អ្នកប្រហែលជាធ្លាប់ឮ ឬបានមើលឃើញសម្លៀកបំពាក់ និងកាបូបប្រេនៗដែលមនុស្សចំណាយរាប់ពាន់ រាប់ម៉ឺនដុល្លារដើម្បីបានវាក្នុងដៃហើយ ប៉ុន្តែតើអ្នកមានដែលឮពីផ្លែឈើដែលមានតម្លៃរាប់ម៉ឺនដុល្លារទេ? ផ្លែឈើក៏ជាផលិតផលដែលមានមនុស្សជាច្រើនហ៊ានចំណាយលុយលើដែរ ហើយខាងក្រោមនេះគឺជាឧទាហរណ៍មួយចំនួននៃផ្លែឈើទាំងនោះ៖
១. ផ្លែត្រសក់ស្រូវជប៉ុន យូបារី (Yubari) ដែលមានតម្លៃប្រមាណ ២៣,០០០ដុល្លារក្នុងមួយគូ ដែលត្រសក់ស្រូវពណ៌ទឹកក្រូចទាំងនេះត្រូវបានដាំដុះក្នុងប្រទេសជប៉ុន និងក្នុងផ្ទះកញ្ចក់ដ៏ទំនើប ។ ពួកវាថែមទាំងមានមួកដើម្បីការពារពន្លឺព្រះអាទិត្យថែមទៀតមុនពេលត្រូវបានប្រមូលផល និងដាក់លក់លើទីផ្សារ ។ តម្លៃរបស់វា គឺមកពីជាតិផ្អែមរបស់វា។
២. ផ្លែឪឡឹក ដេនស៊ូគេ (Densuke) ដែលមានតម្លៃ ៦,១០០ដុល្លារក្នុងមួយផ្លែ ដែលផ្លែឪឡឹកចម្លែកនេះមានពណ៌ខ្មៅ និងមិនមានស្នូតបៃតងដូចផ្លែឪឡឹកទូទៅដែលយើងអាចមើលឃើញលើទីផ្សារបានទេ ។ វាមានទម្ងន់ប្រមាណ ១១គីឡូក្រាម និងត្រូវបានដាំដុះលើកោះហុងកៃដូក្នុងប្រទេសជប៉ុនដែរ ។
៣. ផ្លែទំពាំងបាយជូរ រូប៊ី រ៉ូម៉ាំង (Ruby Roman) ដែលមានតម្លៃ ៤,០០០ដុល្លារក្នុងមួយចង្កោម ដែលទំពាំងបាយជូរទាំងនេះមានទំហំស្ទើរតែប៉ុនគ្រាន់ប៉េងប៉ុងទៅហើយ ។ វាត្រូវបានចាត់ទុកជាផ្លែទំពាំងបាយជូរដែលកម្រមានជាងគេលើលោក ហើយវិធីក្នុងការដាំដុះវាទើបតែត្រូវបានបង្កើតឡើងក្នុងឆ្នាំ ២០០៨ កន្លងមកប៉ុណ្ណោះ ។
៤. ផ្លែម្នាស់ ហេលីហ្គាន (Heligan) ដែលមានតម្លៃ ១,៦០០ដុល្លារក្នុងមួយផ្លែ ដែលផ្លែម្នាស់ដែលមានតម្លៃថ្លៃជាងគេលើលោក គឺត្រូវបានដាំដុះក្នុងចម្ការ ហេលីហ្គាន របស់ប្រទេសអង់គ្លេស ។ ផ្លែម្នាស់ទាំងនេះត្រូវបានដាំដុះក្នុងផ្ទះកញ្ចក់ដែរដែលប្រើលាមកសេះ និងស្បូវសម្រាប់រក្សាកម្តៅ។
៥. ផ្លែឪឡឹកជ្រុងដែលមានតម្លៃ ៨០០ដុល្លារក្នុងមួយផ្លែ ដែលជាទូទៅឪឡឹកតែងតែមានរូបរាងមូលឬទ្រវែងមែនទេ?ជនជាតិជប៉ុនបានរកឃើញវិធីដែលធ្វើឲ្យឪឡឹករបស់ពួកគេមានរាងជ្រុងទៅវិញដោយដាក់វាឲ្យលូតលាស់ក្នុងប្រអប់ជ្រុងមួយតាំងពីតូចដល់ធំ ៕ កែសម្រួលដោយ ៖ សុឃាក់
ចែករំលែកព័តមាននេះ