ហ៊ានមែន! បុរសវៀតណាម៣នាក់ ប្រើល្បិចចាប់ជនរងគ្រោះមកបង្ខាំងក្នុងអគារ ដើម្បីជំរិតទារប្រាក់
- ព្រះសីហនុ
នគរបាលបានចាប់ខ្លួនជនជាតិវៀតណាមចំនួន៣នាក់ ដែលពាក់ព័ន្ធនឹងបទល្មើសបង្ខាំងជនជាតិវៀតណាមដូចគ្នា ដើម្បី
ខេត្តព្រះសីហនុ ៖ នគរបាលបានចាប់ខ្លួនជនជាតិវៀតណាមចំនួន៣នាក់ ដែលពាក់ព័ន្ធនឹងបទល្មើសបង្ខាំងជនជាតិវៀតណាមដូចគ្នា ដើម្បីជំរិតទារប្រាក់ ។
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត បានឲ្យដឹងថា ជនសង្ស័យទាំង៣នាក់នេះ ត្រូវបានចាប់ខ្លួន បន្ទាប់ពីធ្វើសកម្មភាពល្មើសច្បាប់កាលពីថ្ងៃទី១០ ខែកុម្ភៈ ឆ្នាំ២០២៣ កន្លងទៅ។ ជាមួយនឹងការចាប់ឃាត់ខ្លួននេះដែរ ដោយមានការសម្របសម្រួលផ្លូវច្បាប់ពីលោក ពេញ ពិសិដ្ឋ ព្រះរាជអាជ្ញារង នៃអយ្យការអមសាលាដំបូងខេត្ត សមត្ថកិច្ចក៏រំដោះបានជនរងគ្រោះចំនួន៣នាក់ ដែលក្រុមជនសង្ស័យចាប់បង្ខាំងទុកនៅក្នុងអគារមួយ នៅចំណុចបុរី BSអូរ១ ស្ថិតភូមិ៥ សង្កាត់លេខ៤ ក្រុងព្រះសីហនុ ។
បើតាមលោកស្នងការ បានថ្លែងថា ជនរងគ្រោះទាំង៣នាក់ចូលមកប្រទេសកម្ពុជាតាមម៉ូតូ ដោយមានអ្នកជូនមកតាមច្រករបៀង ក្នុងក្រុងបាវិត និងគ្មានលិខិតឆ្លងដែនអ្វីទាំងអស់ កាលពីថ្ងៃទី១០ កុម្ភៈ ២០២៣ ហើយជិះតាក់ស៊ីបន្តឆ្ពោះមកខេត្តព្រះសីហនុ ក៏ត្រូវក្រុមជនសង្ស័យចាប់បង្ខាំងជំរិតទារប្រាក់តែម្តង។
ហើយជនសង្ស័យជាជនជាតិវៀតណាមទាំង៣នាក់ខាងលើ ដែលត្រូវបានសមត្ថកិច្ចចាប់ឃាត់ខ្លួននេះ រួមមាន ៖ ១- ឈ្មោះ Nguyen Van Phuong ភេទប្រុស អាយុ១៩ឆ្នាំ គ្មានលិខិតឆ្លងដែន មុខរបរជាងកាត់សក់ ចេះនិយាយភាសាខ្មែរ និងជាអ្នកយាមជនរងគ្រោះក្នុងបន្ទប់។២- ឈ្មោះ Vo Hong Quan ភេទប្រុស អាយុ២៤ឆ្នាំ គ្មានលិខិតឆ្លងដែន មុខរបរជាងកាត់សក់ចល័ត ជាអ្នកគ្រប់គ្រងលើជនរងគ្រោះ ហើយចូលមកប្រទេសកម្ពុជាតាមច្រករបៀងក្នុងក្រុងបាវិត តាមរយៈម៉ូតូឌុប ។ និង៣- ឈ្មោះ Doan Quoc ភេទប្រុស អាយុ២៤ឆ្មាំ មុខរបររត់តាក់ស៊ី ជាមេការចាត់ចែងរៀបចំរកកន្លែងបង្ខាំងជនរងគ្រោះ និងជាអ្នកចែកប្រាក់ដល់សមាជិកក្រុម ។
តាមចម្លើយសារភាពរបស់ឈ្មោះ Doan Quoc បានឲ្យសមត្ថកិច្ចដឹងទៀតថា ចាប់តាំងពីខែធ្នូ ឆ្នាំ២០២២មក រូបគេបានស្គាល់ឈ្មោះ Hung ភេទប្រុស ជនជាតិវៀតណាម តាមរយៈលេខទូរស័ព្ទក្នុងពេលរត់តាក់ស៊ី ហើយរូបគេជាអ្នកចាំទទួលភ្ញៀវដែលឈ្មោះ Hung ឲ្យមកពីប្រទេសវៀតណាម ដើម្បីមករកការងារធ្វើនៅខេត្តព្រះសីហនុ។
ប្រភពដដែលបន្តថា កន្លងមក ពួកគេធ្លាប់ធ្វើសកម្មភាពជំរិតទារប្រាក់ចំនួន២ករណី មានជនរងគ្រោះចំនួន៤នាក់ ហើយឈ្មោះ Hung បានឲ្យប្រាក់មកខ្លួន (Doan Quoc) ចំនួន ១.៨០០ដុល្លារ និងឈ្មោះ Vo Hong Quan បានចំនួន៤០០ដុល្លារ។ ប៉ុន្តែពួកគេមិនបានដឹងថា ឈ្មោះ Hung ទទួលបានប្រាក់ពីក្រុមគ្រួសារជនរងគ្រោះចំនួនប៉ុន្មានឡើយ។
ប្រភពពីសមត្ថកិច្ចឲ្យដឹងទៀតថា ជាមួយនឹងការចាប់ឃាត់ខ្លួននេះ សមត្ថកិច្ចក៏ចាប់យកវត្ថុតាងរួមមាន ៖ ខ្នោះ១, ពិលឆក់២, ដំបងឆក់១, រថយន្តព្រួស១គ្រឿង ពណ៌ទឹកប្រាក់ ពាក់ផ្លាកលេខ ភ្នំពេញ ២BH-៣៩៦១, ទូរស័ព្ទដៃ៤គ្រឿង និងលិខិតឆ្លងដែន១ច្បាប់ ។
ក្រោយចាប់ខ្លួន និងសួរនាំរួច ជនសង្ស័យខាងលើត្រូវបានសមត្ថកិច្ចបញ្ជូនទៅកាន់អធិការដ្ឋាននគរបាលក្រុងព្រះសីហនុ ដើម្បីធ្វើការស្រាវជ្រាវរកបក្សពួកបន្តទៀត និងរៀបចំកសាងសំណុំរឿងបញ្ជូនទៅសាលាដំបូងខេត្ត៕
ចែករំលែកព័តមាននេះ