រាជធានីភ្នំពេញ ៖ អ្នកនាំពាក្យក្រសួងយុត្តិធម៌ បានគូសបញ្ជាក់ថា ការប្រព្រឹត្តិបទល្មើសគ្រោះថ្នាក់ចរាចរណ៍ ជនល្មើសត្រូវតែទទួលខុសត្រូវតាមផ្លូវច្បាប់យ៉ាងតឹងរឹង ដែលក្នុងនេះ មិនអាចយកថវិការប្តូរជាមួយការរួចខ្លួនឡើយ ពោលគឺជនល្មើសត្រូវតែទទួលខុសត្រូវទាំងសំណង និងបទល្មើសព្រហ្មទណ្ឌជាចាំបាច់…
រាជធានីភ្នំពេញ ៖ អ្នកនាំពាក្យក្រសួងយុត្តិធម៌ បានគូសបញ្ជាក់ថា ការប្រព្រឹត្តិបទល្មើសគ្រោះថ្នាក់ចរាចរណ៍ ជនល្មើសត្រូវតែទទួលខុសត្រូវតាមផ្លូវច្បាប់យ៉ាងតឹងរឹង ដែលក្នុងនេះ មិនអាចយកថវិការប្តូរជាមួយការរួចខ្លួនឡើយ ពោលគឺជនល្មើសត្រូវតែទទួលខុសត្រូវទាំងសំណង និងបទល្មើសព្រហ្មទណ្ឌជាចាំបាច់ ដោយមិនអាចរួចខ្លួននោះទេ ។
ថ្លែងក្នុងសន្និសីទសារព័ត៌មានស្តីពី “លទ្ធផលរយៈពេល១ឆ្នាំ នៃការអនុវត្តយុទ្ធនាការជំរុញ និងពន្លឿនការដោះស្រាយរឿងក្តីនៅតាមតុលាការ និងយុទ្ធនាការត្រួតពិនិត្យ និងដោះស្រាយភាពមិនប្រក្រតីនៅតាមតុលាការ” នារសៀលថ្ងៃទី១៣ ខែមករា ឆ្នាំ២០២៥ លោក សេង ឌីណា អ្នកនាំពាក្យក្រសួងយុត្តិធម៌ បានលើកឡើងថា មុនបើកយុទ្ធនាការ២ គឺ យុទ្ធនាការជំរុញ និងពន្លឿនការដោះស្រាយរឿងក្តីនៅតាមតុលាការ និងយុទ្ធនាការត្រួតពិនិត្យ និងដោះស្រាយភាពមិនប្រក្រតីនៅតាមតុលាការ គឺសំណុំរឿងគ្រោះថ្នាក់ចរាចរណ៍ មានចំនួន ១,០៤១ករណី ត្រូវតុលាការរាជធានីខេត្តដោះស្រាយរួចរាល់១០០ភាគរយ ចាប់តាំងតែពីខែវិច្ឆិកា ឆ្នាំ២០២៤។ ចំណែកសំណុំរឿង ដែលចូលថ្មី ក្រោយប្រកាស យុទ្ធនាការមានចំនួនសរុប ៥,៤៧០ករណី ត្រូវបានតុលាការដោះស្រាយចប់សព្វគ្រប់បាន៨៧,៨៨ភាគរយ ។ បើសរុបសំណុំរឿងចរាចរណ៍ទូទាំងប្រទេស ទាំងរឿងចាស់ និងថ្មី ៦,៥១១ករណី ត្រូវបានដោះស្រាយចប់សព្វគ្រប់ ៥,៨៤៨ករណីដែលស្មើនឹង៨៩,៨២ភាគរយ ហើយនៅសល់ត្រឹមតែ ១០,១៨ភាគរយ ដែលកំពុងចាត់ការ ។
លោក សេង ឌីណា បានថ្លែងដែរថា គណៈបញ្ជាការពិនិត្យឃើញថា ការដោះស្រាយសំណងក្នុងសំណុំរឿងគ្រោះថ្នាក់ចរាចរណ៍ដល់ជនរងគ្រោះ គឺត្រូវបានគិតគូយ៉ាងយកចិត្តទុកដាក់ ។
ជាមួយគ្នានេះដែរ ឯកឧត្តមបានបញ្ជាក់ថា ៖ “ចំពោះជនល្មើស ដែលបង្កគ្រោះថ្នាក់ចរាចរណ៍ ត្រូវតែទទួលខុសត្រូវតាមផ្លូវច្បាប់យ៉ាងតឹងរឹង ក្នុងនេះមិនមែនឱ្យតែថា មានសំណងរដ្ឋប្បវេណីហើយរួចខ្លួនទេ ពោលគឺសងទាំងសំណងរដ្ឋប្បវេណី និងបទល្មើសព្រហ្មទណ្ឌ នៅតែទទួលរងមិនអាចចៀសផុតឡើយ” ។
អ្នកនាំពាក្យរូបនេះ បានបញ្ជាក់បន្ថែមថា ៖ មិនមែនបុកគេស្លាប់ហើយ ចេញសំណងទៅ រួចខ្លួនទៀតទេ បន្ទាប់ពីបើកយុទ្ធនាការ២ គឺយុទ្ធនាការជំរុញ និងពន្លឿនការដោះស្រាយរឿងក្តីនៅតាមតុលាការ និងយុទ្ធនាការត្រួតពិនិត្យនិងដោះស្រាយភាពមិនប្រក្រតីនៅតាមតុលាការនេះមក ។
ទោះបីយ៉ាងណា លោកបានថ្លែងដោយបញ្ជាក់បន្ថែមថា ៖ យើងឃើញថា មានករណីច្រើនដែរ ជនល្មើស ដែលបង្កគ្រោះថ្នាក់ហើយ មានសុឆន្ទះចេញសំណងដល់ជនរងគ្រោះឆាប់រហ័សនោះមានច្រើន បើទោះដឹងថា មានសំណងហើយ នៅតែទទួលរងបណ្តឹងព្រហ្មទណ្ឌបែបណាក៏ដោយ ។
បើយោងតាមរបាយការណ៍ប្រចាំឆ្នាំរបស់ក្រសួងសាធារណការ និងដឹកជញ្ជូន ថ្មីៗមកនេះ បានឱ្យដឹងថា ក្នុងរយៈពេលពេញ១ឆ្នាំ២០២៤ មានករណីគ្រោះថ្នាក់ចរាចរណ៍ផ្លូវគោក ចំនួន ២,៨៤៤លើក ដោយបានបង្កឲ្យមានមនុស្សស្លាប់ចំនួន ១,៥០៩នាក់។ បើតាមរបាយការណ៍ដដែល ចំនួនគ្រោះថ្នាក់ចររាចរណ៍ផ្លូវគោក ក្នុងឆ្នាំ២០២៤ បានថយចុះចំនួន១៤ភាគរយបើធៀបនឹងឆ្នាំ ២០២៣ ។
ប្រភពដដែលនេះ បានឱ្យដឹងដែរថា មានមនុស្សស្លា.ប់ជាមធ្យម ចំនួន៤នាក់ក្នុងមួយថ្ងៃ នៅក្នុងហេតុការណ៍ជួបគ្រោះថ្នាក់ចរាចរណ៍។ ចំណែកមូលហេតុចម្បងៗ ដែលបណ្តាលឱ្យកើតមានគ្រោះថ្នាក់ចរាចរណ៍ផ្លូវគោក ក្នុងឆ្នាំ២០២៤ ច្រើនជាងមកពីគឺកត្តាល្បឿន និងការមិនគោរពសិទ្ធិជាដើម ។
ជាមួយគ្នានោះដែរ អ្នកនាំពាក្យក្រសួងយុត្តិធម៌ ក៏បានអំពាវនាវឪពុកម្តាយ-អាណាព្យាបាលអប់រំ និងប្រៀនប្រដៅចៀសវាងក្លាយជាក្មេងទំនើង ដែលនាំឱ្យប្រឈមជាប់បទល្មើស ។
បើតាមមន្ត្រីអ្នកនាំពាក្យក្រសួងយុត្តិធម៌ លោក សេង ឌីណា បានលើកឡើងថា នៅក្នុងសំណុំរឿងក្មេងទំនើង គណៈបញ្ជាការដឹកនាំយុទ្ធនាការ បានពិនិត្យឃើញថា តុលាការបានអនុវត្តច្បាប់យ៉ាងម៉ឺងម៉ាត់ ដោយគិតចាប់ពីថ្ងៃទី២៣ ខែឧសភា ឆ្នាំ២០២៤ មកទល់នឹងពេលនេះ សាលាដំបូង និងអយ្យការអមសាលាដំបូងរាជធានី ខេត្ត ទូទាំងប្រទេស បានទទួលចាត់ការ សំណុំរឿងពាក់ព័ន្ធនឹងក្មេងទំនើងសរុបចំនួន ២,៣២៤ ដែលមានជនសង្ស័យ ចំនួន ៣,៦៥០ នាក់ ជាកម្មវត្ថុ នៃការអនុវត្តវិធានការតាមផ្លូវច្បាប់ ។
លោក សេង ឌីណា បានឱ្យដឹងថា ៖ សម្រាប់ វិធានការម៉ឺងម៉ាត់នេះ បានចូលរួមចំណែកក្នុងការ ធានាឱ្យបាននូវសុវត្ថិភាព និងសណ្តាប់ធ្នាប់សង្គម ដោយយើងសង្កេតឃើញជារួមថា បច្ចុប្បន្ននេះ សកម្មភាពក្មេងទំនើង នៅសល់តិចតួចតែប៉ុណ្ណោះ ។
លោកបានបញ្ជាក់បន្ថែមថា គណៈបញ្ជាការដឹកនាំយុទ្ធនាការ បានអំពាវនាវឱ្យឪពុកម្តាយ ព្រមទាំងអាណាព្យាបាលទាំងអស់ ខិតខំតាមដាន អប់រំ និងទូន្មាន ប្រៀនប្រដៅកូនៗ ឱ្យដើរតាមគន្លងត្រឹមត្រូវ ដើម្បីក្លាយខ្លួនជាពលរដ្ឋល្អសម្រាប់សង្គមជាតិ និងអំពាវនាវដល់យុវជនទាំងអស់ ដែលជាទំពាំងស្នងឫស្សីរបស់ប្រទេសជាតិ ប្រកាន់ខ្ជាប់នូវវិន័យ សីលធម៌ និងសេចក្តីថ្លៃថ្នូរ ហើយចៀសវាងនូវរាល់សកម្មភាពទាំងឡាយណា ដែលបង្កអន្តរាយ ដល់ខ្លួន គ្រួសារ និងសង្គមជាតិ ឬអំពើល្មើសច្បាប់ ដែលអាចប្រឈមនឹងការជាប់ទោសពីបទល្មើស ព្រហ្មទណ្ឌ ៕
ចែករំលែកព័តមាននេះ