ខេត្តសៀមរាប ៖ ការប្រកួតកីឡាអុកចត្រង្គអបអរសាទរព្រឹត្តិការណ៍អង្គរសង្ក្រាន្ត ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ដែលរៀបចំឡើងក្រោមកិច្ចសហការរវាងគណៈកម្មាធិការជាតិអូឡាំពិកកម្ពុជា និងសហភាពសហព័ន្ធយុវជនកម្ពុជា ដែលមានរយៈពេល៣ថ្ងៃដោយចាប់ផ្តើមពីថ្ងៃទី១៤ មេសាមកនោះ បានបញ្ចប់ជាស្ថាពរហើយកាលពីព្រឹកថ្ងៃទី១៦ មេសា ដោយបានរកឃើញម្ចាស់ជើងឯកប្រចាំឆ្នាំ២០១៤
ខេត្តសៀមរាប ៖ ការប្រកួតកីឡាអុកចត្រង្គអបអរសាទរព្រឹត្តិការណ៍អង្គរសង្ក្រាន្ត ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ដែលរៀបចំឡើងក្រោមកិច្ចសហការរវាងគណៈកម្មាធិការជាតិអូឡាំពិកកម្ពុជា និងសហភាពសហព័ន្ធយុវជនកម្ពុជា ដែលមានរយៈពេល៣ថ្ងៃដោយចាប់ផ្តើមពីថ្ងៃទី១៤ មេសាមកនោះ បានបញ្ចប់ជាស្ថាពរហើយកាលពីព្រឹកថ្ងៃទី១៦ មេសា ដោយបានរកឃើញម្ចាស់ជើងឯកប្រចាំឆ្នាំ២០១៤ បន្ទាប់ពីចម្រាញ់យកអ្នកដែលមានសមត្ថភាពចំនួន៨នាក់មកប្រកួតប្រជែងនៅមុខប្រាសាទអង្គរ ក្នុងចំណោមកីឡាករចំនួន៦៤នាក់មកពីទូទាំងប្រទេសរួចមក ។
ការប្រកួតវគ្គផ្តាច់ព្រ័ត្រនាពេលនោះធ្វើឡើងក្រោមវត្តមានចូលរួមជាគណៈអធិបតីពីលោកថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា, លោកសាយ សំអាល់ រដ្ឋមន្ត្រីក្រសួងបរិស្ថាន, លោកហ៊ុន ម៉ានី ប្រធានសហភាពសហព័ន្ធយុវជនកម្ពុជា, លោកឃឹម ប៊ុនសុង អភិបាលខេត្តសៀមរាប និងលោកវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា ព្រមទាំងមន្ត្រីពាក់ព័ន្ធ កីឡាករ និងប្រជាពលរដ្ឋយ៉ាងច្រើនកុះករ ។
អ្វីដែលធ្វើឱ្យគេចាប់អារម្មណ៍បំផុតនោះ គឺកីឡាករដែលចូលរួមប្រកួតស្លៀកពាក់តុបតែងដូចជាស្តេចសម័យអង្គរ ហើយធ្វើការប្រកួតសាកល្បងជាមួយនឹងអុកយក្សដែលផលិតឡើងដោយសហភាពសហព័ន្ធយុវជនកម្ពុជា ដែលការប្រកួតនោះកីឡាករគ្រួច ចន្ថារិទ្ធ បានយកឈ្នះកីឡាករឈៀវ បូរ៉ា ។ បុ៉ន្តែសម្រាប់ការប្រកួតពិតប្រាកដ គឺកីឡាករឈាវ បូរ៉ា ដែលមានអាយុទើបតែ២៤ឆ្នាំមកពីខេត្តកំពង់ចាមទៅវិញទេដែលជាអ្នកឈ្នះកីឡាករគ្រួច ចន្ថារិទ្ធ អាយុ៤៧ឆ្នាំ មកពីខេត្តស្វាយរៀងទាំងពីរក្តារជាមួយនឹងសមត្ថភាពប្រើប្រាស់ថិរវេលាតិចជាង ដោយប្រើពេលគិតតែ៣នាទីបុ៉ណ្ណោះក្នុងខណៈដែលកីឡាករគ្រួច ចន្ថារិទ្ធ ប្រើពេលគិតដល់ទៅ៥នាទីសម្រាប់ម៉ោងប្រកួតដែលមាន៦០នាទីនោះ។
ដោយឡែក ចំណាត់ថ្នាក់លេខ៣ គឺបានទៅលើកីឡាករសូ សំភី មកពីរាជធានីភ្នំពេញ បន្ទាប់ពីប្រកួតឈ្នះកីឡាករកែវ វឌ្ឍនា មកពីរាជធានីភ្នំពេញដូចគ្នា ។ សម្រាប់ជ័យលាភីចំណាត់ថ្នាក់លេខ១ ក្នុងព្រឹត្តិការណ៍នេះទទួលបានប្រាក់រង្វាន់ពីសម្តេចតេជោ ហ៊ុន សែន ចំនួន៣.០០០ដុល្លារ, ពីលោករដ្ឋមន្ត្រី ថោង ខុន ៤០០ដុល្លារ, ពីលោកអភិបាលខេត្តសៀមរាប៤០០ដុល្លារ និងពីក្រុមហ៊ុនស្រាបៀរអង្គរចំនួន១.០០០ដុល្លារ សរុបទាំងអស់៤.៨០០ដុល្លារ ។ ចំណាត់ថ្នាក់លេខ២ ទទួលបានប្រាក់រង្វាន់ពីសម្តេចតេជោ ហ៊ុន សែន ចំនួន២.០០០ដុល្លារ, ពីលោករដ្ឋមន្ត្រីថោង ខុន ៣០០ដុល្លារ, ពីលោកអភិបាលខេត្តសៀមរាប ៣០០ដុល្លារ និងពីក្រុមហ៊ុនស្រាបៀរអង្គរចំនួន៧០០ដុល្លារ សរុប៣.៣០០ដុល្លារ ។
ចំណាត់ថ្នាក់លេខ៣ ទទួលបានប្រាក់រង្វាន់ពីសម្តេចតេជោ ហ៊ុន សែន ចំនួន១.០០០ដុល្លារ, ពីលោករដ្ឋមន្ត្រី ថោង ខុន ២០០ដុល្លារ, ពីលោកអភិបាលខេត្តសៀមរាប ២០០ដុល្លារ និងពីក្រុមហ៊ុនស្រាបៀរអង្គរចំនួន៤០០ដុល្លារ សរុប១.៨០០ដុល្លារ និងចំណាត់ថ្នាក់លេខ៤ ទទួលបានប្រាក់រង្វាន់ពីសម្តេចតេជោ ហ៊ុន សែន ១.០០០ដុល្លារ, ពីលោករដ្ឋមន្ត្រី ថោង ខុន ១០០ដុល្លារ, ពីលោកអភិបាលខេត្តសៀមរាប ១០០ដុល្លារ និងពីក្រុមហ៊ុនស្រាបៀរអង្គរចំនួន២០០ដុល្លារ សរុប១.៤០០ដុល្លារ ៕
ចែករំលែកព័តមាននេះ