រាជធានីភ្នំពេញ ៖ នៅចំពោះមុខប្រទេសថៃ កំពុងឆ្លងរាលដាលជំងឺកូវីដ១៩ សហគមន៍ក្នុងខេត្តសាមុតសាខន ក្រសួងការងារកម្ពុជាបានប្រកាសឲ្យភ្នាក់ងារជ្រើសរើសពលករឯកជន ទៅធ្វើការនៅប្រទេសថៃ និងមន្រ្តីពាក់ព័ន្ធទំាងអស់ឲ្យផ្អាកបញ្ជួនពលករ MOU និងពលករតាមរដូវកាលទៅធ្វើការនៅប្រទេសថៃ រហូតដល់មានការជូនដំណឹងជាថ្មី។
ក្រសួងបានជម្រាបឲ្យអ្នកពាក់ព័ន្ធទំាងអស់ ត្រូវបន្តទំនាក់ទំនងជាមួយនិយោជកថៃ ឬសមាគមនិយោជកថៃ និងអាជ្ញាធរថៃក៍ដូចជា អាជ្ញាធរមានសមត្ថកិច្ចកម្ពុជាដើម្បីជួយសម្រួលដល់ពលករក្នុងករណីចំាបាច់តាមការសម្រេចរបស់រដ្ឋាភិបាល។
នៅក្នុងសេចក្តីជូនដំណឹងមួយនៅថ្ងៃទី២១ ខែធ្នូនេះ រដ្ឋមន្រ្តីក្រសួងការងារបណ្តុះបណ្តាលវិជ្ជាជីវៈលោក អ៊ិត សំហេង បានជម្រាបដល់ពលរដ្ឋខ្មែរដែលកំពុងធ្វើការងារនៅក្នុងប្រទេសថៃផងដែលឲ្យគោរពតាមការណែនាំរបស់អាជ្ញាធរថៃ និងរក្សាប្រក្រតីភាពការងារ កុំផ្លាស់ប្តូរកន្លែងស្នាក់នៅឬ កន្លែងធ្វើការពីខេត្តមួយទៅខេត្តដែលខុសនឹងបម្រាបរបស់អាជ្ញាធរថៃ ។
ក្រសួងបានជម្រាបដល់ពលករខ្មែរនៅថៃ ដែលមានបំណងចង់ចូលមកប្រទេសកម្ពុជាវិញ ដាច់ខាតចូលតាមច្រកតែបីប៉ុណ្ណោះ មានច្រកអូស្មាច់ក្នុងខេត្តឧត្តរមានជ័យ ច្រលដូងខេត្តបាត់ដំបង និងច្រកប៉ោយប៉ែតក្នុងខេត្តបន្ទាយមានជ័យ។ នៅតាមច្រកទំាងបីអាជ្ញាធរបានរៀបចំកន្លែងសម្រាប់ពិនិត្យសុខភាពនិងការធ្វើចត្តាឡីស័កពលករដែលចេញពីប្រទេសថៃចូលមកម្ពុជា យ៉ាងហ្មត់ចត់។
ការិយាល័យរដ្ឋបាលពលករបរទេសរបស់ថៃបង្ហាញ នៅក្នុងរបាយការណ៍ប្រចាំខែតុលា ឆ្នាំ២០២០ ថាពលករបរទេសដែលកំពុងធ្វើការនៅក្នុងប្រទេសថៃមានចំនួន២ ៤៨២ ២៥៦នាក់ ដែលក្នុងនោះមានពលករខ្មែរចំនួន៥០១ ៩៥០នាក់ ៕
ចែករំលែកព័តមាននេះ