ខេត្ដក្រចេះ ៖ ប្រសិនជាភ្ញៀវទេសចរ បានធ្វើដំណើរមកទស្សនានៅរមណីយដ្ឋាន អន្លង់ផ្សោត និងរមណីយដ្នានកាំពី ដែលមាន ទីតាំងនៅភូមិកាំពី ឃុំសំបុក ស្រុកចិត្របុរី តាមដងផ្លូវភ្ញៀវទេសចរនឹងបានឃើញចំលាក់សត្វត្រី ផ្សោតធ្វើអំពើឈើដែលបងប្អូនប្រជាពលរដ្ឋ បានរចនាដោយដៃ និងដាក់តាំងលក់លើកូនគ្រែ តូចៗ ជាហូរហែនៅតាមចិញ្ចើមផ្លូវមុខផ្ទះជិត រមណីយដ្ឋានអន្លង់ផ្សោតនេះមិនខាន។ គេសង្កេតឃើញថា រាល់ភ្ញៀវទេសចរជាតិ និងអន្ដរជាតិមុន ឬក្រោយពេលដែលមក ទស្សនាសត្វផ្សោតនៅក្នុងទឹកទន្លេមេគង្គ ពួកគេតែងតែទិញនូវរូបចម្លាក់ត្រីផ្សោតដែល ធ្វើអំពីឈើមានតូចមានធំគ្រប់ប្រភេទ ដើម្បីធ្វើជាកាដូអនុស្សារីយ៍ តាំងលំអនៅក្នុងផ្ទះ ឬបន្ទប់ការិយាល័យធ្វើការ ឬជាបន្ដោងកូន សោជាដើម។
រូបចម្លាក់ត្រីផ្សោតធ្វើអំពីឈើ ដែលរចនា ដោយដៃពីសំណាក់ប្រជាពលរដ្ឋនៅទីនោះ គឺបានសំរិតសំរាំងឡើងក្នុងរូបភាពដ៏ស្រស់ស្អាត ប្រៀបដូចជាត្រីផ្សោតពិតៗ ដោយរូបចម្លាក់ នីមួយៗ មានតូចមានធំ ជាគូជាប់គ្នា ខ្លះរចនា ជាប្រអប់ដាក់ប៊ិច ដាក់នាមប័ណ្ណ ដាក់ឈើ ចាក់ធ្មេញ ឬជាបន្ដោងកូនសោ និងខ្លះទៀត មានរូបរាងធំគេយកទៅដាក់តាំងលំអ តាមលំ នៅឋាន បន្ទប់ការិយាល័យធ្វើការ និងទិញផ្ញើ មិត្ដភក្ដិជាកាដូអនុស្សាវរីយ៍។ ជាងនេះទៅ ទៀត រូបចម្លាក់ត្រីផ្សោតធ្វើអំពីឈើនេះមិន ត្រឹមតែដាក់លក់នៅតំបន់ក្បែររមណីយដ្ឋាន អន្លង់ផ្សោតទេ ថែមទាំងបានដាក់លក់នៅតាម ទីប្រជុំជននានាក្នុងខេត្ដផងដែរ ដូចជាតាមចំណតរថយន្ដទីផ្សារ និងភោជនីយដ្ឋានក៏មាន ឈ្មួញមួយចំនួនបានកុម្ម៉ង់ទិញយកទៅលក់ បន្ដនៅខេត្ដសៀមរាបផងដែរ។
ការយកឈើឆ្លាក់ធ្វើជារូបត្រីផ្សោតនេះ មិនត្រឹមតែជាអាជីវកម្មមួយរបស់ប្រជាពលរដ្ឋ ដែលអាចជួយរកកំរៃលើកកំពស់ជីវភាពរស់នៅរបស់ពួកគាត់បានមួយកំរិតទៀតបន្ទាប់ពីរបរធ្វើស្រែចំការប៉ុណ្ណោះទេ តែវាក៏ជាផលិតផលមួយ ដែលបានជួយលើកតំកើងនូវឧស្សាហកម្មគ្មាន ផ្សែងយ៉ាងសំខាន់នៅក្នុងខេត្ដក្រចេះផងដែរ។ ជាងចម្លាក់ឈ្មោះសួន សុខផេង អាយុ២៣ឆ្នាំ មានទីលំនៅភូមិកាំពី ឃុំសំបុក ស្រុកចិត្របុរី ដែលកំពុងតែអង្គុយដាប់ឆ្លាក់ឈើដើម្បីធ្វើជា រូបត្រីផ្សោតនៅនឹងមុខផ្ទះបានរៀបរាប់ឱ្យដឹងថា គាត់បានចាប់អាជីពធ្វើចំលាក់ត្រីផ្សោត ដើម្បីដាក់លក់នេះមានរយៈពេលជាង៧ឆ្នាំមកហើយ ។ ការចេះដាប់ឆ្លាក់រូបត្រីនេះគឺជាការ ចេះតៗគ្នាពីម្នាក់ទៅម្នាក់ ហើយក៏ខិតខំសំរិត សំរាំងខ្លួនឯងទៅតាមទេពកោសល្យបន្ថែម ទៀតលើការច្នៃប្រឌិតរចនាឱ្យស័ក្ដិសមដូចរូប ពិតប្រាកដ។ យុវជនរូបនេះបានរៀបរាប់ទៀត ថាបច្ចុប្បន្ននេះ ជាងចម្លាក់ត្រីផ្សោតធ្វើអំពី ឈើនៅក្នុងភូមិ មិនត្រឹមតែចេះឆ្លាក់រូបត្រីផ្សោតប៉ុណ្ណោះទេ ថែមទាំងចេះឆ្លាក់រូបត្រី មួយចំនួនទៀតទៅតាមភ្ញៀវកុម្ម៉ង់ផងដែរ ដូចជា រូបត្រីរាជ ត្រីនាគជាដើម ហើយក្រុមគ្រួសាររបស់គាត់គឺចាប់របរនេះទាំងអស់គ្នា។
ទោះបីយ៉ាងណាប្រជាពលរដ្ឋដែលប្រកប របរនេះក៏កំពុងជួបប្រទះនឹងការលំបាកផងដែរ ពីការរកទិញឈើមកធ្វើ ពីព្រោះរូបចម្លាក់ត្រីនេះ គឺចាំបាច់ត្រូវយកឈើប្រណីតមកធ្វើ ដូចជា នាងនួន បេង គ្រញូងជាដើម។ ដោយសារតែ ឈើទាំងនេះជាប្រភេទឈើកម្រគឺពិបាកនឹងរក ទិញខ្លាំងណាស់ ពួកគាត់ត្រូវដើររកទិញឈើ ទាំងនេះ នៅតាមតំបន់ឆ្ងាយៗ ក្នុងតំលៃថោក យកមកកែច្នៃរួចបាញ់ថ្នាំឱ្យរលោងទើបអាច លក់បានតំលៃថ្លៃ ទោះបីយ៉ាងណាពួកគាត់ ទទួលបានប្រាក់ចំណេញមិនច្រើនទេតែអាច ទទួលយកបាន។ បុរសរូបនេះបានរៀបរាប់ ដោយធ្វើការប្រៀបធៀបថា កាលពីគាត់មិន ទាន់ចាប់យករបរនេះ គឺជីវភាពគាត់មានការ លំបាកខ្លាំងណាស់ ប៉ុន្ដែបន្ទាប់ពីគាត់ចាប់យក របរនេះមកឃើញថា ជីវភាពគ្រួសារគាត់មាន ការរីកចំរើនជាងមុន។ ប្រជាពលរដ្ឋដែលមានមុខរបរលក់ចំលាក់ ផ្សោតនៅក្នុងតំបន់រមណីយដ្ឋានអន្លង់ផ្សោត មានចំនួនជាង៣០គ្រួសារ បាននិយាយថា ផលិតផលពួកគាត់នេះលក់ដាច់នៅរដូវប្រាំង ខណៈពេលដែលមានភ្ញៀវទេសចរមកលេង កំសាន្ដហើយជានិច្ចកាលតែងតែទិញយក ទៅតាមខ្លួន។ រីឯតំលៃគឺមានចាប់ពី៨ពាន់រៀល ដល់៥០ដុល្លារ គឺអាស្រ័យទៅតាមទំហំនិង ប្រភេទត្រីធំឬតូច ៕
ចែករំលែកព័តមាននេះ