តារាចម្រៀង ប៊ុត សីហា និងបក្ខពួក ត្រូវនគរបាលឃាត់ខ្លួន ពាក់ព័ន្ធគ្រឿងញៀ.ន
ខេត្តកំពង់ស្ពឺ ៖ ម្ចាស់ជ័យលាភីលេខ១ របស់កម្មវិធីប្រឡងចម្រៀង «The Voice Cambodia» រដូវកាលទី១ លោក ប៊ុត…
ខេត្តកំពង់ស្ពឺ ៖ ម្ចាស់ជ័យលាភីលេខ១ របស់កម្មវិធីប្រឡងចម្រៀង «The Voice Cambodia» រដូវកាលទី១ លោក ប៊ុត សីហា រួមជាមួយបក្ខពួកម្នាក់ទៀត ត្រូវបានកម្លាំងនគរបាលស្រុកគងពិសី ឃាត់ខ្លួនជាមួយនឹងគ្រឿងញៀនមួយចំនួន ។
ការឃាត់ខ្លួនតារាចម្រៀងលោក ប៊ុត សីហា និងបក្ខពួកនេះធ្វើឡើងកាលពីវេលាម៉ោង០៤និង១០នាទីរសៀលថ្ងៃទី១២ ខែកញ្ញា ឆ្នាំ២០២៣ នៅចំណុចភូមិត្រាំខ្នា ឃុំស្នំក្រពើ ស្រុកគងពិសី ខេត្តកំពង់ស្ពឺ ។
មន្ត្រីនគរបាលស្រុកគងពិសី បានប្រាប់កោះសន្តិភាពឲ្យដឹងថា កម្លាំងនគរបាលស្រុកគងពិសី បានធ្វើការបង្ក្រាបមុខសញ្ញាសង្ស័យពាក់ព័ន្ធនឹងគ្រឿងញៀន ដោយឃាត់ខ្លួនជនសង្ស័យចំនួន០២នាក់ រួមមាន ៖
ទី០១- ឈ្មោះ ឆន វល្លិន ភេទ ប្រុស អាយុ៣៨ឆ្នាំមុខរបរមិនពិតប្រាកដ រស់នៅភូមិត្រាំខ្នា ឃុំស្នំក្រពើ ស្រុកគងពិសី។
និងទី០២-ឈ្មោះ ប៊ុត សីហា ភេទ ប្រុស អាយុ២៩ឆ្នាំ (ដែលគេស្គាល់ច្បាស់ថា ជាតារាចម្រៀងប្រឡងជាប់លេខ១ ក្នុងកម្មវិធីទូរទស្សន៍ល្បីមួយ) រស់នៅភូមិព្រះម្លប់ ឃុំភារីមានជ័យ ស្រុកបសេដ្ឋ ខេត្តកំពង់ស្ពឺ ។
មន្ត្រីនគរបាលស្រុកគងពិសី បាននិយាយបន្តទៀតថា នៅមុនពេលឃាត់ខ្លួន ក្រុមជនសង្ស័យ គឺកម្លាំងនគរបាល បានធ្វើការល្បាតតាមមូលដ្ឋាន ក៏ប្រទះឃើញក្រុមជនសង្ស័យទាំងពីរនាក់ ដោយមានការសង្ស័យ ល៏ឃាំត់សួរនាំ និងឆែកឆេរ ទើបរកឃើញនិងដកហូតបានម្សៅក្រាមពណ៌សថ្លា សង្ស័យជាគ្រឿងញៀន ចំនួន០៥កញ្ចប់ ក្នុងនោះ (០៣តូច និង០២មធ្យម), ទូរសព្ទ០៣គ្រឿង និងឧបករណ៍ប្រើប្រាស់គ្រឿងញៀនមួយចំនួនទៀត ។
មន្ត្រីនគរបាលស្រុកគងពិសី បញ្ជាក់ថា បច្ចុប្បន្ននេះ ក្រុមជនសង្ស័យ រួមជាមួយវត្ថុតាង
ត្រូវបានការិយាល័យជំនាញ កំពុងកសាងសំណុំរឿងចាត់ការបន្តតាមផ្លូវច្បាប់ ។
គួរជម្រាបឡើងវិញថា កាលពីល្ងាចថ្ងៃទី២១ ខែកុម្ភៈ ឆ្នាំ២០១៨ តារាចម្រៀង ប៊ុត សីហា ត្រូវបានសមត្ថកិច្ចឃាត់ចាប់ខ្លួនពាក់ព័ន្ធនឹងករណីប្រើប្រាស់គ្រឿងញៀន ស្ថិតនៅមុខសាលាបឋមសិក្សាពងទឹក សង្កាត់ពងទឹក ខណ្ឌដង្កោ រាជធានីភ្នំពេញ ខណៈរូបលោកទៅទិញគ្រៀងញៀនដើម្បីជក់ ប៉ុន្តែត្រូវបានអាណាព្យាបាល និងក្រុមគ្រួសារ មកធានាយកទៅធ្វើការអប់រំ និងដាក់នៅកន្លែងបន្សាបគ្រឿងញៀន ។
ស្ថានីយទូរទស្សន៍ហង្សមាស បានចេញមុខមកបកស្រាយថា លោក ប៊ុត សីហា បានប្រើប្រាស់គ្រឿងញៀនជាយូរមកហើយ ដោយក្នុងនោះ ខាងផលិតកម្ម ក៏ធ្លាប់បានហៅទៅណែនាំច្រើនដង ដើម្បីឲ្យកែខ្លួនដែរ ប៉ុន្តែលោក ប៊ុត សីហា មិនព្រមស្តាប់។ មិនតែប៉ុណ្ណោះថែមទាំង ធ្វើឲ្យផលិតកម្មខាតបង់ប្រាក់មួយចំនួន លើការចេញសងថ្លៃថតស្ពតពាណិជ្ជកម្ម និងការចុះកិច្ចសន្យាប្រគំតន្ត្រី ជាច្រើនលើកច្រើនសារដែលលោក ប៊ុត សីហា គេចវេសមិនបានចូលរួម ។
អ្នកអត្ថាធិប្បាយព័ត៌មានលោក មាស រិទ្ធី ក៏បានឲ្យដឹងដែរថា ការពិតផលិតកម្មបានដឹងជាយូរមកហើយថា តារាចម្រៀងលោក ប៊ុត សីហា បានប្រើប្រាស់គ្រឿងញៀន ពោលគឺតាំងពីក្រោយលោកប្រឡងជាប់ជ័យលាភីលេខ១ ក្នុងកម្មវិធី «The Voice Cambodia» រដូវកាលទី១ បានរយៈពេលជាង៣ខែមកម្ល៉េះ។ យ៉ាងណាមិញ ពេលដែលផលិតកម្មដឹងថា លោក ប៊ុត សីហា មានជាប់ពាក់ព័ន្ធ នឹងការប្រើប្រាស់គ្រឿងញៀនហើយនោះ ថ្នាក់ដឹកនាំផលិតកម្ម ក៏បានហៅលោក ប៊ុត សីហា មកណែនាំនិងធ្វើការព្រមានជាច្រើនលើកច្រើនសារ ដើម្បីឲ្យបញ្ឈប់ទង្វើបែបនេះ ប៉ុន្តែតារាចម្រៀងរូបនេះ មិនបានស្តាប់ និងមិនធ្វើតាមឡើយ។
ជាមួយគ្នានេះ ផលិតកម្មហង្សមាស ក៏បានប្រាប់ទៅដល់សមត្ថកិច្ចមួយចំនួនថា តារាចម្រៀងលោក ប៊ុត សីហា បានជាប់ពាក់ព័ន្ធនឹងបញ្ហាគ្រឿងញៀន ដូច្នេះប្រសិនបើឃើញការប្រព្រឹត្តជាក់ស្តែង អាចចាប់ឃាត់ខ្លួន ឬធ្វើការអប់រំណែនាំ បញ្ចូនតាមនីតិវិធីច្បាប់ចុះ មិនពាក់ព័ន្ធនឹងហង្សមាសទេ ប៉ុន្តែទោះបីជាយ៉ាងណាផលិតកម្មហង្សមាស មិនបានប្រកាសជាសាធារណៈទេ គឺទុកឱកាសឲ្យលោក ប៊ុត សីហា កែខ្លួន ប៉ុន្តែតារាចម្រៀងរូបនេះហាក់ប្រងើយកន្តើយមិនស្តាប់តាម អ្វីទាំងអស់ ៕
ចែករំលែកព័តមាននេះ