ប្អូនមានអាការៈមិនស្រួលខ្លួនច្រើនថ្ងៃ លុះបងប្រុសដឹកទៅពេទ្យ តែអ្វីៗហួសពេលទៅហើយ
- ភ្នំពេញ
រាជធានីភ្នំពេញ ៖ យុវជនម្នាក់ជាកម្មករលើកកាតុងនៅផែស្ងួតអ៊ុយញ៉ុង មានអាការៈអត់ស្រួលខ្លួន
រាជធានីភ្នំពេញ ៖ យុវជនម្នាក់ជាកម្មករលើកកាតុងនៅផែស្ងួតអ៊ុយញ៉ុង មានអាការៈអត់ស្រួលខ្លួននិងអត់បានទៅធ្វើការ ហើយដេកនៅតែក្នុងបន្ទប់ជួលម្នាក់ឯងរយៈពេល៣ទៅ៤ថ្ងៃកន្លងមកហើយ ។ លុះមកដល់វេលាម៉ោង១២និង៥០នាទីថ្ងៃត្រង់ថ្ងៃទី៨ ខែកុម្ភៈ ឆ្នាំ២០២៣ ស្រាប់តែអាការៈជម្ងឺកាន់តែមានសភាពធ្ងន់ធ្ងររហូតសន្លប់ ទើបបងប្រុសបង្កើតនាំទៅសង្គ្រោះនៅមន្ទីរពេទ្យឯកជនមួយកន្លែង ប៉ុន្តែពេលទៅដល់គ្រូពេទ្យមិនហ៊ានទទួល និងឲ្យបញ្ជូនទៅមន្ទីរពេទ្យព្រះកុសុមៈ តែពុំទាន់បានបញ្ជូនទៅផង ស្រាប់តែយុវជនរូបនោះបានស្លា.ប់បាត់បង់ជីវិតតែម្ដង ។
យុវជនរងគ្រោះឈ្មោះ ឆន ពន្លក អាយុ២០ឆ្នាំ មុខរបរកម្មករលើកកាតុងនៅផែស្ងួតអ៊ុយញ៉ុង ស្នាក់នៅបន្ទប់ជួលភូមិកើតហេតុខាងលើ និងមានស្រុកកំណើត នៅភូមិថ្មី ឃុំតាំងសំរោង ស្រុកភ្នំស្រួច ខេត្តកំពង់ស្ពឺ។
តាមប្រភពពីយុវជន ឆន ពូលូ អាយុ២៣ឆ្នាំ មុខរបរអ្នកលើកកាតុង នៅផែស្ងួតអ៊ុយញ៉ុង ត្រូវជាបងប្រុសបង្កើតរបស់យុវជនរងគ្រោះខាងលើបាននិយាយថា ប្អូនប្រុសរបស់ខ្លួនមានអាការៈមិនស្រួលខ្លួន និងមិនបានធ្វើការរយៈពេល៣ទៅ៤ថ្ងៃកន្លងមកហើយ ដោយដេកនៅតែក្នុងបន្ទប់ជួលម្នាក់ឯងមិនបានទៅពេទ្យទេ ចំណែកគាត់បានចេញទៅធ្វើការម្នាក់ឯងរាល់ថ្ងៃដែរ ។ ដោយឡែកនៅថ្ងៃកើតហេតុ ប្អូនប្រុសមានអាការៈកាន់តែធ្ងន់ធ្ងរ ទើបគាត់ប្រញាប់ប្រញាល់បញ្ជូនទៅកាន់មន្ទីរពហុព្យាបាលមួយកន្លែងនៅម្ដុំខាងលិចផ្សារជម្ពូវ័ន។
យុវជនខាងលើបានប្រាប់ឲ្យដឹងបន្តទៀតថា ពេលទៅដល់មន្ទីរពហុព្យាបាលនោះ គ្រូពេទ្យមិនហ៊ានទទួលឡើយ និងបានប្រាប់ឲ្យបញ្ជូនបន្តទៅកាន់មន្ទីរពេទ្យព្រះកុសុមៈវិញ ហើយពុំទាន់បានបញ្ជូនទៅផង ស្រាប់តែប្អូនប្រុសក៏បានស្លា.ប់តែម្ដង។
បន្ទាប់មក យុវជនជាបងបាននាំយកសាកស.ពប្អូនប្រុសទៅតម្កល់ទុកនៅក្នុងវត្តជម្ពូវ័ន ស្ថិតនៅក្នុងភូមិជម្ពូវ័ន១ សង្កាត់ចោមចៅទី៣ ខណ្ឌពោធិ៍សែនជ័យ ដើម្បីឲ្យនគរបាលចុះទៅពិនិត្យកោសល្យវិច័យរួចនាំយកស.ពទៅធ្វើបុណ្យតាមប្រពៃណី ៕
ចែករំលែកព័តមាននេះ