ទីក្រុងសេអ៊ូល៖ ថ្ងៃនេះ កូរ៉េខាងត្បូងប្រើប្រាស់សុទ្ធតែយន្តហោះចម្បាំងជាច្រើនគ្រឿងដើម្បីអមដំណើរមកដល់នៃប្រធានាធិបតីប្រទេសអារ៉ាប់រួមដែលបំពេញទស្សនកិច្ចជាផ្លូវការរយៈពេល២ថ្ងៃនៅទីក្រុងសេអ៊ូល។ គេគិតថារបៀបវារៈសំខាន់ៗដែលត្រូវពិភាក្សានៅក្នុងដំណើរទស្សនកិច្ចលើកនេះគឺកិច្ចសហការខាងការពារជាតិ, ធុរកិច្ច, វិនិយោគ និងថាមពល។
ឥឡូវនេះ កូរ៉េខាងត្បូងក្លាយជាប្រទេសនាំចេញអាវុធដ៏ធំមួយនៅលើពិភពលោកទៅហើយ។ ប្រធានាធិបតីប្រទេសទាំង២នឹងជជែកគ្នាអំពីការពង្រឹងភាពជាដៃគូយុទ្ធសាស្ត្រពិសេសនេះឱ្យកាន់តែស៊ីជម្រៅបន្ថែមទៀត។ នេះបើតាមការបង្ហើបឱ្យដឹងពីខុទ្ទកាល័យប្រធានាធិបតីកូរ៉េខាងត្បូង។ ស្វាគមន៍វត្តមានរបស់ប្រធានាធិបតីអារ៉ាប់រួមលើកនេះ កងទ័ពកូរ៉េខាងត្បូងបានបញ្ជូនយន្តហោះចម្បាំងម៉ាកអែហ្វ១៥ (F-15) ចំនួនបួនគ្រឿងដើម្បីអមដំណើរយន្តហោះដឹកប្រធានាធិបតីអារ៉ាប់រួម។
យន្តហោះចុះចតនៅមូលដ្ឋានទ័ពអាកាសកូរ៉េខាងត្បូងដែលស្ថិតនៅមិនឆ្ងាយប៉ុន្មានពីទីក្រុងសេអ៊ូលនោះទេ។ នេះជាអ្វីដែលថ្នាក់ដឹកនាំអារ៉ាប់រួមបំពេញទស្សនកិច្ចសងត្រឡប់ទៅវិញចំពោះថ្នាក់ដឹកនាំកូរ៉េខាងត្បូងដែលអញ្ជើញទៅអារ៉ាប់រួមកាលពីដើមឆ្នាំ២០២៣។ កាលនោះ អារ៉ាប់រួមសន្យាបោះទុនវិនិយោគនៅកូរ៉េខាងត្បូងដែលគិតជាទឹកប្រាក់៣០ពាន់លានដុល្លារលើផ្នែកផលិតអគ្គិសនីពីថាមពលនុយក្លេអ៊ែរ, ការពារជាតិ, ការបង្កើតថាមពលដោយឧស្ម័នអ៊ីដ្រូហ្សែន និងពន្លឺថ្ងៃ។
ប្រធានាធិបតីអារ៉ាប់រួមបានជួបថ្នាក់ដឹកនាំធុរកិច្ចកូរ៉េខាងត្បូងដូចជាប្រធានក្រុមហ៊ុនសាមស៊ុង, អែសខេ (SK) និងហ៊ីយុនដាយជាដើម។ ប្រទេសទាំង២មានទំនាក់ទំនងពាណិជ្ជកម្មស៊ីជម្រៅជាមួយគ្នាតាំងពីជាងមួយទសវត្សមុន និងបានចុះកិច្ចព្រមព្រៀងដើម្បីសាងសង់ម៉ាស៊ីនប្រតិកម្មនុយក្លេអ៊ែរនៅប្រទេសអារ៉ាប់រួមថែមទៀតផង។ ប្រទេសទាំង២ក៏បានចុះកិច្ចសន្យាទិញ-លក់គ្រឿងបរិក្ខាយោធា និងគ្រឿងសព្វាវុធផងដែរ។
យ៉ាងយូរត្រឹមឆ្នាំ២០២៧ កូរ៉េខាងត្បូងនឹងក្លាយជាប្រទេសនាំចេញអាវុធលំដាប់ទី៤ពិភពលោក។ ថ្មីៗនេះ កូរ៉េខាងត្បូងទើបតែរកបានម៉ូយដុំមួយទៀតហើយគឺប្រទេសប៉ូឡូញដែលចង់ពង្រឹងសមត្ថភាពការពារជាតិរបស់ខ្លួននៅពេលអ៊ុយក្រែនដែលជាប្រទេសជិតខាងកំពុងជាប់ដៃវាយប្រយុទ្ធគ្នាទល់នឹងរុស្ស៊ី។ កាលពីដើមឆ្នាំ២០២៤ កូរ៉ខាងត្បូងចុះកិច្ចព្រមព្រៀងជាមួយប្រទេសអារ៉ាប៊ីសាអូឌីតដើម្បីពង្រីកកិច្ចសហការខាងការពារជាតិ។ ប្រទេសទាំង២ក៏ត្រៀមចុះកិច្ចសន្យាទិញ-លក់អាវុធផងដែរ៕
ចែករំលែកព័តមាននេះ