អ្នកបើកឡានម្នាក់ និងអ្នកបើកម៉ូតូម្នាក់ បង្កគ្រោះថ្នាក់២ករណីផ្សេងគ្នា ក្នុងថ្ងៃតែ១ ត្រូវនាំមកចាត់ការតាមច្បាប់
- ព្រះសីហនុ
ខេត្តព្រះសីហនុ ៖ អ្នកបើកបររថយន្ត និងម៉ូតូក្នុងស្ថានភាពស្រវឹង ហើយបង្កគ្រោះថ្នាក់ចរាចរណ៍២
ខេត្តព្រះសីហនុ ៖ អ្នកបើកបររថយន្ត និងម៉ូតូក្នុងស្ថានភាពស្រវឹង ហើយបង្កគ្រោះថ្នាក់ចរាចរណ៍២ករណីផ្សេងគ្នា ក្នុងថ្ងៃតែមួយ ត្រូវបានសមត្ថកិច្ចជំនាញនៃអធិការដ្ឋាននគរបាលស្រុកព្រៃនប់នាំខ្លួនមកសួរនាំ និងអនុវត្តបន្តតាមច្បាប់ បន្ទាប់ពីអ្នកបើកបររថយន្តនិងម៉ូតូខាងលើ បានបុ.កប៉ះរវាងរថយន្តនិងម៉ូតូ បណ្ដាលឱ្យស្លា.ប់ម្នាក់ និងរបួសធ្ងន់២នាក់។
លោកវរសេនីយ៍ឯកអួង វុទ្ធី អធិការនគរបាលស្រុកព្រៃនប់ បានឲ្យដឹងថា ករណីទី១-បានកើតមានឡើងនៅថ្ងៃទី១៦ មេសា ឆ្នាំ២០២៣ វេលាម៉ោង២និង២០នាទីរសៀល នៅដងផ្លូវជាតិលេខ៤ ចន្លោះគីឡូម៉ែត្រលេខ ១៨៧-១៨៨ ស្ថិតក្នុងភូមិទួលទទឹង២ ឃុំទួលទទឹង ស្រុកព្រៃនប់ ខេត្តព្រះសីហនុ
មានករណីគ្រោះថ្នាក់ចរាចរណ៍ មួយកើតឡើង បង្កដោយម៉ូតូ១គ្រឿងម៉ាកហុងដាឌ្រីម ពណ៌ខ្មៅ ពាក់ផ្លាកលេខ តាកែវ 1A-9709 មានទិសដៅពីរាជធានីភ្នំពេញ ឆ្ពោះទៅខេត្តព្រះសីហនុ បើកបរដោយឈ្មោះ សេង គាក់ ភេទប្រុស អាយុ៣៧ឆ្នាំ មុខរបរកម្មករសំណង់ មានទីលំនៅភូមិព្រៃនប់២ ឃុំព្រៃនប់ ស្រុកព្រៃនប់ ខេត្តព្រះសីហនុ និងមានស្ថានភាពស្រវឹង ។
លោកអធិការនគរបាលស្រុកព្រៃនប់បានបន្តថា លុះមកដល់ចំណុចខាងលើ បានបុ.កពីក្រោយម៉ូតូ ១គ្រឿងម៉ាក YAMAHA SIRIUS ពណ៌ខ្មៅលាយក្រហម គ្មានផ្លាកលេខ មានទិសដៅស្របគ្នា បើកបរដោយឈ្មោះ មាស តែម ភេទប្រុស អាយុ៦១ឆ្នាំ ជាលោកតាអាចារ្យ មានទីលំនៅភូមិស្មាច់ដែង ឃុំរាម ស្រុកព្រៃនប់ ខេត្តព្រះសីហនុ បណ្ដាលឲ្យអ្នកបើកបរម៉ូតូម៉ាក YAMAHA SIRIUS (រងរបួសធ្ងន់) រួចបានបញ្ជូនមកសង្គ្រោះបន្ដនៅមន្ទីរពេទ្យរាជធានីភ្នំពេញ។
លោកអធិការនគរបាលស្រុកព្រៃនប់បានបន្តថា ករណីទី២-បានកើតមានឡើងនៅថ្ងៃទី១៦ មេសា ឆ្នាំ២០២៣ ដូចគ្នា វេលាម៉ោង៨និង១០នាទីយប់ នៅដងផ្លូវជាតិលេខ១៤៨ ចន្លោះគីឡូម៉ែត្រលេខ ១០-១១ ស្ថិតក្នុង ភូមិចំការកៅស៊ូ ឃុំជើងគោ ស្រុកព្រៃនប់ ខេត្តព្រះសីហនុ មានករណីគ្រោះថ្នាក់ចរាចរណ៍ មួយកើតឡើងបង្កដោយ រថយន្ដ១គ្រឿងម៉ាក NISSAN NAVARA ពណ៌ស ពាក់ផ្លាកលេខ ភ្នំពេញ 2E-0337 ដែលមានទិសដៅពីស្រុកស្ទឹងហាវ ឆ្ពោះទៅ ផ្លូវជាតិលេខ៤ បើកបរដោយឈ្មោះ ស៊យ ផាន់នីន ភេទប្រុស អាយុ២៥ឆ្នាំ មុខរបរបើកបររថយន្ដ មានទីលំនៅភូមិសំរុង ឃុំសំរុង ស្រុកព្រៃនប់ ខេត្តព្រះសីហនុ និងមានស្ថានភាពស្រវឹង ។
លោកអធិការបានបន្តទៀតថា លុះមកដល់ចំណុចខាងលើ ស្ថានភាពផ្លូវកោង រួចបានរេចង្កូតទៅខាងឆ្វេងដៃរបស់ខ្លួន បានបុ.កជាមួយរថយន្ដ១គ្រឿងម៉ាក TOYOTA COROLLA ពណ៌សំបកឪឡឹក ពាក់ផ្លាកលេខ តាកែវ 2A-0642 មានទិសដៅផ្ទុយគ្នា បើកបរដោយឈ្មោះ សួន សាខន ភេទប្រុស អាយុ៧០ឆ្នាំ ជាមេភូមិ នឹងអ្នករួមដំណើរចំនួន១នាក់ឈ្មោះ សួន កញ្ញា ភេទស្រី អាយុ៤ឆ្នាំ អ្នកទាំង០២នាក់ មានទីលំនៅភូមិអូរត្រជាក់ចិត្ត ឃុំសំរុង ស្រុកព្រៃនប់ ខេត្តព្រះសីហនុ បានបុ.កចំពីមុខពេញទំហឹងតែម្ដង បណ្ដាលឲ្យ អ្នកបើកបររថយន្ដម៉ាក TOYOTA COROLLA (រងរបួសធ្ងន់ ក្រោយមកបានស្លា.ប់នៅមន្ទីរពេទ្យ) និងអ្នករួមដំណើររថយន្ដ ម៉ាក TOYOTA COROLLA (រងរបួសធ្ងន់)។
បច្ចុប្បន្ន អ្នកបើកបររថយន្ដម៉ាក NISSAN NAVARA និងអ្នកបើកបរម៉ូតូម៉ាក HONDA DREAM ពណ៌ខ្មៅ ពាក់ផ្លាកលេខ តាកែវ 1A-9709 ខាងលើ ត្រូវបានកម្លាំងជំនាញបានយកមកសួរនាំនៅអធិការដ្ឋាននគរបាលស្រុកព្រៃនប់ និងបន្ដនីតិវីធី៕
ចែករំលែកព័តមាននេះ