រាជធានីភ្នំពេញ ៖ ការផ្ដល់ឥណទានសម្រាប់ទិញលំនៅឋានពីសំណាក់ធនាគារ និងហិរញ្ញវត្ថុក្នុងប្រទេសកម្ពុជានៅតែមានកំណើនខ្ពស់នៅឆ្នាំ ២០២១ ជាឆ្នាំដែលសេដ្ឋកិច្ចពលរដ្ឋយាយីដោយកូវីដ ១៩ ។ ប្រភពពីគ្រឹះស្ថានហិរញ្ញវត្ថុថា ទំហំឥណទានទិញផ្ទះនៅឆ្នាំ២០២១…
រាជធានីភ្នំពេញ ៖ ការផ្ដល់ឥណទានសម្រាប់ទិញលំនៅឋានពីសំណាក់ធនាគារ និងហិរញ្ញវត្ថុក្នុងប្រទេសកម្ពុជានៅតែមានកំណើនខ្ពស់នៅឆ្នាំ ២០២១ ជាឆ្នាំដែលសេដ្ឋកិច្ចពលរដ្ឋយាយីដោយកូវីដ ១៩ ។ ប្រភពពីគ្រឹះស្ថានហិរញ្ញវត្ថុថា ទំហំឥណទានទិញផ្ទះនៅឆ្នាំ២០២១ មានរហូតដល់ជិត ៥ ពាន់លានដុល្លារអាមេរិក ។
របាយការណ៍របស់ធានគារជាតិនៃកម្ពុជា បង្ហាញថា ឆ្នាំ ២០២១ ទំហំឥណទានបុគ្គលបានកើនឡើងដល់ ៤៥,៧ ពាន់លានដុល្លារអាមេរិកក្នុងនោះវិស័យធនាគារ មានទំហំឥណទានប្រមាណ ៣៦,៨ ពាន់លានដុល្លារអាមេរិក ។ ក្នុងឥណទាននេះសម្រាប់ទិញផ្ទះជាកម្មសិទិ្ធផ្ទាល់ខ្លួនមានប្រមាណ ១៣,២ ភាគរយ គិតជាទឹកប្រាក់ប្រមាណជិត ៥ ពាន់លានដុល្លារអាមេរិកទៅហើយ ។ ចំនួននេះមានកំណើនប្រមាណ ៣៧,៧ ភាគរយ ។
លោក ឌឿន សុភាព នាយកគ្រប់គ្រងផ្នែកលក់ឥណទានបុគ្គលនៃធនាគារ J Trust Royal បានឱ្យដឹងថា នៅក្នុងបច្ចុប្បន្នស្ថានភាពនៃវិស័យធនាគារនិងហិរញ្ញវត្ថុនៅតែមានភាពរឹង និងបន្តរីកលូតលាស់ទៅមុខទាំងឥណទាន និងបញ្ញើ ។ «សម្រាប់ឥណទានទិញផ្ទះក្នុងរយៈពេលប៉ុន្មានឆ្នាំចុងក្រោយនេះឃើញថា អតិថិជនមានតម្រូវការច្រើន ដើម្បីស្វែងរកផ្ទះក្នុងក្ដីស្រម៉ៃរបស់ខ្លួន ដែលធ្វើឱ្យទំហំឥណទានសម្រាប់ទិញលំនៅឋានគិតត្រឹមដំណាច់ឆ្នាំ ២០២១ កន្លងទៅបានកើនឡើងដល់ជិត ៥ ពាន់លានដុល្លារអាមេរិក» ។
លោក ឡុង គឹមសួគ៌ អគ្គនាយកក្រុមហ៊ុនអចលនទ្រព្យ Century 21 Advance បានឱ្យដឹងថា តម្រូវការលំនៅឋាននៅតែមាន ទោះនៅក្នុងកាលៈទេសៈវិបត្តិកូវីដ ១៩ ក្តី ។ ដូច្នេះហើយទើបក្រុមហ៊ុនអភិវឌ្ឍន៍លំនៅឋាននៅតែបន្តសកម្មភាពអភិវឌ្ឍន៍គម្រោងរបស់ខ្លួនជាបន្តបន្ទាប់ទោះបីក្នុងស្ថានភាពនៃវិបត្តិក្ដី ។
របាយការណ៍របស់ក្រសួងរៀបចំដែនដីនគរូបនីយកម្មនិងសំណង់ថា ក្នុងឆ្នាំ ២០២១ កន្លងទៅក្រសួងបានចេញអាជ្ញាប័ណ្ណសាងសង់គម្រោងលំនៅឋានមានចំនួន ៧២០ គម្រោង ក្នុងនោះបុរីលំនៅឋាន និងបណ្ដុំលំនៅឋានមានលក្ខណៈជាបុរីមានចំនួន៨១ គម្រោង ស្មើនឹង ២៧.២៧១ ខ្នង អគារផ្ទះល្វែងមានចំនួន ៣១.៩៨៥ ខ្នង និងអគារស្នាក់នៅរួមមានចំនួន ៨៤ គម្រោង ៕
ចែករំលែកព័តមាននេះ