បច្ចេកវិទ្យា ៖ សម្រាប់អ្នកប្រើប្រាស់ដែលមិនចង់ឱ្យទិន្នន័យរបស់វេបសាយ ត្រូវបានរក្សាទុកនៅក្នុងកុំព្យូទ័រ ឬទូរស័ព្ទនោះ ពួកគេតែងតែប្រើ Incognito Tab ឬ Private…
បច្ចេកវិទ្យា ៖ សម្រាប់អ្នកប្រើប្រាស់ដែលមិនចង់ឱ្យទិន្នន័យរបស់វេបសាយ ត្រូវបានរក្សាទុកនៅក្នុងកុំព្យូទ័រ ឬទូរស័ព្ទនោះ ពួកគេតែងតែប្រើ Incognito Tab ឬ Private Tab ជាពិសេសនៅពេលដែលពួកគេប្រើកុំព្យួទ័រសាធារណៈ ឬទូរស័ព្ទរបស់អ្នកដទៃនោះ។ វិធីនេះគឺដើម្បីចៀសវាងកុំឱ្យអ្នកដទៃ ដែលប្រើឧបករណ៍ជាមួយលោកអ្នក ដឹងអំពីវេបសាយដែលលោកអ្នកបានចូលទៅមើល។
ទោះបីជា Incognito Tab មិនបានរក្សាទុកទិន្នន័យរបស់អ្នកប្រើប្រាស់ នៅក្នុងនៅក្នុងទូរស័ព្ទក្ដី ប៉ុន្តែប្រសិនបើលោកអ្នកភ្លេចបិទវានោះ អ្នកដទៃទៀតអាចចូលទៅមើលវាបាន ដូច្នេះហើយបានជាក្រុមហ៊ុន Google កំពុងតែសាកល្បងមុខងារថ្មី ជាមួយនឹងកម្មវិធី Chrome ដែលអាចឱ្យអ្នកប្រើប្រាស់ដែលប្រើទូរស័ព្ទដែលមានប្រព័ន្ធប្រតិបត្តិការ iOS អាចចាក់សោ Incognito Tab ជាមួយនឹងទិន្នន័យជីវមាត្រ (Biometrics) មានដូចជាក្រយ៉ៅម្រាមដៃ និងផ្ទៃមុខជាដើម។ ជាមួយនឹងមុខងារថ្មីនេះកម្មវិធី Chrome នឹងមិនបង្ហាញនូវព័ត៌មានដែលមាននៅលើស្គ្រីន ប្រសិនបើកម្មវិធីមិនអាចបញ្ជាក់អត្តសញ្ញាណរបស់អ្នកប្រើប្រាស់ជាថ្មីតាមរយៈទិន្នន័យជីវមាត្រ។
គួរបញ្ជាក់ផងដែរថា មុខងាររបស់ Incognito Tab គឺវាគ្រាន់តែមិនរក្សាទុកទិន្នន័យនៅក្នុងទូរស័ព្ទតែប៉ុណ្ណោះ ហើយនេះមិនមានន័យថាគ្មាននរណាម្នាក់អាចដឹងពីការចូលទៅប្រើប្រាស់វេបសាយរបស់លោកអ្នកនោះទេ ព្រោះអ្នកគ្រប់គ្រងប្រព័ន្ធ network និងក្រុមហ៊ុនផ្ដល់សេវាកម្មអ៊ីនធឺណិតអាចដឹងពីការចូលទៅក្នុងវេបសាយទាំងអស់នោះបាន៕
ប្រភព ៖ នាយកដ្ឋានប្រឆាំងបទល្មើសបច្ចេកវិទ្យា Anti Cyber Crime Department
ចែករំលែកព័តមាននេះ