រាជធានីភ្នំពេញ ៖ ក្មេងប្រុសសិស្សសាលម្នាក់ បានរងរបួសបាក់ជើងស្ដាំ ខណៈជិះម៉ូតូ១គ្រឿង ទៅរៀន បើកបរក្នុងល្បឿនលឿន ហើយបើកវ៉ាជែងខាងឆ្វេងរថយន្តនៅខាងមុខ រួចក៏ជ្រុលទៅបុកម៉ូតូ ១គ្រឿងទៀត…
រាជធានីភ្នំពេញ ៖ ក្មេងប្រុសសិស្សសាលម្នាក់ បានរងរបួសបាក់ជើងស្ដាំ ខណៈជិះម៉ូតូ១គ្រឿង ទៅរៀន បើកបរក្នុងល្បឿនលឿន ហើយបើកវ៉ាជែងខាងឆ្វេងរថយន្តនៅខាងមុខ រួចក៏ជ្រុលទៅបុកម៉ូតូ ១គ្រឿងទៀត ដែលជិះដោយស្ត្រីកម្មការិនីរោងចក្រម្នាក់ ពេញទំហឹង។ ចំណែកស្ត្រី ដែលជាកម្មការិនីរោងចក្រ បានរបួសបែកក្បាលសន្លប់ស្ដូកស្ដឹង បន្ទាប់មកត្រូវបានគេបញ្ជូនទៅសង្គ្រោះបន្ទាន់នៅមន្ទីរពេទ្យជាតិ តេជោសន្តិភាព ទាំង២នាក់ តែម្ដង ។
ឧប្បត្តិហេតុខាងលើនេះ បានកើតឡើងកាលពីវេលាម៉ោង៦និង៣៥នាទីព្រឹកថ្ងៃទី១១ ខែកញ្ញា ឆ្នាំ២០២៤ នៅតាមផ្លូវបេតុងវត្តពោធិ៍វ័ន ស្ថិតនៅក្នុងភូមិអករំដួល សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។
អ្នកដំណើរតាមផ្លូវខាងលើ បានប្រាប់ឲ្យដឹងថា នៅមុនពេលកើតហេតុ ក្មេងប្រុសសិស្សសាលាម្នាក់នោះ បានជិះម៉ូតូ១គ្រឿង ម៉ាកស៊ុយហ្ស៊ុយគីស្មាស់ ពណ៍ខ្មៅ ពាក់ស្លាកលេខភ្នំពេញ 1AY-9675 ទៅរៀននៅសាលារៀនទួលស្នោរ សង្កាត់ស្នោរ ខណ្ឌកំបូល ដោយបានធ្វើដំណើរក្នុងទិសដៅពីកើតទៅលិច និងក្នុងល្បឿនលឿនថែមទៀតផង លុះពេលទៅដល់ត្រង់ចំណុចកើតហេតុ ក្មេងប្រុសរូបនោះ បានបន្ថែមល្បឿនកាន់តែលឿន វ៉ាជែងខាងឆ្វេងរថយន្តដែលនៅខាងមុខស្របទិសគ្នា ។
សាក្សីដដែល បានប្រាប់ឲ្យដឹងបន្តទៀតថា ខណៈពេលវ៉ារថយន្តផុត ក៏បានជ្រុលទៅបុកជាមួយម៉ូតូ១គ្រឿងទៀត ម៉ាកហុងដាឌ្រីមសេ១២៥ ពណ៍ខ្មៅ ពាក់ស្លាកលេខកំពង់ធំ 1B-5153 ជិះដោយស្ត្រីកម្មការិនីរោងចក្រម្នាក់ ពេញទំហឹង។ ក្នុងពេលដែល ស្ត្រីខាងលើកំពុងជិះធ្វើដំណើរក្នុងទិសដៅបញ្ច្រាស់គ្នា ពីលិចទៅកើតចេញពីភូមិស្នោរ សង្កាត់ស្នោរ ខណ្ឌកំបូល ទៅធ្វើការរោងចក្រ បណ្ដាលឲ្យក្មេងប្រុសសិស្សសាលាខាងលើរងរបួសបាក់ជើងស្ដាំ ចំណែកស្ត្រី ដែលជាកម្មការិនីរងរបួសបែកក្បាលសន្លប់ស្ដូកស្ដឹង ហើយម៉ូតូទាំង២គ្រឿង បានរងការខូចខាតដូចគ្នា ។
ក្រោយពេលកើតហេតុ រថយន្តពេទ្យបានដឹកយកជនរងគ្រោះទាំង២នាក់ បញ្ជូនទៅកាន់មន្ទីរពេទ្យជាតិ តេជោសន្តិភាព ដើម្បីសង្គ្រោះបន្ទាន់ បន្ទាប់មកនគរបាលខណ្ឌពោធិ៍សែនជ័យ បានចុះទៅធ្វើការវាស់វែង និងនាំយកម៉ូតូទៅរក្សាទុករង់ចាំដោះស្រាយនៅពេលក្រោយ ៕
ចែករំលែកព័តមាននេះ