ទីក្រុងណាននីង ៖ ឃ្លាំងមួយ ក្នុងទីក្រុងណាននីង នៅភាគខាងត្បូងប្រទេសចិន ផលិតផលផ្លែទុរេន រាប់សិបតោនដែលនាំចូលពីប្រទេសម៉ាឡេស៊ី ត្រូវបានវេចខ្ចប់ភ្លាមៗ បន្ទាប់ពីការមកដល់ ដែលត្រៀមដឹកជញ្ជូនដាក់លក់ទូទាំងប្រទេសចិន…
ទីក្រុងណាននីង ៖ ឃ្លាំងមួយ ក្នុងទីក្រុងណាននីង នៅភាគខាងត្បូងប្រទេសចិន ផលិតផលផ្លែទុរេន រាប់សិបតោនដែលនាំចូលពីប្រទេសម៉ាឡេស៊ី ត្រូវបានវេចខ្ចប់ភ្លាមៗ បន្ទាប់ពីការមកដល់ ដែលត្រៀមដឹកជញ្ជូនដាក់លក់ទូទាំងប្រទេសចិន ។
លោក យ៉ាវ ហៃ ដែលរកស៊ីលក់ផ្លែឈើ រវាងប្រទេសចិន និងបណ្តាប្រទេសអាស៊ីអាគ្នេយ៍ បាននិយាយថា ៖ «នោះជាផ្លែទុរេនដំបូង ក្នុងរដូវរងានេះ» ។
ជាមួយនឹងផ្លែទុរេន កាន់តែមានប្រជាប្រិយភាពពីប្រជាជនចិន អាជីវកម្មរបស់លោក យ៉ាវ ហៃ បានរីកដុះដាលយ៉ាងខ្លាំងនៅឆ្នាំនេះ បើទោះបីជាមានផលប៉ះពាល់ពីជំងឺរាតត្បាត កូវីដ-១៩ ក៏ដោយ ។
លោក យ៉ាវ ហៃ បានមានប្រសាសន៍ថា “ចាប់ពីខែមីនា ដល់ខែឧសភា ឆ្នាំនេះ ការលក់ផលិតផលទុរេន បានកើនឡើង១០ដង បើធៀបនឹងរយៈពេលដូចគ្នា កាលពីឆ្នាំមុន ហើយលោករំពឹងថា សន្ទុះនឹងបន្តកើនឡើង ក្នុងរយៈពេលប៉ុន្មានឆ្នាំខាងមុខនេះ” ។ ដោយលោកទទួលបានអត្ថប្រយោជន៍យ៉ាងច្រើនពីសេដ្ឋកិច្ចជិតស្និទ្ធ និងទំនាក់ទំនងពាណិជ្ជកម្ម រវាងប្រទេសចិន និងសមាគមប្រជាជាតិអាស៊ីអាគ្នេយ៍ (អាស៊ាន) ។
កាលពីថ្ងៃចន្ទ អាស៊ាន និងប្រទេសចិន បានប្រកាសរួមគ្នា អំពីការបង្កើតភាពជាដៃគូយុទ្ធសាស្ត្រគ្រប់ជ្រុងជ្រោយ ដែលជាវិធានការមួយ ដែលត្រូវបានគេរំពឹងថា នឹងបញ្ចូលកម្លាំងរុញច្រានថ្មី ទៅក្នុងសន្តិភាព ស្ថិរភាព វិបុលភាព និងការអភិវឌ្ឍន៍ នៃតំបន់ និងពិភពលោក ។
ប្រទេសចិន និងអាស៊ាន ចែករំលែកផលប្រយោជន៍រួម ហើយការបង្កើតភាពជាដៃគូយុទ្ធសាស្ត្រដ៏ទូលំទូលាយ នឹងជួយជំរុញការស្ទុះងើបឡើងវិញ នៃសេដ្ឋកិច្ចក្នុងតំបន់ ក្រោយជំងឺរាតត្បាត ។
កាលពីឆ្នាំមុន ប្រទេសចិន នៅតែជាដៃគូពាណិជ្ជកម្មដ៏ធំបំផុតរបស់អាស៊ាន រយៈពេល១២ឆ្នាំជាប់ៗគ្នា ខណៈដែលអាស៊ាន បានក្លាយជាដៃគូពាណិជ្ជកម្មធំបំផុតរបស់ចិន ។ ទិន្នន័យគយ បង្ហាញថា ចាប់ពីខែមករា ដល់ខែតុលា ឆ្នាំនេះ ពាណិជ្ជកម្មរវាងចិន និងអាស៊ាន ឈានដល់ ៤.៥៥ ពាន់ពាន់លានយន់ (ប្រហែល ៧១១.៧ ពាន់លានដុល្លារ) កើនឡើង ២០.៤ ភាគរយ ពីមួយឆ្នាំ ទៅមួយឆ្នាំ ។
យោងតាមលោក តេង ស៊ីជុន ឯកអគ្គរដ្ឋទូតចិន ប្រចាំអាស៊ាន បានឲ្យដឹងថា ការវិនិយោគទ្វេភាគី រវាងចិន និងអាស៊ាន ក៏មានការរីកចម្រើន គួរឲ្យកត់សម្គាល់ផងដែរ ។ គិតត្រឹមដំណាច់ខែមិថុនា ឆ្នាំនេះ ការវិនិយោគរួមគ្នា សរុបបានកើនដល់ ៣១០ ពាន់លានដុល្លារអាមេរិក ។
កំណើនពាណិជ្ជកម្ម និងការវិនិយោគ ដ៏រឹងមាំ បានកើតឡើង បើទោះបីជាផលប៉ះពាល់ នៃការរាតត្បាត នៃជំងឺកូវីដ-១៩ ក៏ដោយ ។ នៅក្នុងកិច្ចប្រជុំកំពូលពិសេសអាស៊ាន-ចិន ដើម្បីរំលឹកខួបលើកទី៣០ នៃទំនាក់ទំនងកិច្ចសន្ទនាអាស៊ាន-ចិន កាលពីថ្ងៃចន្ទ ប្រទេសចិន បានសន្យាផ្តល់ជំនួយអភិវឌ្ឍន៍ដល់អាស៊ានចំនួន ១.៥ ពាន់លានដុល្លារអាមេរិកបន្ថែមទៀត ក្នុងរយៈពេល ៣ ឆ្នាំខាងមុខ ដើម្បីគាំទ្រដល់ប្រទេសអាស៊ាន ក្នុងការប្រយុទ្ធប្រឆាំងនឹងជំងឺកូវីដ-១៩ និងជំរុញការងើបឡើងវិញ នៃសេដ្ឋកិច្ច ។
គំនិតផ្តួចផ្តើមខ្សែក្រវាត់ និងផ្លូវ (BRI) អ្នកជំនាញជឿជាក់ថា បានរួមចំណែកយ៉ាងធំធេងដល់កំណើន ប្រកបដោយនិរន្តរភាព សម្រាប់ប្រទេសចិន និងអាស៊ាន ។ BRI ដែលស្នើឡើងដោយប្រទេសចិន បានរីកចម្រើន ទៅជាវេទិកាសហប្រតិបត្តិការអន្តរជាតិ ដ៏ធំបំផុតរបស់ពិភពលោក ដោយមានប្រទេសចំនួន ១៤១ និងអង្គការអន្តរជាតិចំនួន ៣២ បានចុះហត្ថលេខា លើឯកសារកិច្ចសហប្រតិបត្តិការ ពាក់ព័ន្ធជាមួយប្រទេសចិន រួមទាំងប្រទេសអាស៊ានទាំងអស់ ។
ក្នុងប៉ុន្មានឆ្នាំថ្មីៗនេះ ភាគីទាំងពីរ (ចិន អាស៊ាន) បានឃើញកិច្ចសហប្រតិបត្តិការស៊ីជម្រៅ ក្នុងវិស័យសេដ្ឋកិច្ចថ្មីៗ ដូចជាបច្ចេកវិទ្យាខ្ពស់ សេដ្ឋកិច្ចឌីជីថល និងសេដ្ឋកិច្ចបៃតង ។
នៅក្នុងកិច្ចប្រជុំនេះ ប្រទេសចិន បានស្នើឲ្យចាប់ផ្តើមកម្មវិធីលើកកម្ពស់វិទ្យាសាស្ត្រ បច្ចេកវិទ្យា និងនវានុវត្តន៍ ចិន-អាស៊ាន ដែលនឹងផ្តល់ ១ពាន់ មុខទំនិញ នៃបច្ចេកវិទ្យាទំនើប និងអាចអនុវត្តបានដល់អាស៊ាន និងគាំទ្រកម្មវិធីសម្រាប់អ្នកវិទ្យាសាស្ត្រវ័យក្មេង ៣០០ នាក់ពីអាស៊ាន មកប្រទេសចិន ដើម្បីផ្លាស់ប្តូរវិទ្យាសាស្ត្រ និងបច្ចេកវិទ្យា ០៥ឆ្នាំបន្ទាប់ ។
លោក អ៊ូ ថាយ អ្នកវិទ្យាសាស្ត្រវ័យក្មេងរបស់ឡាវ ប្រាប់ថា “អ្វីដែលខ្ញុំបានរៀននៅប្រទេសចិន គឺពិតជាមានប្រយោជន៍ ។ ខ្ញុំបានប្រើប្រាស់ឧបករណ៍ការពារបរិស្ថានកម្រិតខ្ពស់ និងបានរៀនពីវិធីព្យាបាលទឹកស្អុយតាមជនបទ ដែលនឹងមានប្រយោជន៍ នៅពេលខ្ញុំត្រឡប់ទៅប្រទេសឡាវវិញ” ។ លោក អ៊ូ ថាយ បន្ថែមថា វាជាផលប្រយោជន៍របស់ភាគីទាំងពីរ ។ អភិវឌ្ឍ និងផ្លាស់ប្តូរបច្ចេកវិទ្យាបរិស្ថាន ។
ពិព័រណ៍ចិន-អាស៊ាន និងកិច្ចប្រជុំកំពូលធុរកិច្ច និងវិនិយោគចិន-អាស៊ាន ដែលបានធ្វើឡើងរយៈពេល១៨ឆ្នាំ ជាប់ៗគ្នា ដើរតួជាវេទិកាដ៏សំខាន់ សម្រាប់កិច្ចសហប្រតិបត្តិការ លើគ្រប់វិស័យរវាងភាគីទាំងពីរ ។
លោក អូ អ៊ី ស៊ុន អ្នកជំនាញជាន់ខ្ពស់ នៅវិទ្យាស្ថានអន្តរជាតិសិង្ហបុរី ក៏បានអោយដឹងដែរថា ផ្តួចផ្តើមដោយប្រទេសអាស៊ានទាំង១០ ដើម្បីបង្កើតទីផ្សារបង្រួបបង្រួម ដោយកាត់បន្ថយពន្ធគយ និងរបាំងមិនមែនពន្ធ RCEP នឹងចូលជាធរមាននៅថ្ងៃទី០១ ខែមករា ឆ្នាំ២០២២ ហើយជាង ៩០ ភាគរយ នៃការធ្វើពាណិជ្ជកម្មទំនិញនៅក្នុងតំបន់ នឹងត្រូវជាប់ពន្ធសូន្យ ។
RCEP រួមមានសមាជិកអាស៊ានទាំង១០, ចិន ជប៉ុន កូរ៉េខាងត្បូង អូស្ត្រាលី និងនូវែលសេឡង់ ។ RCEP មានប្រយោជន៍ជាពិសេស ក្នុងការកាត់បន្ថយ និងដកចេញនូវឧបសគ្គពាណិជ្ជកម្ម បង្កើតទីផ្សាររួមដ៏ធំបំផុត របស់ពិភពលោក ដែលទំនិញ និងសេវាកម្មអាចធ្វើពាណិជ្ជកម្ម ដោយសេរីជាងមុន ដូច្នេះហើយទើបបង្កើនល្បឿន នៃការរស់ឡើងវិញ នៃសេដ្ឋកិច្ចក្នុងតំបន់ និងពិភពលោក ៕
ចែករំលែកព័តមាននេះ