ខេត្តបន្ទាយមានជ័យ ៖ មន្ត្រីប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិប៉ោយប៉ែតបានចែកម៉ាស់ការពារឆ្លងជំងឺរលាកសួតប្រភេទថ្មី (កូរ៉ូណាវីរុស) ដល់ភ្ញៀវជាតិ និងអន្តរជាតិរយៈពេល៤ថ្ងៃអស់ជាង៧ម៉ឺនម៉ាស់ ហើយម៉ាស់ដែលនៅសល់នឹងបន្តចែករហូតអស់១លានម៉ាស់ ។ លោកឧត្តមសេនីយ៍ត្រី អុី…
ខេត្តបន្ទាយមានជ័យ ៖ មន្ត្រីប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិប៉ោយប៉ែតបានចែកម៉ាស់ការពារឆ្លងជំងឺរលាកសួតប្រភេទថ្មី (កូរ៉ូណាវីរុស) ដល់ភ្ញៀវជាតិ និងអន្តរជាតិរយៈពេល៤ថ្ងៃអស់ជាង៧ម៉ឺនម៉ាស់ ហើយម៉ាស់ដែលនៅសល់នឹងបន្តចែករហូតអស់១លានម៉ាស់ ។
លោកឧត្តមសេនីយ៍ត្រី អុី ចំរើន នាយប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិប៉ោយប៉ែតបានប្រាប់កាលពីថ្ងៃទី៣០ ខែមករា ឆ្នាំ២០២០ ថា ក្រោយពេលផ្ទុះជំងឺរលាកសួតប្រភេទថ្មី (កូរ៉ូណាវីរុស) ឆ្លងតាមប្រព័ន្ធផ្លូវដង្ហើម និងដោយមានការណែនាំពីលោកអគ្គនាយកនៃអគ្គនាយកដ្ឋាននគរបាលអន្តោប្រវេសន៍រួចមក មន្ត្រីប៉ុស្តិ៍នគរបាលអន្តោប្រវេសន៍បានចុះចែកម៉ាស់ជូនភ្ញៀវជាតិ និងអន្តរជាតិដែលធ្វើដំណើរឆ្លងកាត់តាមច្រកទ្វារអន្តរជាតិប៉ោយប៉ែត ចាប់ពីថ្ងៃទី២៧ ដល់៣០ ខែមករា ឆ្នាំ២០២០ នេះ បានចែកម៉ាស់អស់ប្រមាណជាង៧ម៉ឺនម៉ាស ហើយម៉ាស់ដែលនៅសល់នឹងបន្តចែករហូតអស់មានចំនួន១លានម៉ាស់។
លោកឧត្តមសេនីយ៍ត្រី អុី ចំរើន បានថ្លែងអំណរគុណចំពោះសប្បុរសជនដែលបានឧបត្ថម្ភម៉ាស់ដល់ប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិប៉ោយប៉ែតខេត្តបន្ទាយមានជ័យ នៅពេលផ្ទុះជំងឺរលាកសួតប្រភេទថ្មី (កូរ៉ូណាវីរុស)ដែលកំពុងឆ្លងរាលដាលនៅបណ្តាប្រទេសនានាក្នុងពិភពលោក ដើម្បីទប់ស្កាត់ និងការពារឆ្លងជំងឺប្រភេទនេះ គឺត្រូវចែកម៉ាស់ជូនដល់ភ្ញៀវជាតិនិងអន្តរជាតិដែលធ្វើដំណើរឆ្លងកាត់តាមច្រកទ្វារអន្តរជាតិប៉ោយប៉ែត។
លោកឧត្តមសេនីយ៍ត្រី អុី ចំរើន បានបញ្ជាក់ថា មន្ត្រីប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិប៉ោយប៉ែត បានសហការជាមួយមន្ត្រីពេទ្យចត្តាឡីស័ក និងលោកអ៊ុំ រាត្រី អភិបាលខេត្តបន្ទាយមានជ័យ និងអភិបាលក្រុងប៉ោយប៉ែតរួមជាមួយមន្ត្រីស្ថាប័នពាក់ព័ន្ធបានចូលរួមចែកម៉ាស់ និងធ្វើការត្រួតពិនិត្យនៅច្រកទ្វារអន្តរជាតិប៉ោយប៉ែត ដើម្បីទប់ស្កាត់ និងការពារការឆ្លងវីរុសកូរ៉ូណា ៕ (កែសម្រួលដោយ ៖ ធីតា)
ចែករំលែកព័តមាននេះ