្រីកម្សាន្តទៀតផង ។កន្លែងកម្សាន្តនានានៅរាជធានីភ្នំពេញ និងនៅតាមបណ្ដាខេត្តនានាជា ទីកន្លែងមួយដែលអាចរកចំណូលបានពីវិស័យនេះផង ហើយមិនតែប៉ុណ្ណោះអាចជួយលើកស្ទួយសេដ្ឋកិច្ច និងអភិវឌ្ឍប្រទេសយើងបានមួយចំណែកតាមរយៈបុគ្គលិកដែលបម្រើការនៅទីនោះ និងជួយឱ្យប្រជាពលរដ្ឋអាចកាត់បន្ថយការនឿយហត់ក្នុងការបំពេញការងារកន្លងមក ៕
ចែករំលែកព័តមាននេះ