ខេត្តកំពត ៖ បុរសជនជាតិបារាំងម្នាក់បានឌុបកូនចេញពីសាលាក៏ជួបហេតុការណ៍គ្រោះថ្នាក់ចរាចណ៍ដោយចៃដន្យ ម៉ូតូបែកកង់មុខបណ្តាលឱ្យដួលបោកនៅលើចិញ្ចើមផ្លូវរងរបួសទាំងពីរនាក់ឪពុកនិងកូន កាលពីវេលាម៉ោង២រសៀលថ្ងៃទី១៩ កក្កដា ឆ្នាំ២០១២ លើកំណាត់ផ្លូវលេខ១៣៨ ផ្លូវចូលទៅរមណីយដ្ឋានទឹកឈូចំណុចភូមិអូរតូច សង្កាត់អណ្តូងខ្មែរក្រុងកំពត ។
មន្ត្រីនគរបាលចរាចរក្រុងបានឱ្យដឹងថា ជនជាតិបារាំងដែលជួបគ្រោះថ្នាក់ចរាចរណ៍ដោយជិះម៉ូតូបែកកង់ខ្លួនឯងនេះឈ្មោះសេត ទ្រីត (Setrit) អាយុ៣២ឆ្នាំ ឌុបកូនប្រុសអាយុ៣ឆ្នាំម្នាក់ចេញពីសាលារៀន នៅពេលម៉ូតូបែកកង់បានដួលបោកទៅលើចិញ្ចើមផ្លូវបណ្តាលឱ្យកូនរងរបួសធ្ងន់ ហើយឪពុករងរបួសមធ្យម ត្រូវជនជាតិដូចគ្នា ដឹកទៅសង្គ្រោះនៅមន្ទីរពេទ្យកំពត ។ ជនរងគ្រោះ មានទីលំនៅភូមិស្នំ ប្រាំពីរ ឃុំម៉ាក់ប្រាង្គ ស្រុកទឹកឈូ ខេត្តកំពត ។ ជិះម៉ូតូម៉ាកវ៉េវ អាល់ហ្វា ពណ៌ខ្មៅមួយគ្រឿងក្នុងទិសដៅពីត្បូងទៅជើង ។ ក្រោយពេលពិនិត្យសមត្ថកិច្ចបានប្រគល់ម៉ូតូឱ្យគ្រួសារជនរងគ្រោះវិញ ។
តាមការសន្និដ្ឋានរបស់សមត្ថកិច្ច ជនរងគ្រោះទាំងពីរនាក់ឪពុកកូន បានដួលបោកយ៉ាងខ្លាំង ប៉ុន្តែដោយសារពាក់មួកសុវត្ថិភាពទាំងពីរ នាក់ទើបគ្រាន់តែបែកមួក ឯមនុស្សរងរបួសដៃជើងនិងដងខ្លួនប៉ុណ្ណោះ បើមិនពាក់មួកការពារទេ អាចរងគ្រោះផ្នែកក្បាលធ្ងន់ធ្ងរ ឬក៏អាចប៉ះពាល់ដល់អាយុជីវិត។ ពេលជួបហេតុការណ៍ជាក់ស្តែងបែបនេះទើបទទួលស្គាល់តម្លៃនៃការពាក់មួកសុវត្ថិភាពមានសារសំខាន់ណាស់ អាចធ្វើឱ្យអ្នករួចផុតពីសង្វេគបាន ។ ដូច្នេះគួរបុរសស្ត្រីគ្រប់រូប ដែលធ្វើដំណើរតាមទោចក្រយានយន្តគប្បីអនុវត្តឱ្យបានគ្រប់គ្នា ដើម្បីគោរពតាមច្បាប់ចរាចរណ៍ផង និងជួយកាត់បន្ថយគ្រោះថ្នាក់ចរាចរណ៍ផង ៕
ចែករំលែកព័តមាននេះ