ក្លិបកំសាន្តយីហោ «ALL FRIENDS» ដែលមានទីតាំងនៅខាងកើតរង្វង់មូលផ្សារដើមថ្កូវ ត្រូវបានក្លាយជាចំណីព្រះអគ្គីឆាបឆេះអស់ទាំងស្រុង និងឆេះរាលដាលទៅដល់ផ្ទះដែលធ្វើអំពីឈើប្រក់ក្បឿងទៀត បណ្តាលឱ្យ
រាជធានីភ្នំពេញ ៖ ក្លិបកំសាន្តយីហោ «ALL FRIENDS» ដែលមានទីតាំងនៅខាងកើតរង្វង់មូលផ្សារដើមថ្កូវ ត្រូវបានក្លាយជាចំណីព្រះអគ្គីឆាបឆេះអស់ទាំងស្រុង និងឆេះរាលដាលទៅដល់ផ្ទះដែលធ្វើអំពីឈើប្រក់ក្បឿងទៀត បណ្តាលឱ្យឆេះអស់តែជញ្ជាំមួយចំហៀងប៉ុណ្ណោះ ដែលបានបង្កអោយមានការភ្ញាក់ផ្អើលយ៉ាងខ្លាំងទៅដល់កម្លាំងមានសមត្ថកិច្ចមូលដ្ឋានខណ្ឌចំការមន និងរថយន្តពន្លត់អគ្គិភ័យមកពីតាមបណ្តាអង្គភាពពាក់ព័ន្ធ និងក្រុមហ៊ុនឯកជនរហូតទៅដល់៤០គ្រឿង ចុះមកជួយអន្តរាគមន៍បាញ់ទឹកពន្លត់ ដោយមិនទាន់បានដឹងថា តើវាកើតឡើង ដោយសារឆ្លងចរន្តអគ្គិសនី ឬយ៉ាងណានៅឡើយទេ?។
អគ្គិភ័យខាងលើនេះ បានកើតឡើងកាលពីវេលាម៉ោង១០និង ៤៤នាទីព្រឹក ថ្ងៃទី០១ ខែកញ្ញា ឆ្នាំ២០២២ នៅចំណុចក្លិបយីហោ «ALL FRIENDS» ទីតាំងលេខ១៥ និង ១៦ (ផ្ទះ២ជាប់គ្នា) ស្ថិតក្នុងសង្កាត់ផ្សារដើមថ្កូវ ខណ្ឌចំការមន។
តាមប្រភពព័ត៌មានពីអាជ្ញាធរខណ្ឌចំការមន បានប្រាប់ឱ្យដឹងថា មុនពេលឆាបឆេះ គឺគេបានឃើញបុសម្នាក់រត់ចេញពីក្នុងក្លិបកំសាន្តយីហោ «ALL FRENDS» មកខាងក្រៅយ៉ាងត្រហេបត្រហប បន្ទាប់អ្នកនៅក្បែរខាងក៏បានឃើញមានផ្សែងខ្មៅហុយទ្រលោមចេញមកក្រៅផងដែរ ទើបនាំគ្នាស្រែកថា «ភ្លើងឆេះៗ» និងបង្កឱ្យមានការភ្ញាក់ផ្អើលកើតឡើងតែម្តង។ ភ្លាមៗនោះ ក៏បានបង្កអោយមានការភ្ញាក់ផ្អើលយ៉ាងខ្លាំងទៅដល់អ្នករស់នៅក្បែរខាង និងអ្នកដំណើរតាមផ្លូវនាំគ្នាចោមរោមមើល ព្រមទាំងរាយការណ៍ប្រាប់កម្លាំងមានសមត្ថកិច្ចមូលដ្ឋានខណ្ឌចំការមនយ៉ាងច្រើននាក់ ចុះមកដល់កន្លែងភ្លើងឆេះក្លិប និងទាក់ទងហៅរថយន្តពន្លត់អគ្គិភ័យរបស់ការិយាល័យបង្ការ និងពន្លត់អគ្គិភ័យ នៃស្នងការនគរបាលរាជធានីភ្នំពេញ អោយចុះមកជួយអន្តរាគមន៍បាញ់ទឹកពន្លត់ផងដែរ។
តាមប្រភពដដែលប្រាប់បន្តថា ក្នុងពេលដែលអណ្តាតភ្លើងកំពុងតែឆាបឆេះយ៉ាងខ្លាំងនៅខាងក្នុងក្លិប ALL FRIENDS និងមានផ្សែងខ្មៅហុយឡើងលើយ៉ាងខ្មួលខ្មាញ់នោះ ក្រៅពីរថន្តពន្លត់អគ្គិភ័យមកពីការិយាល័យបង្ការ និងពន្លត់អគ្គិភ័យ នៃស្នងការនគរបាលរាជធានីភ្នំពេញ ក៏មានរថយន្តរបស់ក្រសួងមហាផ្ទៃ ទីក្រុងកោះពេជ្យ ជ្រោយចង្វារ ស្រាបៀរកម្ពុជា រាប់សិបគ្រឿង បានចុះមកជួយអន្តរាគមន៍បាញ់ទឹកពន្លត់ផងដែរ។
ពាក់ព័ន្ធទៅនឹងករណីឆេះក្លិបកំសាន្តខាងលើនេះដែរ គេនៅមិនទាន់បានដឹងពីមូលហេតុនៅឡើយទេ? ដោយរង់ចាំធ្វើការស្រាវជ្រាវជាបន្តទៀតសិន ទើបដឹង។ ហើយមុនពេលកើតមាននូវករណីអគ្គិភ័យខាងលើនេះ មិនមានអ្នកណាម្នាក់បានដឹងថា តើមានមនុស្សប៉ុន្មាននាក់ស្នាក់នៅខាងក្នុងក្លិបនោះឡើយ? ដោយឃើញមានតែបុរសម្នាក់រត់ចេញមកក្រៅតែប៉ុណ្ណោះ ព្រោះអីក្លិបបើកតែនៅពេលយប់ និងពេលថ្ងៃបិទទ្វារ។ ហើយក្លិបនេះ ចាប់ផ្តើបបើកកាលពីមុនកូវីដ បានរយៈពេល២ទៅ៣ខែ លុះពេលផ្ទុះជំងឺកូវីដក៏បានបិទជាយូរណាស់មកហើយ និងទើបតែបើកជាថ្មីឡើងវិញបានជិត១ខែនេះទេ ហើយក៏ត្រូវបានភ្លើងឆេះអស់ តុ សាឡុង ជញ្ជាំង ដែលសុទ្ធសឹងតែធ្វើអំពីអេប៉ុងនោះ អស់ទាំងស្រុងតែម្តង និងរាលដាលឆេះទៅដល់ផ្ទះមួយខ្នងអស់មួយចំហៀងទៀតផង ។
បើតាមបុរសស្នាក់នៅផ្ទះបោកអ៊ុតជាប់ក្លឹបនោះបាននិយាយថា មុនពេលកើតហេតុ រូបគាត់កំពុងតែធ្វើការនៅខាងក្នុងផ្ទះ ក៏ស្រាប់តែឮគេស្រែកថា «ភ្លើងឆេះក្លឹបៗ» ហើយគាត់ក៏បានរត់ចេញមកខាងក្រៅ ស្រាប់តែឃើញផ្សែងហុយយ៉ាងខ្លាំង រូបគាត់ក៏ភ័យស្លន់ស្លោ និងនាំគ្នាជញ្ជូនអីវ៉ាន់ចេញមកខាងក្រៅបានខ្លះប៉ុណ្ណោះ ដោយសារតែភ្លើងវាឆេះកាន់តែខ្លាំងឡើងៗ។
គួរបញ្ជាក់ថា ការឆេះខាងលើនេះ គេមិនដឹងថា វាកើតឡើងដោយសារតែការឆ្លងចរន្តអគ្គិសនី ឬ ក៏បណ្តាលមកពីអ្វីនោះទេ? ហើយក៏មិនដឹងថា មានមនុស្សនៅខាងក្នុង ឬមិនមាននោះទេ ព្រោះគេហៅមិនមានអ្នកណាឆ្លើយ ទើបបានប៉ូលិសគាត់នាំគ្នាវា.យទម្លុះទ្វារចូលទៅពន្លត់ខាងក្នុងតែម្តង។ ហើយក្នុងករណីឆេះក្លិបកំសាន្ត ALL FRIENDS នេះដែរ បានឆេះបំផ្លាញ តុ សាឡុង កៅអី សម្ភារៈប្រើប្រាស់ និងរួមទាំងក្លិបអស់ទាំងស្រុងគ្មានសល់ និងឆេះរាលដាលទៅដល់ផ្ទះមួយខ្នងដែលធ្វើអំពីឈើប្រក់ក្បឿង បណ្តាលឱ្យអស់ជញ្ជាំងមួយចំហៀងទៀតផង ប៉ុន្តែមិនបានបង្កអោយមានមនុស្សណាម្នាក់រងគ្រោះថ្នាក់ឡើយ។
គួរបញ្ជាក់ទៀតថា ករណីខាងលើនេះ បានប្រើប្រាស់រថយន្តពន្លត់អគ្គិភ័យមកពីតាមបណ្តាអង្គភាពជាច្រើនគ្រឿង បានចុះមកជួយអន្តរាគមន៍បាញ់ទឹកពន្លត់ ក្នុងនោះមានរថយន្តពន្លត់អគ្គិភ័យមកពីការិយាល័យបង្ការ និងពន្លត់អគ្គិភ័យនៃស្នងការនគរបាលរាជធានីភ្នំពេញចំនួន២៣, ទីក្រុងកោះពេជ្រ ៤គ្រឿង, ជ្រោយចង្វារ ៩គ្រឿង, ស្រាបៀរកម្ពុជា ១គ្រឿង និងរថយន្តពន្លត់អគ្គិភ័យរបស់ក្រសួងមហាផ្ទៃ ចំនួន៣គ្រឿង សរុប៤០គ្រឿង លុះរហូតដល់ម៉ោង១១និង៣០នាទីព្រឹកថ្ងៃដដែល ទើបធ្វើការពន្លត់បាន ហើយមូលហេតុវិញ គេនៅមិនទាន់ដឹងទេ ដោយរង់ចាំធ្វើការស្រាវជ្រាវជាក្រោយជាបន្តទៀតសិន។
ចែករំលែកព័តមាននេះ