ប្រភពព័ត៌មានបរទេសផ្សាយថា ក្នុងរយៈពេល៣ខែដំបូងនៃឆ្នាំ២០១៤នេះ បណ្តាញព័ត៌មានសង្គមហ្វេសប៊ុក (Facebook) ទទួលបានប្រាក់ចំណេញមួយគុណជាបីស្មើនឹង៦៤២លានដុល្លារកើនឡើង៧២% នៃចំណូលរបស់ខ្លួន ដែលសម្រេចបានដោយការកើនឡើងនៅក្នុងការឃោសនាពាណិជ្ជកម្មទូរស័ព្ទចល័ត និងប្រើប្រាស់ទូរស័ព្ទ ។
ក្រុមហ៊ុន Facebook បានថ្លែងកាលពីថ្ងៃពុធថា ប្រាក់ចំណូលដែលទទួលបានពីការឃោសនាផ្សាយពាណិជ្ជកម្មកើនឡើង៨២%ស្មើនឹង២,២៧ពាន់លានដុល្លាររយៈពេលមួយឆ្នាំមកហើយ ។ ក្នុងនោះចំណូលដែលទទួលបានមកពីការផ្សព្វផ្សាយពាណិជ្ជកម្មនៃទូរស័ព្ទចល័តមានចំនួន៥៩%នៃប្រាក់ចំណូលសរុប ។ លោក Mark Zuckerberg នាយកប្រតិបត្តិរបស់ក្រុមហ៊ុនហ្វេសប៊ុកបានលើកឡើងថា អ្នកប្រើប្រាស់ហ្វេសប៊ុកបានបន្តកើនឡើងថែមទាំងប្តូរពីការប្រើប្រាស់តាមប្រព័ន្ធកុំព្យូរទ័រមកប្រើប្រាស់តាមបណ្តាញទូរស័ព្ទចល័តដែលជាការគូសបញ្ជាក់ឱ្យឃើញពីសេចក្តីត្រូវការសម្រាប់ក្រុមហ៊ុនដើម្បីបង្កើនប្រាក់ចំណូលរបស់ខ្លួន ។
អ្នកប្រើប្រាស់ហ្វេសប៊ុកយា៉ងសកម្មប្រចាំថ្ងៃសរុបកើនឡើង២១%ក្នុងរយៈពេលមួយឆ្នាំមកហើយ ស្មើនឹង៨០២លាននាក់ ក្នុងនោះអ្នកប្រើប្រាស់តាមទូរស័ព្ទចល័តមាន៦០៩លាននាក់ កើនឡើង៤៣%ពីមួយឆ្នាំទៅមួយឆ្នាំ ។ រីឯបរិមាណនៃអ្នកប្រើប្រាស់សកម្មប្រចាំខែកើនឡើង១,២៨ពាន់លាននាក់ ក្នុងនោះ១ពាន់លាននាក់ប្រើតាមទូរស័ព្ទចល័ត ៕
ចែករំលែកព័តមាននេះ