អ្នកគាំទ្រគណបក្សភឿថៃបាននិយាយកាលពីថ្ងៃព្រហស្បតិ៍ថា ពួកគេនឹងដាក់លិខិតមួយនៅរសៀលថ្ងៃអាទិត្យខាងមុខ ដោយស្នើឱ្យគណបក្សពិចារណាចាកចេញពីក្រុមចម្រុះ ដែលដឹកនាំដោយគណបក្សឆ្ពោះទៅមុខ។ នេះបើយោងតាមការចុះផ្សាយរបស់សារព័ត៌មាន The Nation Thailand នៅថ្ងៃទី២៥ ខែឧសភា ឆ្នាំ២០២៣។

ទំព័រហ្វេសប៊ុក «Peemai Peemai» បាននិយាយថា អ្នកគាំទ្រគណបក្សភឿថៃនឹងប្រមូលផ្តុំគ្នានៅទីស្នាក់ការកណ្តាលគណបក្ស ក្នុងសង្កាត់ Huai Khwang ទីក្រុងបាងកក។ ទំព័រ​នេះ​បាន​បន្ត​ថា ចំណាត់ការ​នេះ​មាន​គោលបំណង​បង្ហាញ​ដល់​គណបក្ស​ថា អ្នក​បោះឆ្នោត​ជាង ១០ លាន​នាក់ នឹង​នៅ​ជាមួយ​គណបក្ស ដូច្នេះគណបក្សភឿថៃ មិនគួរសម្របជាមួយនរណាម្នាក់ទេ។ ទំព័រ​នេះ​ចង់​ស្នើ​ឱ្យ​ភឿថៃ​ពិចារណា​ចាក​ចេញ​ពី​ក្រុម​ចម្រុះ ព្រោះពួកគេ​បាន​បោះឆ្នោត​ឱ្យ​គណបក្ស​នេះ ដើម្បី​ធ្វើ​ការ​លើ​ការ​គ្រប់​គ្រង​ប្រទេស ហើយគណបក្ស​ត្រូវ​សម្រេច​ចិត្ត​ឱ្យបាន​សមរម្យ។

នៅព្រឹកថ្ងៃពុធកន្លងទៅ គណបក្សភឿថៃ ក៏បានទម្លាក់តម្រុយដែរថា ខ្លួននឹងដកខ្លួនចេញពីក្រុមចម្រុះ ប្រសិនបើខ្លួនមិនទទួលបានតំណែងប្រធានសភា។ គណបក្សភឿថៃបាននិយាយថា វានឹងមានភាពអយុត្តិធម៌ ប្រសិនបើគណបក្សឆ្ពោះទៅមុខចង់ដឹកនាំទាំងផ្នែកនីតិប្រតិបត្តិ និងនីតិបញ្ញត្តិរបស់រដ្ឋាភិបាល៕