រឿងរ៉ាវវិវាទ រហូតដល់ក្រុមហ៊ុនដាក់បណ្ដឹងប្ដឹងបុគ្គល៣នាក់ជាមន្ត្រីមុខលុយ រហូតមកដល់ពេលនេះ អូសបន្លាយរយៈពេលច្រើនខែមកហើយ តែនៅមិនទាន់ឃើញស្ថាប័នមានសមត្ថកិច្ច មានចំណាត់ការនៅឡើយទេ ទៅលើបុគ្គលទាំង៣នាក់ដែលបាន
ខេត្តកំពង់ស្ពឺ ៖ រឿងរ៉ាវវិវាទ រហូតដល់ក្រុមហ៊ុនដាក់បណ្ដឹងប្ដឹងបុគ្គល៣នាក់ជាមន្ត្រីមុខលុយ រហូតមកដល់ពេលនេះ អូសបន្លាយរយៈពេលច្រើនខែមកហើយ តែនៅមិនទាន់ឃើញស្ថាប័នមានសមត្ថកិច្ច មានចំណាត់ការនៅឡើយទេ ទៅលើបុគ្គលទាំង៣នាក់ដែលបានប្រព្រឹត្តអំពើពុករលួយយ៉ាងធំសម្បើមប្រចាំខេត្តកំពង់ស្ពឺ តាមបណ្តឹងរបស់ក្រុមហ៊ុន។
នៅរសៀលថ្ងៃទី១៥ ខែកញ្ញា ឆ្នាំ២០២២នេះ អ្វីដែលទទួលបានពីអ្នកដែលស្និត និងតំណាងក្រុមហ៊ុនបានបង្ហើបថា ពេលនេះភាគីទាំងពីរ មានតំណាងក្រុមហ៊ុន និងប្រធានមន្ទីរកំពុងតែធ្វើការចរចាគ្នា ដើម្បីបញ្ចប់ទំនាស់មួយនេះ។ បុគ្គលទាំង២នាក់ ដែលជាតួអង្គសំខាន់ និងជាចុងចម្លើយដែលក្រុមហ៊ុន បានដាក់ពាក្យបណ្ដឹងនោះ បានស្គាល់ថា ទី១- គឺលោក ឈាង តុលា ប្រធានមន្ទីរកសិកម្មខេត្តកំពង់ស្ពឺ, ទី២- លោក យឹម ណន អនុប្រធានមន្ទីរ និងទី៣- លោក ផល មុន្នី នាយខណ្ឌរដ្ឋបាលព្រៃឈើកំពង់ស្ពឺ។
បុគ្គលទាំង៣នាក់ខាងលើនេះ ត្រូវបានប្រភពបង្ហើបថា ជាអ្នករងនូវបណ្ដឹង ក្រោយពីបានប្រព្រឹត្តនូវទង្វើកៀបសង្កត់តំណាងក្រុមហ៊ុនយកលុយ ដើម្បីលាភសក្ការៈផ្ទាល់ខ្លួននៅក្នុងរង្វង់ប្រតិបត្តិការការងារ ។ ក្រោយពេលដែលរងនូវការកៀបសង្កត់យកលុយពីសំណាក់បុគ្គលទាំង៣នាក់ មិនចេះចប់មិនចេះហើយ ហើយការងារក៏មិនអាចដំណើរការទៅមុខបាន ទើបក្រុមហ៊ុនសម្រេចចិត្តដាក់ពាក្យប្ដឹងទៅតំណាងអយ្យការ ដែលរហូតមកដល់ពេលនេះ នៅមិនទាន់មានចំណាត់ការនៅឡើយទេ ទៅលើបុគ្គលទាំង៣នាក់ខាងលើនេះ។
ប្រភពបានបង្ហើបទៀតថា ក្រោយពីរងនូវបណ្ដឹងអ្នកទាំង៣បានស្វះស្វែងរកអន្តរាគមន៍ពីអ្នកមានអំណាចជាច្រើន ដើម្បីកុំឲ្យមានទោសទណ្ឌដល់ខ្លួន តែអ្នកខ្លះបានលើកឡើងថា ដោយសារតែពួកគាត់ទាំង៣នាក់ យកលុយបានហើយ ចេះសែនព្រេនឲ្យថ្នាក់លើរបស់ខ្លួន ទើបថ្នាក់លើចេះតែបាំងខ្នង រាំងមុខមិនឲ្យអ្នកទាំង៣មានរឿងជាប់ខ្លួនឡើយ។
តាមព័ត៌មានដែលទទួលបាននៅពេលចុងក្រោយនេះ គឺភាគីតំណាងក្រុមហ៊ុន កំពុងតែធ្វើការចរចាផ្សះផ្សារជាមួយលោក ឈៀង តុលា ប្រធានមន្ទីរកសិកម្ម ដើម្បីអាចឲ្យក្រុមហ៊ុនដំណើរការរបស់ខ្លួនបាន ហើយក្រុមហ៊ុននឹងពិចារណាសម្រេចដកពាក្យបណ្ដឹងឈប់ប្ដឹងចំពោះអ្នកទាំង៣ខាងលើ នៅពេលដែលការចរចាផ្សះផ្សារបានត្រូវរូវគ្នា។
សូមរំលឹកថា មហាជនដែលដឹងរឿងកំពុងតែរង់ចាំមើលថា ក្រោយពីក្រុមហ៊ុនចិនមួយបានដាក់ពាក្យបណ្តឹងប្តឹងលោក ឈៀង តុលា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ស្ពឺ លោក យឹម ណន អនុប្រធានមន្ទីរកសិកម្ម និងលោក ផល មុន្នី នាយខណ្ឌរដ្ឋបាលព្រៃឈើខេត្តកំពង់ស្ពឺ ទៅស្ថាប័នអយ្យការពីបទបរិហារកេរ្តិ៍ និងបង្ខំទារលុយពីក្រុមហ៊ុនបានរាប់ម៉ឺនដុល្លារ ដែលរហូតមកដល់ពេលនេះ មានរយៈពេលជាច្រើនខែមកហើយ។
យោងតាមប្រភពដែលស្និតជាមួយរដ្ឋបាលព្រៃឈើ អ្នកពាក់ព័ន្ធនឹងសាក្សីជាច្រើន ត្រូវបានអញ្ជើញឱ្យបំភ្លឺ ក្នុងនោះសុទ្ធតែបានបញ្ជាក់ថា លោក យឹម ណន និងលោក ផល មុន្នី គឺពិតជាបានទទួលលុយពីជំនួយការក្រុមហ៊ុន CC WOWEL ពិតប្រាកដមែន។ ការដែលបានទទួលលុយ បន្ទាប់ពីលោក យឹម ណន និងលោក ផល មុន្នី បាននាំគ្នាជិះរថយន្តទៅកាន់ទីតាំងដីរបស់ក្រុមហ៊ុនកាលពីថ្ងៃទី១២ ខែមេសា ឆ្នាំ២០២២ គឺលោក យឹម ណន និងលោក ផល មុន្នី បានទាមទារជួបជាមួយជនជាតិចិន ថែមទាំងទារប្រាក់បន្ថែមទៀតទៅពួកគាត់ ។
ដោយឡែកប្រភពពីមន្ត្រីនៅមន្ទីរកសិកម្មវិញ ក៏បានបង្ហើបផងដែរថា រឿងរ៉ាវនេះ គឺបានកើតឡើងកាលពីអំឡុងចុងឆ្នាំ២០២១ គឺមានឈ្មោះ ស៊ិន សាវុន ដែលជាជំនួយការ បានប្រាប់ជនជាតិចិនថា មានឈ្មោះ យឹម ណន មានមុខងារជាអនុប្រធានមន្ទីរកសិកម្ម រុក្ខាប្រមាញ់ និងនេសាទ និងឈ្មោះ ផល មុន្នី នាយខណ្ឌរដ្ឋបាលព្រៃឈើខេត្តកំពង់ស្ពឺ បានទំនាក់ទំនងទារប្រាក់ជាថ្នូរ និងការមិនមករំខានធ្វើទុកបុកម្នេញ ដល់ការអភិវឌ្ឍន៍ស្របច្បាប់របស់ក្រុមហ៊ុនឡើយ ដោយយល់ឃើញថា ការប្រគល់ប្រាក់ឱ្យមន្ត្រីជំនាញ ក៏ជាការជួយសម្រួល ពេលនោះក្រុមហ៊ុនក៏ឯកភាព និងបានឱ្យប្រាក់ទៅឈ្មោះ យឹម ណន និងឈ្មោះ ផល មុន្នី បន្តបន្ទាប់ ។
ប្រភពព័ត៌មានបានបន្តទៀតថា ទឹកប្រាក់សរុបដែលលោក យឹម ណន និងលោក ផល មុន្នី ទទួលយកពីជំនួយការនាយកក្រុមហ៊ុននោះ ជាង១០ម៉ឺនដុល្លារសហរដ្ឋអាមេរិកឯណោះ ហើយរឿងរ៉ាវរហូតដល់ការប្តឹងផ្តល់គ្នា។ បន្ទាប់ពីក្រុមហ៊ុនផ្អាកឱ្យលុយ ទើបលោក យឹម ណន និងលោក ផល មុន្នី មិនអនុញ្ញាតឱ្យក្រុមហ៊ុនឈូសឆាយសំអាតដីដូចមុនឡើយ ។ ទង្វើ និងសកម្មភាពរបស់លោកទាំង២ ស្តែងឱ្យឃើញយ៉ាងច្បាស់ពិតប្រាកដថា គឺជាអំពើពុករលួយចំពោះលុយដែលបានពីក្រុមហ៊ុន គឺលោក យឹម ណន តែងតែអះអាងថា យកទៅជូនថ្នាក់ដឹកនាំ គេមិនដឹងថា ថ្នាក់លើណាខ្លះទេ ដែលជាប់ពាក់ព័ន្ធជាមួយលោក យឹម ណន និងលោក ផល មុន្នី នេះខ្លះទេ?។
ជួបជាមួយអ្នកយកព័ត៌មានយើង លោក យឹម ណន និងលោក ផល មុន្នី បានប្រាប់ថា លោកមិនស្គាល់ជនជាតិចិន និងក្រុមហ៊ុន CC WOWEL នោះទេ ហើយលោកទាំង២ក៏មិនដឹងថា គេប្តឹងផ្តល់លោកដែរ វាជាសិទ្ធិរបស់គេទេ។ ដោយឡែកតំណាងក្រុមហ៊ុន លោក អ៊ុង គង្គា បានលើកជាសំណួរថា តើនរណាដែលនាំគ្នាឈរនិយាយជាមួយលោកក្នុងបរិវេណក្រុមហ៊ុន កាលពីថ្ងៃទី១២ ខែមេសា ឆ្នាំ២០២២?។
ចាប់តាំងពីពេលនោះមក ក្រោមការបញ្ជារបស់លោក ឈៀង តុលា មេព្រៃ ដែលជាកូនចៅរបស់លោក ផល មុន្នី ត្រូវបានបញ្ជូនឱ្យទៅធ្វើការដកហូតយកគោយន្តដឹកចេក និងខ្យូសឬស្សីពីក្នុងបរិវេណដីក្រុមហ៊ុនជាបន្តបន្ទាប់ ។
បើយោងតាមប្រភពពីមន្ត្រីរដ្ឋបាលព្រៃឈើមួយរូប ក៏បានបង្ហើបផងដែរថា លោក ឈៀង តុលា នៅតែបញ្ជាឱ្យមន្ត្រីចុះទៅឃ្លាំមើល ហើយមិនយូរទេនឹងត្រូវចុះទៅកម្ទេចរោង និងឃ្លាំង របស់ក្រុមហ៊ុនថែមទៀតផង។
រឿងខាងលើនេះហើយ ដែលក្រុមហ៊ុនទ្រាំលែងបានក៏ប្តឹងមន្ត្រីទាំង៣នាក់យ៉ាងស្វិតស្វាញ ។ ទីបំផុតមន្ត្រីមុខលុយទាំង៣នាក់ ក៏បានសុំសម្របសម្រួល ចរចាគ្នា រហូតដល់សុំឱ្យក្រុមហ៊ុនដកពាក្យបណ្តឹងទៀតផង ។
ពេលមានព័ត៌មានប្លែក យើងនឹងផ្សាយជូនបន្តទៀត។
ព័ត៌មានពិស្តារបន្តនឹងមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ