រាជធានីភ្នំពេញ ៖ កាលពីព្រឹកថ្ងៃទី២៣ មេសា នៅទីស្នាក់ការគណៈកម្មាធិការជាតិអូឡាំពិកកម្ពុជា (NOCC) មានរៀបចំសន្និសីទសារព័ត៌មានស្តីពី «ឧស្សាហកម្មកីឡាគណៈកម្មាធិការជាតិអូឡាំពិកកម្ពុជា» ដោយមានការចុះហត្ថលេខាលើអនុស្សរណៈយោគយល់ (MOU) រវាងគណៈកម្មាធិការជាតិអូឡាំពិកកម្ពុជា និងក្រុមហ៊ុន ATTWOOD Co., Ltd លើផលិតផលទឹកបរិសុទ្ធណាវី ស្តីពីកិច្ចសហការផ្តល់ស្លាកសញ្ញា (Co-branding) របស់គណៈកម្មាធិការជាតិអូឡាំពិកកម្ពុជាដល់ផលិតផលទឹកបរិសុទ្ធណាវី ។
ពិធីនេះធ្វើឡើងក្រោមអធិបតីភាពលោកវ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា និងជាអនុរដ្ឋលេខាធិការក្រសួងទេសចរណ៍ និងលោកតាន់ សៃឆាយ ប្រធានផ្នែកលក់ និងទីផ្សារតំណាងក្រុមហ៊ុន ATTWOOD Co., Ltd ដោយមានការចូលរួមពីមន្ត្រីពាក់ព័ន្ធ និងអ្នកសារព័ត៌មានជាច្រើននាក់។ លោកវ៉ាត់ ចំរើន មានប្រសាសន៍ថា នេះជាលើកទី១ ហើយដែលយើងបានធ្វើឧស្សាហកម្មកីឡា និងកិច្ចសហប្រតិបត្តិការជាមួយទឹកបរិសុទ្ធណាវី ដែលជាផ្នែកមួយក្នុងវិស័យកីឡាត្រូវការ ព្រោះយើងដឹងហើយថា ទឹកគឺសំខាន់ខ្លាំងណាស់ចំពោះអ្នកហាត់កីឡា ព្រមទាំងអ្នកធម្មតាដែលត្រូវការទឹកយ៉ាងចាំបាច់៧០ភាគរយក្នុងខ្លួន ។ លោកបានបន្តថា ក្នុងរយៈពេល៤ឆ្នាំទៅមុខទៀត យើងនឹងខិតខំស្វែងរកដៃគូសហការឧបត្ថម្ភផ្សេងៗទៀតឱ្យបានច្រើនដើម្បីផលិតវត្ថុអនុស្សាវរីយ៍ត្រៀមដាក់លក់ក្នុងពេលដែលប្រទេសកម្ពុជាត្រូវរៀបចំធ្វើជាម្ចាស់ផ្ទះកីឡាស៊ីហ្គេមលើកទី៣២ នាឆ្នាំ២០២៣ ផងដែរ ។
លោកតាន់ សៃឆាយ ប្រធានទីផ្សារក្រុមហ៊ុន ATTWOOD Co., Ltd បានឱ្យដឹងថា លោកមានចិត្តសប្បាយរីករាយដែលបានចូលរួមគាំទ្រឧបត្ថម្ភដល់កីឡាជាតិរបស់យើង ។ មួយវិញទៀត បើសិនជាកីឡាករជាតិយើងដណ្តើមបានជ័យជម្នះ ឬជោគជ័យលើឆាកអន្តរជាតិនោះវាមិនមែនទទួលបានត្រឹមលក្ខណៈបុគ្គលនោះទេ តែគឺជាមោទនភាពជាតិទាំងមូលដែលកីឡាធ្វើឱ្យប្រទេសកម្ពុជាមានភាពល្បីល្បាញក្នុងពិភពលោក ។
សូមបញ្ជាក់ថា ការចុះហត្ថលេខាលើអនុស្សរណៈយោគយល់គ្នាខាងលើនេះ គឺមានរយៈពេល១ឆ្នាំដើម្បីធ្វើកិច្ចសហប្រតិបត្តិការ និងទំនាក់ទំនងល្អជាមួយគ្នាបន្តទៀត ប្រសិនបើទទួលជោគជ័យ ។ ម្យ៉ាងវិញទៀត បន្ទាប់ពី NOCC ប្រគល់ LOGO របស់ខ្លួនដាក់លើសម្បកដបទឹកបរិសុទ្ធណាវីរួចរាល់ហើយ ដូច្នេះរាល់ផលិតផលដែលលក់បាន គឺត្រូវផ្តល់មូលនិធិជូន NOCC ចំនួន៤០០រៀលក្នុង១កេសវិញសម្រាប់អភិវឌ្ឍវិស័យកីឡានៅក្នុងប្រទេសកម្ពុជា ៕
ចែករំលែកព័តមាននេះ