បន្ទាយមានជ័យ៖ អាជ្ញាធរសមត្ថកិច្ច បានរកឃើញអ្នកវិជ្ជមានកូវីដ-១៩ ចំនួន ២នាក់ នៅក្នុងផ្ទះសំណាក់១ គឺម្នាក់ស្លាប់ និងម្នាក់ទៀត ជាជនជាតិថៃ ត្រូវបាននាំទៅព្យាបាល។ ភ្លាមៗ រដ្ឋបាលខេត្ត បានចាត់វិធានការរដ្ឋបាល ក្នុងក្រុងសិរីសោភណ្ឌ ដោយអនុវត្តបម្រាមគោចរ រយៈពេល ១សប្តាហ៍ គិតចាប់ពីថ្ងៃទី១៥ ខែឧសភា ឆ្នាំ២០២១ តទៅ។
គួរបញ្ជាក់ថា កាលពីថ្ងៃទី១៤ ខែឧសភា ឆ្នាំ២០២១ នៅផ្ទះសំណាក់ MB មានអ្នកស្លាប់ ដោយវិជ្ជមានកូវីដ-១៩ ម្នាក់ នៅក្នុងបន្ទប់លេខ១០៥។ ជននោះ ឈ្មោះ វឿន ចាន់ទី ភេទប្រុស អាយុ ៣៧ឆ្នាំ ដែលរស់នៅភូមិក្បាលស្ពាន១ សង្កាត់-ក្រុងប៉ោយប៉ែត ដែលទើបត្រលប់ពីប្រទេសអូស្ត្រាលី កាលពីថ្ងៃទី១១ ខែឧសភា ឆ្នាំ២០២១។ បុរសនោះ បានដេកស្លាប់ម្នាក់ឯង ក្នុងបន្ទប់ ដោយដៃជាប់សេរ៉ូម និងប្រើប្រាស់ឱសថ។
អ្នកដែលស្នាក់នៅក្នុងផ្ទះសំណាក់ យីហោ MB មានចំនួន ២១នាក់ ស្រី ០៦នាក់ មានខ្មែរចំនួន ០៩នាក់ ស្រី ០២នាក់ មានម្ចាស់ និងបុគ្គលិកផ្ទះសំណាក់ ៥នាក់ ស្រីម្នាក់ និងជនជាតិថៃ ១០នាក់ ស្រី ០៣នាក់ ជនជាតិចិន ចំនួនម្នាក់។ ក្រុមគ្រូពេទ្យ បានយកសំណាក ធ្វើតេស្តរហ័ស លទ្ធផលវិជ្ជមានកូវីដ-១៩ ចំនួន ២នាក់ ១.ឈ្មោះ វឿន ចាន់ទី ភេទប្រុស អាយុ ៣៧ឆ្នាំ (ស្លាប់) និង២.ឈ្មោះ អាប់ ភីស៊ិត ភេទប្រុស អាយុ ២៣ឆ្នាំ (ជនជាតិថៃ)។
ដើម្បីទប់ស្កាត់ការរីករាលដាលជំងឺកូវីដ-១៩ នៅក្នុងភូមិសាស្គ្រក្រុងសិរីសោភ័ណ ខេត្តបន្ទាយមានជ័យ គឺអាជ្ញាធរ បានចាត់វិធានការរដ្ឋបាល រយៈពេល ១សប្តាហ៍ គឺចាប់ពីថ្ងៃទី១៥ រហូតដល់ ២១ ខែឧសភា ឆ្នាំ២០២១។ ក្នុងរយៈពេល ១សប្តាហ៍នេះ ត្រូវបានផ្អាកជាបណ្តោះអាសន្ននូវសកម្មភាពការធ្វើចរាចរណ៍ឆ្លងកាត់ផ្លូវក្នុងភូមិសាស្ត្រក្រុងសិរីសោភ័ណ ចាប់ពីម៉ោង ២០យប់ ដល់ម៉ោង ៥ព្រឹក ជាកំហិត លើកលែងតែចំពោះករណី ដូចជា ការដឹកជញ្ជូនទំនិញធុនធ្ងន់ ការធ្វើដំណើរដោយមូលហេតុសុខភាពបន្ទាន់ និងមូលហេតុចាំបាច់ក្នុងគ្រួសារ ដែលមានលិខិតបញ្ជាក់ ឬការអនុញ្ញាតពីអាជ្ញាធរមានសមត្តកិច្ច ដែលនៅជិតបំផុត ការធ្វើដំណើររបស់បុគ្គលិកក្រុមគ្រូពេទ្យទាំងផ្នែករដ្ឋបាល និងឯកជន មន្ត្រីរាជការ ក្រុមពន្លត់អគ្គិភ័យ កងកម្លាំងប្រដាប់អាវុធគ្រប់ប្រភេទ ដើម្បីបំពេញបេសកកម្មជូនស្ថាប័ន-អង្គភាព៕ ប៊ុន ធឿន
ចែករំលែកព័តមាននេះ