រាជធានីភ្នំពេញ ៖ សម្តេចហេង សំរិន ប្រធានរដ្ឋសភាកម្ពុជាបានស្នើដល់ប្រធានសភាអូស្ត្រាលីជួយកៀគរអ្នកវិនិយោគទន់ និងអ្នកទេសចរណ៍មកកម្ពុជាឲ្យបានច្រើន ។ ការស្នើរបស់ប្រធានសភាកម្ពុជា កំឡុងពេលដឹកនាំគណៈប្រតិភូសភាកម្ពុជាចូលរួមកិច្ចប្រជុំប្រចាំឆ្នាំនៃវេទិកាសភាអាស៊ី-ប៉ាស៊ីហ្វិក (APPF)…
រាជធានីភ្នំពេញ ៖ សម្តេចហេង សំរិន ប្រធានរដ្ឋសភាកម្ពុជាបានស្នើដល់ប្រធានសភាអូស្ត្រាលីជួយកៀគរអ្នកវិនិយោគទន់ និងអ្នកទេសចរណ៍មកកម្ពុជាឲ្យបានច្រើន ។ ការស្នើរបស់ប្រធានសភាកម្ពុជា កំឡុងពេលដឹកនាំគណៈប្រតិភូសភាកម្ពុជាចូលរួមកិច្ចប្រជុំប្រចាំឆ្នាំនៃវេទិកាសភាអាស៊ី-ប៉ាស៊ីហ្វិក (APPF) ក្នុងប្រទេសអូស្ត្រាលីនៅព្រឹកថ្ងៃទី១៤ ខែមករា ឆ្នាំ២០២០នេះ ។
សម្តេចហេង សំរិន ប្រធានរដ្ឋសភាបានជួបពិភាក្សាការងារជាមួយលោកតូនី ស្មីត (Tony Smith) ប្រធានរដ្ឋសភាអូស្ត្រាលី និងជាប្រធាន APPF លើកទី២៨ នៅវិមានរដ្ឋសភាអូស្ត្រាលី ដើម្បីពង្រឹងកិច្ចសហប្រតិការសភាប្រទេសទាំងពីរឲ្យកាន់តែរឹងមាំឡើង ។ ក្នុងជំនួបប្រធានរដ្ឋសភាអូស្ត្រាលីបានថ្លែងអំណរគុណយ៉ាងជ្រាលជ្រៅចំពោះសម្តេចប្រធានរដ្ឋសភាដែលបានដឹកនាំគណៈប្រតិភូសភាកម្ពុជាមកចូលរួមកិច្ចប្រជុំ APPF ក្នុងប្រទេសអូស្ត្រាលីនាពេលនេះ ។
លោកថា អូស្ត្រាលីបានសិក្សា និងដកស្រង់ពិសោធន៍ជាច្រើនពីសភាកម្ពុជាដែលរៀបចំកិច្ចប្រជុំ APPF លើកទី២៧ កាលពីឆ្នាំ២០១៩ មុនសភាអូស្ត្រាលីធ្វើកិច្ខប្រជុំនេះ ។ ចំណែកសម្តេចហេង សំរិន បានលើកឡើងពីសារៈសំខាន់របស់សភាអូស្ត្រាលីនៅក្នុងវេទិកាអន្តរសភាក្នុងតំបន់ និងសកលលោក ។ សម្តេចបានកោតសរសើរ និងវាយតម្លៃខ្ពស់ចំពោះការៀបចំកិច្ចប្រជុំ APPF លើកទី២៨នេះ ប្របកដោយខ្លឹមសារបង្ហាញសារៈសំខាន់ ពីកិច្ចសហប្រតិបត្តិការល្អនូវសមាជិកAPPF ដើម្បីវិបុលភាពរបស់ប្រជាពលរដ្ឋ ។
សម្តេចប្រធានរដ្ឋសភា បានថ្លែងអំណរគុណរដ្ឋាភិបាល និងប្រជាជនអូស្ត្រាលី ដែលបានរួមវិភាគទានយ៉ាងធំធេងក្នុងដំណាក់កាលស្វែងរកសន្តិភាព និងក៏ដូចជា ការអភិវឌ្ឍន៍នៅកម្ពុជា ។ បច្ចុប្បន្នអូស្ត្រាលីជាដៃគូអភិវឌ្ឍដ៏សំខាន់របស់កម្ពុជាស្ទើរគ្រប់វិស័យ ។ ឆ្លៀតឱកាសនេះសម្តេចបានស្នើសភា និងរដ្ឋាភិបាលអូស្ត្រាលី បន្តគាំទ្រកម្ពុជាជាបន្តទៀត ជាពិសេសជួយជម្រុញវិនិយោគ និងទេសចរណ៍ពីអូស្ត្រាលីទៅកម្ពុជា និងជួយបណ្តុះបណ្តាលធនធានមនុស្សដល់កម្ពុជា និងបង្កើនចំនួនអាហារូបករណ៍ដល់និស្សិតកម្ពុជាមកសិក្សានៅអូស្ត្រាលី ពីព្រោះការអភិវឌ្ឍន៍នៅកម្ពុជាសព្វថ្ងៃ ត្រូវការធនធានមនុស្សជាចាំបាច់ ។
សម្តេចបានគោរពអញ្ជើញ លោកតូនី ស្មីត មកបំពេញទស្សនកិច្ចផ្លូវការនិងមិត្តភាពនៅកម្ពុជា និងចូលរួមកិច្ចប្រជុំភាពជាដៃគូសភាអាស៊ី-អ៊ឺរ៉ុប លើកទី១១ ដែលសភាកម្ពុជាធ្វើជាម្ចាស់ផ្ទះនៅចុងឆ្នាំ២០២០ខាងមុខនេះ ។ ជាការឆ្លើយតបលោកតូនី ស្មីត ប្រធានរដ្ឋសភាអូស្ត្រាលីបានទទួលយកសំណើ និងការលើកឡើងរបស់សម្តេចប្រធានរដ្ឋសភា ។ លោកមានក្តីរីករាយចំពោះចំណងមិត្តភាព និងកិច្ចសហប្រតិបត្តិការរវាងសភាប្រទេសទាំងពីរមានការរីកចម្រើនជាលំដាប់ ។
សូមជម្រាបថា នៅក្នុងកំឡុងពេលចូលរួមកិច្ចប្រជុំ APPF នាទីក្រុងកុងបេរ៉ា នេះសម្តេចប្រធានរដ្ឋសភា បានទទួលជួបពិភាក្សាការងារផ្លូវការ និងក្រៅផ្លូវការជាមួយប្រតិភូសភាដែលជាសមាជិក APPF និងអន្តរសភាអាស៊ានមួយចំនួនទៀតផងដែរ ក្នុងការពង្រឹងពង្រីកកិច្ចសហប្រតិបត្តិការរវាងសភាកម្ពុជា និងបណ្តាប្រទេសជាមិត្ត ៕
ចែករំលែកព័តមាននេះ