ខេត្តកំពត ៖ រដ្ឋមន្ត្រីក្រសួងបរិស្ថានលោក សាយ សំអាល់ បានជម្រុញជាថ្មីម្តងទៀតដល់អាជ្ញាធរថ្នាក់ ក្រោមជាតិបង្កើនការយកចិត្តទុកដាក់បន្ថែមទៀតលើការងារអភិរក្សធនធានធម្មជាតិដែល យើងមានស្រាប់ឲ្យបានគង់វង្សសម្រាប់ជាប្រយោជន៍ដល់មនុស្សជំនាន់ក្រោយ ។
លោករដ្ឋមន្ត្រីថ្លែងបែបនោះនៅក្នុងពីធីបើកសិក្ខាសាលាថ្នាក់តំបន់ស្តីពីការផ្តល់បច្ចេកទេសអនុវត្តមុខងារវិស័យបរិស្ថានជូនរដ្ឋបាលថ្នាក់ក្រោមជាតិកាលពីល្ងាចថ្ងៃទី២៨ ខែកញ្ញា ឆ្នាំ២០២០ នៅទីរួមខេត្តកំពត ។
លោក សាយ សំអាល់ ថ្លែងថា អាជ្ញាធរថ្នាក់ក្រោមជាតិត្រូវបន្តយកចិត្តទុកដាក់អនុវត្ត មុខងារវិស័យបរិស្ថានដែលក្រសួងបរិស្ថានបានធ្វើប្រតិភូកម្ម និងការប្រគល់មុខងារ គ្រប់គ្រប់ជូនដើម្បីប្រសិទ្ធភាពខ្ពស់ក្នុងការអនុវត្តការងារបម្រើនិងផ្តល់សេវាជូនប្រជាពលរដ្ឋនៅមូលដ្ឋាន។
លោករដ្ឋមន្ត្រីបន្តថា យើងទាំងអស់ គ្នាត្រូវបន្តខិតខំបម្រើប្រជាពលរដ្ឋឱ្យបាន ល្អជា ពិសេសក្នុងវិស័យបរិស្ថានត្រូវបង្កើនការយកចិត្តទុកដាក់ ក្នុងកិច្ចគាំពារបរិស្ថាន ការគ្រប់ គ្រង់សំណល់គ្រប់ប្រភេទឱ្យមានប្រសិទ្ធភាពដើម្បីធានាបាននូវគុណភាពបរិស្ថាន និងនិរន្តរភាពបរិស្ថាន ហើយពង្រឹងការអនុវត្តច្បាប់ និងបង្កើនការយកចិត្តទុកដាក់បន្ថែមទៀត លើការងារអភិរក្សធនធានធម្មជាតិដែលយើងមាន ឱ្យបានគង់វង្សសម្រាប់ជាប្រយោជន៍ ដល់មនុស្សរាប់ជំនាន់តទៅមុខទៀត។
លោក សាយ សំអាល់ ក៏បានគូសបញ្ជាក់ពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្រសួងបរិស្ថានក្នុងការធ្វើកំណែទម្រង់ក្នុងវិស័យបរិស្ថាននាពេលកន្លងមក និងការគិតគូរ លើការបង្កើតសេដ្ឋកិច្ច មូលដ្ឋាននិងបង្កើតការងារថ្មីៗជូនប្រជាពលរដ្ឋ និងបង្កើនចំណូល សម្រាប់ពលរដ្ឋមូលដ្ឋានតាមរយៈការជំរុញទេសចរណ៍ធម្មជាតិ ការជំរុញឱ្យមានការផ្សព្វផ្សាយនិងប្រើប្រាស់ផលិតផលរបស់ប្រជាសហគមន៍ និងការពង្រឹងតួនាទីរបស់ សហគមន៍ចូលរួមការពារ និងអភិរក្សធនធានធម្មជាតិ សត្វព្រៃព្រៃឈើ។
លោករដ្ឋមន្ត្រីបានថ្លែងបញ្ជាក់បន្ថែមថាកម្ពុជាទទួលប្រែក្លាយពីប្រទេសដែលគេចោទប្រកាន់ពីមុនថាជាប្រទេសកាប់ឈើ មកបច្ចុប្បន្នថាជាប្រទេសដែលការពារបានព្រៃឈើ និងទទួលបានជោគជ័យក្នុងការលក់ឥណទានកាបូន នៅលើទីផ្សារអន្តរជាតិ។
សូមជម្រាបថាសិក្ខាសាលាថ្នាក់តំបន់ស្តីពីការផ្តល់បច្ចេកទេសអនុវត្តមុខងារវិស័យបរិស្ថានជូនរដ្ឋបាលថ្នាក់ក្រោមជាតិនឹងត្រូវរៀបចំពីថ្ងៃទី២៨ ដល់ថ្ងៃទី៣០ ខែកញ្ញា ឆ្នាំ២០២០ នៅទីរួមខេត្តកំពតដោយមានការចូលរួមពីមន្ត្រីអាជ្ញាធរពាក់ព័ន្ធចំនួន៤ ខេត្តរួមមានខេត្តកំពត ខេត្តព្រះសីហនុ ខេត្តកែប និងខេត្តតាកែវ។ នេះគឺជាលើកទី២ ហើយដែលក្រសួង បរិស្ថានបានរៀបចំសិក្ខាសាលាថ្នាក់តំបន់ស្តីពីការផ្តល់បច្ចេកទេសអនុវត្តមុខងារវិស័យបរិស្ថានជូនរដ្ឋបាលថ្នាក់ក្រោមជាតិ។ សិក្ខាសាលាថ្នាក់តំបន់លើកទី១ រៀបចំឡើងនៅ ខេត្តកំពង់ធំ។
សិក្ខាសាលាថ្នាក់តំបន់នេះរៀបចំឡើងដោយក្រសួងបរិស្ថានក្នុងគោលបំណងដើម្បីបំពាក់បំប៉នសមត្ថភាពមន្ត្រីរដ្ឋបាលថ្នាក់ក្រោមជាតិអំពីបច្ចេកទេសអនុវត្តមុខងារវិស័យបរិស្ថានដែលក្រសួងបានធ្វើប្រតិភូកម្ម និងប្រគល់មុខងារជូនដល់រដ្ឋបាលថ្នាក់ក្រោមជាតិ។
មន្ត្រីក្រសួងបរិស្ថានបានឲ្យដឹងថា ក្នុងរយៈពេល៣ថ្ងៃនៃសិក្ខាសាលាថ្នាក់តំបន់នេះ មន្ត្រីជំនាញនៃក្រសួងបរិស្ថាននឹងធ្វើបង្ហាញជូនដល់មន្ត្រីថ្នាក់ក្រោមជាតិនូវទស្សនទាននៃការអនុវត្តគោលនយោបាយកំណែទម្រង់វិមជ្ឈការ និងវិសហមជ្ឈការ ការគ្រប់គ្រង សំណល់រឹងតាមទីប្រជុំជន ការគ្រប់គ្រងប្រព័ន្ធលូ និងអាងប្រព្រឹត្តកម្មទឹកកខ្វក់ ការបណ្តុះបណ្តាលបច្ចេកទេសអនុវត្តមុខងារការអភិវឌ្ឍដោយចីរភាព មុខងារផ្សព្វផ្សាយចំណេះដឹង និងព័ត៌មានបរិស្ថាន ការងារគ្រប់គ្រងសហគមន៍តំបន់ការពារធម្មជាតិ និងការគ្រប់គ្រង ប្រព័ន្ធតំបន់ការពារ ធម្មជាតិ ៕ (កែសម្រួលដោយ ៖ ធីតា)
ចែករំលែកព័តមាននេះ