រាជធានីភ្នំពេញ ៖ ប្រជាជនចិនបានកំពុងពេញនិយមបរិភោគនូវប្រភេទអង្ករសែនក្រអូប និងអង្ករសប្រណីតកាន់តែខ្លាំង ព្រោះអង្កររបស់កម្ពុជាពីរប្រភេទនេះវាមានលក្ខណៈពិសេសសម្រាប់កែច្នៃជាមុខម្ហូបទៅតាមការចូលចិត្តរបស់ប្រជាជនចិនដូចជាបាយឆាដើម ។ លោកឧកញ៉ា ចាន់ សុខឃាំង អនុប្រធានសហព័ន្ធស្រូវអង្ករកម្ពុជាមានប្រសាសន៍ថា…
រាជធានីភ្នំពេញ ៖ ប្រជាជនចិនបានកំពុងពេញនិយមបរិភោគនូវប្រភេទអង្ករសែនក្រអូប និងអង្ករសប្រណីតកាន់តែខ្លាំង ព្រោះអង្កររបស់កម្ពុជាពីរប្រភេទនេះវាមានលក្ខណៈពិសេសសម្រាប់កែច្នៃជាមុខម្ហូបទៅតាមការចូលចិត្តរបស់ប្រជាជនចិនដូចជាបាយឆាដើម ។
លោកឧកញ៉ា ចាន់ សុខឃាំង អនុប្រធានសហព័ន្ធស្រូវអង្ករកម្ពុជាមានប្រសាសន៍ថា ក្នុងឆ្នាំ ២០១៩ ដល់ឆ្នាំ ២០២១ អង្ករសែនក្រអូបបាននាំចេញទៅប្រទេសចិន ៩២.១២០ តោនហើយអង្ករសប្រណីត ១១៧.៨៤៤ តោន ស្មើប្រមាណ៤៧% នៃបរិមាណអង្ករសរុបនាំចេញទៅប្រទេសចិនក្នុងឆ្នាំ ២០២១ ។ នៅក្នុងបរិមាណអង្ករសរុបនេះប្រជាជនចិនចូលចិត្តបរិភោគអង្ករសែនក្រអូប និងអង្ករសប្រណីតច្រើនជាងគេ ។
អុប្រធានសហព័ន្ធស្រូវអង្ករកម្ពុជាថា ប្រទេសចិនបានបែងចែកអង្ករដែលនាំចូលពីកម្ពុជាទៅតាមបណ្តាខេត្តចំនួន ១០ នៅក្នុងប្រទេសរបស់ខ្លួន ។ «យើងបានពិភាក្សាជាមួយដៃគូចិនដើម្បីដោះស្រាយនូវបញ្ហាទាំងឡាយដែលកំពុងតែកើតមានដូចជាការដឹកជញ្ជូន, លក្ខណ្ឌផ្សេងៗនៃអង្កររបស់យើងជាមួយស្ថានភាពទីផ្សាររបស់គាត់ ។ អ៉ីចឹងយើងឃើញថា អ្វីដែលយើងរំពឹងទុកនឹងទទួលបានលទ្ធផលល្អបន្តទៀតនៅក្នុងឆ្នាំ ២០២២ នេះ ។ លើសពីនេះយើងនៅមានការប្រជុំជាមួយដៃគូចិននៅរៀងរាល់ ៣ ខែម្តងដើម្បីបង្ហាញពីស្ថានភាពឱ្យគ្នាទៅវិញទៅមក» ។
ប្រទេសចិនជាទីផ្សារទី ១ ដែលបានទិញអង្ករកម្ពុជាច្រើនជាងគេ បន្ទាប់មកសហគមន៍អឺរ៉ុបជាទីផ្សារធំទី ២ សម្រាប់អង្ករកម្ពុជា ។
រយៈ ២ ខែដើមឆ្នាំ ២០២២ នេះ ការនាំចេញកសិផលទៅក្រៅប្រទេសដែលអគ្គនាយកដ្ឋានកសិកម្មទទួលបានផ្អែកលើប្រព័ន្ធទិន្នន័យគ្រឹះភូតគាមអនាម័យជាតិ មានបរិមាណសរុបមានជាង ១, ៨ លានតោន ទៅកាន់ទិសដៅ ៥២ ប្រទេស គឺមានការកើនឡើងជាង ១៥ ម៉ឺនតោន ស្មើនឹង ៩,៥១% បើធៀបនឹងរយៈពេលដូចគ្នាក្នុងឆ្នាំ ២០២១ ដែលទទួលបានត្រឹមតែ ១, ៦ លានតោន ៕
ចែករំលែកព័តមាននេះ