រាជធានីភ្នំពេញ ៖ ការប្រកួតប្រដាល់ជាលក្ខណៈអន្តរជាតិលើកទី២នៅលើរេញទូរទស្សន៍អាស៊ីអាគ្នេយ៍ កាលពីថ្ងៃទី២៤ មេសា បានទទួលការចាប់អារម្មណ៍យ៉ាងខ្លាំងពីសំណាក់អ្នកទស្សនា ដោយសារក្នុងចំណោមកីឡាករបរទេស៣រូប មាន២រូប បានក្លាយជាអ្នកសន្លប់ក្រោមដៃកីឡាករកម្ពុជាព្រមគ្នា បើទោះជាពួកគេទាំងពីរត្រូវគេអះអាងថា ជាជើងខ្លាំងនៅក្នុងប្រទេសថៃ និងខ្លាំងជាងកីឡាករបរទេសមួយរូបទៀត ដេលមានសំណាងឈ្នះកីឡាករកម្ពុជា ។
ចាត់ទុកថាជារឿងភ្ញាក់ផ្អើល ដែលកីឡាករជើងខ្លាំង២រូបរបស់ថៃ បានក្លាយជាអ្នកចាញ់ដោយសន្លប់ដូចគ្នា ក្នុងពេលដែលពួកគេត្រូវមន្ត្រីសហព័ន្ធកីឡាប្រដាល់របស់ប្រទេសថៃ ប្រាប់ថាជាជើងខ្លាំង និងល្បីឈ្មោះ នៅក្នុងប្រទេសនោះ និងមានតម្លៃខ្លួនខ្ពស់ជាងគេក្នុងចំណោមកីឡាករដែលនាំមកទាំង៣នាក់ សម្រាប់ការប្រកួតអន្តរជាតិនៅលើសង្វៀនទូរទស្សន៍អាស៊ីអាគ្នេយ៍លើកនេះ ។ អុីចឹងហើយ ទើបក្នុងពេលកីឡាករថៃទាំងពីរសន្លប់ក្រោមដៃកីឡាករកម្ពុជា ហាក់បានធ្វើឱ្យអ្នកទស្សនាភាគច្រើនកោតសរសើរពីកម្រិតវាយលុករបស់កីឡាករកម្ពុជា ។ ទោះបីយ៉ាងណា ក្នុងចំណោមកីឡាករថៃទាំងពីររូបដែលបានសន្លប់ ក៏ត្រូវគេមើលឃើញថា មានម្នាក់ជាជើងខ្លាំងប្រាកដមែន ដោយគ្រាន់តែគេភ្លាត់ស្នៀត ទើបបណ្តាលឱ្យសន្លប់បែបនេះ ។
កីឡាករ Peandin គឺជាកីឡាករថៃទី១ ដែលត្រូវកីឡាករ ផល សោភ័ណ្ឌ មកពីក្លិបតាឡីដំរីមានឫទ្ធិ វាយឱ្យសន្លប់ក្នុងទឹកទី៣ បើទោះគេជាកីឡាករដែលអ្នកទស្សនាមើលឃើញថា មានស្នៀតប្រដាល់ល្អ ពិសេសគឺកម្លាំងទាត់ឆ្វេងស្តាំ និងម៉ាត់ដែលកីឡាករកម្ពុជាពិបាកស៊ីដាច់នៅអំឡុងពេលដើមទឹក ។ យោងតាមប្រវត្តិជាក់ស្តែង កីឡាករ Peandin ធ្លាប់ប្រកួតបាន៥៥ដង ឈ្នះ៥០ដង និងចាញ់ត្រឹមតែ៥ដងប៉ុណ្ណោះ ខណៈដែលមុនមកប្រកួតនៅកម្ពុជា គេក៏ទើបដណ្តើមបានខ្សែក្រវាត់មួយនៅក្នុងប្រទេសថៃដែរ ។ យ៉ាងណាក៏ដោយកីឡាករ Peandin ក៏មានឱកាសវាយបកដោយកែង ម៉ាត់ និងទាត់ផុតៗក្បាល ដែលធ្វើឱ្យអ្នកគាំទ្រកីឡាករកម្ពុជា និងផល សោភ័ណ្ឌ ខ្លួនឯង ទ័លច្រកម្តងៗ ។ ក្រុមអ្នកទស្សនាសុទ្ធតែមើលឃើញថា បើកាលនោះ កីឡាករ Peandin មិនភ្លាត់ស្នៀតឱ្យកីឡាករកម្ពុជាវាយបុកចូលច្រើន ប្រហែលជាសំណាងអាក្រក់មិនកើតឡើងចំពោះគេឡើយ ។ អុីចឹងហើយ ទើបឱកាសវាយឱ្យកីឡាករថៃសន្លប់ក្នុងទឹកទី៣ របស់ ផល សោភ័ណ្ឌ ធ្វើឱ្យអ្នកទស្សនាភាគច្រើនផ្តោតការអបអរ និងចាត់ទុកថាជាសំណាងធំរបស់កីឡាករកម្ពុជា ។
មួួយគូទៀត កីឡាករថៃ Yudkunkrai (យុទ្ធគុនក្រៃ) ដែលគ្រាន់តែឈ្មោះរបស់គេ ក៏មានន័យគួរឱ្យញាក់សាច់ផងដែរជាភាសាខ្មែរ ប៉ុន្តែគេបែរជាមកសន្លប់តែមួយប៉ប្រិចភ្នែកប៉ុណ្ណោះ ក្រោមដៃកីឡាករ វ៉ន វីវ៉ា មកពីក្លិបកងរាជអាវុធហត្ថលើផ្ទៃប្រទេសក្នុងទឹកទី១ ។ កីឡាករថៃរូបនេះ បើយោងតាមប្រវត្តិ ធ្លាប់ប្រកួតបាន៦៩ដង ឈ្នះ៦៣ដង ចាញ់តែ៣ដង និងកំពុងក្លាយខ្លួនជាកីឡាករជួរមុខម្នាក់ផងដែរនៅក្នុងពិភពប្រដាល់ថៃ ។ កីឡាករថៃរូបនេះ ត្រូវគេស្គាល់គួរសម សម្រាប់អ្នកនិយមទស្សនាការប្រដាល់ដែលបានធ្វើឡើងនៅក្នុងប្រទេសថៃ ដោយមានទាំងការអះអាងថា គេមានប្រវត្តិផ្តួលកីឡាករបរទេសនៅក្នុងសង្វៀនថៃ និងជើងខ្លាំងនៅក្នុងប្រទេសថៃគ្នាឯងឱ្យបរាជ័យគួរឱ្យសរសើរទៀតផង នាពេលកន្លងមក ។ ប៉ុន្តែគួរឱ្យស្តាយ កីឡាករថៃរូបនេះ គឺមិនទាន់បានបញ្ចេញថ្វីដៃណាមួយធ្វើឱ្យគេមើលឃើញពីភាពខ្លាំងដូចការអះអាងផង ស្រាប់តែត្រូវដួលភីងនៅដើមទឹកទី១ ដោយគ្រាន់តែកីឡាករ វ៉ន វីវ៉ា របស់កម្ពុជា ម៉ាត់ត្រូវប៉ុន្មានដៃ ។ ទោះយ៉ាងណា ក៏មានន័យថា កីឡាកររបស់កម្ពុជាមានសមត្ថភាពខ្ពស់ ដែលពិបាកឱ្យជើងខ្លាំងថៃរូបនេះ ទៅរួចផង ដែរ ។
ដោយឡែក កីឡាករ មុឺន សុភា មកពីសមាគមកីឡាប្រដាល់ក្រសួងការពារជាតិបែរជាទទួលបរាជ័យដោយពិន្ទុក្រោមកណ្តាប់ដៃកីឡាករបារាំង Abdal ដែលត្រូវគេអះអាងថា មិនសូវខ្លាំង ទៅវិញ ។ អីុចឹងហើយ ទើបទស្សនិកជនភ្ញាក់ផ្អើល និងលាន់មាត់ស្ទើរគ្រប់គ្នាថា មិនគួរឡើយ ម៉ឺន សុភា ភ្លាត់ឱ្យចាញ់កីឡាករបារាំងរូបនេះសោះ ៕
ចែករំលែកព័តមាននេះ