រាជធានីភ្នំពេញ ៖ បច្ចុប្បន្នសត្វព្រាបនៅមុខព្រះបរមរាជវាំងកំពុងក្លាយជាទីចាប់អារម្មណ៍សម្រាប់អ្នកទេសចរ ឬអ្នកកម្សាន្តលំហែទាំងអ្នករស់នៅក្នុងរាជធានីភ្នំពេញ ក៏ដូចជាអ្នកមកពីបណ្តាខេត្តផ្សេងៗ ។ ជា រៀងរាល់ថ្ងៃ ជាពិសេសនៅនៅពេលព្រឹកព្រលឹម និងនៅពេលល្ងាចប្រជាពលរដ្ឋដែលឆ្លងកាត់ ទីនោះតែងតែឆ្លៀតចូលទៅដាក់ចំណីឱ្យសត្វព្រាបគ្រាន់ជាការប្រឡែងលេងជាមួយពួកវា និងទស្សនាកម្សាន្តអារម្មណ៍ ។
ហ្វូងសត្វព្រាបនៅមុខវាំងមិនត្រឹមតែបង្កើតសោភ័ណភាពទាក់ទាញភ្នែកអ្នកទេសចរប៉ុណ្ណោះទេ វាថែមទាំងផ្តល់មុខរបរថ្មី និងប្រាក់ចំណូលដល់មនុស្ស គឺគេបង្កើតរបរលក់ចំណីសម្រាប់សត្វព្រាបដល់អ្នកទេសចរ ។ស្ត្រីចំណាស់ឈ្មោះស្រី សុខុន ជាអ្នកលក់ចំណីឲ្យសត្វព្រាប និយាយថា គាត់បានប្រកបមុខរបស់នេះជាង២ឆ្នាំមកហើយ ហើយការប្រកបរបរនេះអាចឱ្យគាត់រកប្រាក់ចំណូលសម្រាប់ដោះស្រាយជីវភាពប្រចាំថ្ងៃបានមួយកម្រិត ។ ក្នុងមួយថ្ងៃគាត់អាចរកចំណូលបានចាប់ពី១ម៉ឺនដល់២ម៉ឺនរៀលទៅតាមអ្នកដែលមកទិញចំណីដាក់ឱ្យព្រាបតិចឬច្រើន ។ ចំណីសម្រាប់ព្រាបដែលគាត់លក់នេះមានពោតនិងសណ្តែក ដោយក្នុងមួយថង់តម្លៃ១.០០០រៀល ។
ក្នុងមួយថ្ងៃតាមការប៉ាន់ស្មានរបស់គាត់គឺមានអ្នកមកដាក់ចំណីព្រាបជាការកម្សាន្តចាប់ពី៥០នាក់ ទៅ១០០នាក់ តែសម្រាប់ថ្ងៃសៅរ៍និងអាទិត្យគឺមានច្រើនជាងនេះ។ការលក់ចំណីនេះគឺគាត់ចាប់ផ្តើមលក់ចាប់ពីម៉ោង៥ព្រឹករហូតដល់ម៉ោង៦ល្ងាច ព្រោះចាប់ពីម៉ោង៦ព្រឹកទៅសត្វព្រាបចាប់ផ្តើមចុះមកស៊ីចំណីរហូតដល់ម៉ោងជិត៦ល្ងាចទើបវាឡើងទៅដេកវិញ ។ ស្ត្រីដែលទទួលបានចំណូលពីសត្វព្រាបនេះ បញ្ជាក់ថា តាំងពីគាត់ចាប់ផ្តើមប្រកបរបរនេះមកឃើញថាហាក់មានការកាក់កបគ្រាន់បើជាងរបរចាស់លក់ប្រដាប់ប្រដារក្មេងលេង ។ របរចាស់នោះមិនសូវកាក់កបឡើយ ហើយពិបាកលក់ទៀតដោយសារការដេញពីសន្តិសុខយាមសួន ។
ជាអ្នកប្រកបរបរដូចគ្នានេះដែរ ស្ត្រីចំណាស់ម្នាក់ទៀតឈ្មោះអន និយាយថា គាត់អាចលក់ចំណីព្រាបបានពី៨ពាន់ទៅ១ម៉ឺនរៀល ក្នុងមួយព្រឹក ចំណែកពេលល្ងាចវិញដែលមានមនុស្សច្រើននោះគឺគាត់អាចលក់បានចាប់ពី២ម៉ឺនទៅ៣ម៉ឺនរៀល ។
ស្ត្រីដដែលបញ្ជាក់ថា មុខរបរនេះអាចជួយឱ្យគាត់រកចំណូលបានមួយផ្នែកសម្រាប់បង់ថ្លៃផ្ទះដែលគាត់ជួលគេ និងថ្លៃទឹក ភ្លើង បន្ទាប់ពីគាត់បានផ្លាស់ប្តូរមុខរបរពីលក់ទៀនធូប នៅមុខព្រះអង្គដងកើ ដោយសារគាត់ចាស់លក់មិនទាន់ក្មេងៗ ។
ទោះជាយ៉ាងណាក្តី ស្ត្រីចំណាស់នេះ បានត្អូញត្អែរថា បច្ចុប្បន្នការលក់ចំណីសម្រាប់សត្វព្រាបរបស់គាត់ហាក់មានការធ្លាក់ចុះបន្តិចដោយសារមានអ្នកប្រកបរបរនេះកាន់តែច្រើនឡើងជិត១០០នាក់ទៅហើយ មិនដូចការលក់ពីដំបូងគឺមានមិនដល់១០នាក់ផង។
ការទុកឱ្យមានសត្វព្រាបនេះនៅធ្លាសួនមុខវាំងស្ត្រីឈ្មោះអន យល់ថា គឺជាការមួយល្អ ដោយសារជួយការលម្អរាជធានីទាក់ទាញការចាប់អារម្មណ៍ពីភ្ញៀវទេសចរផង និងផ្តល់ប្រាក់ចំណូលដល់ប្រជាពលរដ្ឋដែលប្រកបរបរនេះ រួមចំណែកកាត់បន្ថយភាពក្រីក្រផង ។ស្ត្រីអ្នកទេសចរម្នាក់ដែលមកពីខេត្ត ហើយឆ្លៀតទៅកម្សាន្ត និងដាក់ចំណីឱ្យសត្វព្រាបនៅមុខវាំងបាននិយាយថា គាត់ទើបតែមកដាក់ចំណីព្រាបនេះជាលើកទី១ប៉ុណ្ណោះ ដោយកន្លងមក គាត់ធ្លាប់ឮគេនិយាយ និងឃើញតាមទូរទស្សន៍ប៉ុណ្ណោះ។ ដោយសារគាត់ត្រូវយកកូនមកមន្ទីរពេទ្យនៅភ្នំពេញ ហេតុនេះគាត់ក៏ឆ្លៀតពេលទៅមើលនិងដាក់ចំណីព្រាបនៅមុខវាំងនេះ ។
អ្វីដែលគាត់បានឃើញដោយផ្ទាល់ភ្នែកខុសពីឃើញតាមទូរទស្សន៍ គឺវាមានភាពស្រស់ស្អាត និងមានអារម្មណ៍ថាប្លែកភ្នែកនិងប្លែកអារម្មណ៍ ។ អ្វីដែលពិសេសជាងនេះទៅទៀតនោះកូនរបស់គាត់មានការរីករាយយ៉ាងខ្លាំងពេលឃើញត្វព្រាបទាំងនោះបន្ទាប់ពីវាយំដោយសារការចាក់ថ្នាំ ។ កុមារា កុមារីអាយុ៨ទៅ១០ឆ្នាំ ចំនួន៥នាក់ដែលទៅដាក់ចំណីឱ្យព្រាបបាននិយាយដូចគ្នាថា ពួកគេចូលចិត្តលេងប្រឡែងជាមួយសត្វព្រាបទាំងនោះណាស់ ព្រោះវាមិនសូវខ្លាចមនុស្សទេ។
អ្នកស្រីជាម្តាយក្មេងម្នាក់ប្រាប់ថា កូនគាត់តែងតែរំអុកឱ្យជូនទៅមើលហ្វូងព្រាបរាល់ពេលចេញពីផ្ទះទៅលំហែកម្សាន្តនាពេលល្ងាច ។ដៃកាន់គ្រាប់ពោតបោះឱ្យសត្វព្រាបជាចំណីបុរសឈ្មោះសារាយ សុខ មានអាយុជាង៣០ឆ្នាំ និយាយថា ជារឿយៗក្រោយពេលសម្រាកពីការងារលោកតែងទៅមុខវាំងដើម្បីដាក់ចំណីឱ្យសត្វព្រាបដើម្បីគ្រាន់ជាការកម្សាន្ត ព្រោះពួកវាសាំងគួរឱ្យចូលចិត្តណាស់ ។
សម្រាប់រូបលោកផ្ទាល់គិតថា ហ្វូងសត្វព្រាបនេះពិតជាអាចទាក់ទាញភ្ញៀវទេសចរជាតិ និងអន្តរជាតិ និងជាការលម្អទីក្រុងឱ្យកាន់តែមានសោភ័ណភាពមួយកម្រិតទៀត ជាពិសេសនោះសម្រាប់បង្កើតមុខរបរ និងប្រាក់ចំណូលដល់ប្រជាពលរដ្ឋផងដែរ ។
ក្រុមអ្នកលក់ចំណីឱ្យព្រាបប្រាប់ថា ហ្វូងព្រាបនោះយប់ឡើងដេកនៅទ្រនំស្កឹមស្កៃ គឺលើដំបូលប្រាសាទចន្ទឆាយ៉ា ៕
ចែករំលែកព័តមាននេះ