រាជធានីភ្នំពេញ ៖ នៅលើសង្វៀនទូរទស្សន៍បាយ័នថ្មីដែលជាអតីតសាលមហោស្រពទន្លេបាសាក់ទល់មុខមន្ទីររដ្ឋសភាថ្មី នាល្ងាចថ្ងៃសៅរ៍ ទី១២ មេសា ឆ្នាំ២០១៤ នេះ នឹងមានបើកឆាកការប្រកួតប្រដាល់ជាលើកដំបូងរវាងកីឡាករកម្ពុជា៤រូប និងកីឡាករថៃ៤រូប ។ ទោះយ៉ាងណា មានតែកីឡាករកម្ពុជា៣រូបបុ៉ណ្ណោះដែលត្រូវគេចោទជាសំណួរថា តើអ្នកណាខ្លះវាយឈ្នះជើងខ្លាំងមកពីប្រទេសថៃ ។
កីឡាករកម្ពុជាដែលត្រូវគេរំពឹងថា នឹងឈ្នះកីឡាករថៃទាំង៣រូបនោះរួមមានកីឡាករវ៉ន វីវ៉ា មកពីក្លិបព្រះខ័នរាជ, កីឡាករឯម វុត្ថា និងកីឡាករឯម វិចិត្រ មកពីក្លិបឫទ្ធិពោធិ៍សែនជ័យ។ ទោះយ៉ាងណា កីឡាករម៉ន រដ្ឋា មកពីក្លិបព្រែកឯងកីឡា ក៏ត្រូវគេផ្តោតការចាប់អារម្មណ៍ផងដែរ បើទោះជាការស្ទាបស្ទង់ហាក់មានកម្រិតតិចជាងកីឡាករជើងខ្លាំងទាំង៣ ដែលបានរៀបរាប់ខាងលើនោះក៏ដោយ ។ ពួកគេទាំង៤នាក់នឹងប៉ះកណ្តាប់ដៃជាមួយកីឡាករថៃដូចគ្នាក្នុងបុ៉ន្មានម៉ោងខាងមុខនេះ ដើម្បីបើកឆាកសង្វៀនថ្មីរបស់ទូរទស្សន៍បាយ័ន ដែលប្រកាសបើកការប្រដាល់ចំនួនមួយសង្វៀនថ្មីទៀតអបអរសាទរបុណ្យចូលឆ្នាំខ្មែរ ។ ការប្រកួតទាំងមូលនឹងចាប់ផ្តើមឡើងនៅវេលាម៉ោង១រសៀល ដោយគ្រោងបញ្ចប់នៅវេលាម៉ោង៣រសៀល ។
កីឡាករវ៉ន វីវ៉ា នឹងប៉ះជាមួយកីឡាករថៃ Bugio Kiatchoochai ក្នុងប្រភេទទម្ងន់៧៥គីឡូក្រាម ខណៈដែលវ៉ន វីវ៉ា ខានឡើងប្រកួតប្រមាណជាងមួយឆ្នាំមកហើយ ដោយការប្រកួតលើកចុងក្រោយរបស់គេបានឈ្នះកីឡាករកូឡុំប៊ីដោយពិន្ទុនៅសង្វៀនខេត្តសៀមរាប កាលពីថ្ងៃទី២០ មីនា ឆ្នាំ២០១៣ ។ វ៉ន វីវ៉ា ធ្លាប់ប្រកួតបានជាង១០០ដង បុ៉ន្តែបានដាក់នៅក្នុងការប្រកួតនេះត្រឹម៤៣ដង ឈ្នះ៣៩ដង ចាញ់៣ដង និងស្មើ១ដង ។ ចំណែកកីឡាករថៃប្រកួតបាន១២៣ដង ឈ្នះ១០៥ដង ចាញ់១៥ដង និងស្មើ៣ដង ។
កីឡាករឯម វុត្ថា ប៉ះជាមួយកីឡាករ Kamlaphet Sornsamnak ក្នុងប្រភេទទម្ងន់៦៥គីឡូក្រាម ដោយកីឡាករទាំងពីររូបនេះសុទ្ធតែមានប្រវត្តិ និងបទពិសោធន៍ប្រកួតខ្លាំងក្លាដូចគ្នា ។ Kamlaphet Sornsamnak ធ្លាប់ប្រកួតបាន១០៥ដង ឈ្នះ៨៣ដង ចាញ់២០ដង និងស្មើ២ដង ។ ដោយឡែក កីឡាករឯម វុត្ថា ធ្លាប់ប្រកួតបាន១២៥ដង ឈ្នះ៩៨ដង ចាញ់២៤ដង និងស្មើ៣ដង ។ ឯម វិចិត្រ ដែលជាសិស្សច្បងរបស់ ឯម វុត្ថា ប៉ះជាមួយកីឡាករថៃ Pichtichai Rongrian Kirakovad ក្នុងប្រភេទទម្ងន់៦០គីឡូក្រាម ។ នេះជាលើកទី២ ហើយសម្រាប់ ឯម វិចិត្រ ប្រកួតជាមួយកីឡាករថៃ ដែលធ្លាប់ប្រកួតបាន៦៥ដង ឈ្នះ៤៥ដង ចាញ់១៥ដង និងស្មើ៥ដង ខណៈដែលរូបគេធ្លាប់ប្រកួតបាន៨៩ដង ឈ្នះ៧៦ដង ចាញ់១០ដង និងស្មើ៣ដង។
ចំពោះកីឡាករម៉ន រដ្ឋា ត្រូវប៉ះជាមួយកីឡាករថៃ Khanthed Rongriankee Rokorad ក្នុងប្រភេទទម្ងន់៥៤គីឡូក្រាម ។ នេះជាលើកទី១ ហើយដែល ម៉ន រដ្ឋា ជួបប្រកួតជាមួយកីឡាករបរទេសនោះ ។ កីឡាករថៃ Khanthed Rongriankee Rakorad ធ្លាប់ប្រកួតបាន៧៤ដង ឈ្នះ៤៥ដង ចាញ់១៤ដង និងស្មើ១៥ដង ខណៈដែលម៉ន រដ្ឋា ធ្លាប់ប្រកួតបាន៤០ដង ឈ្នះ៣០ដង និងចាញ់១០ដង ។
ជាមួយនឹងការប៉ះគ្នា សំណួរមួយកំពុងចោទសួរថា តើក្នុងចំណោមកីឡាករខ្មែរទាំង៤រូប អ្នកណាខ្លះបញ្ចប់ដោយភាពជោគជ័យលើកីឡាករថៃនារសៀលថ្ងៃនេះ ខណៈដែលកីឡាករវ៉ន វីវ៉ា, ឯម វុត្ថា និងឯម វិចិត្រ ត្រូវគេព្យាករណ៍ថា នឹងឈ្នះកីឡាករថៃច្រើនជាងដោយសារតែភាពល្បីល្បាញរបស់ពួកគេ ៕
ចែករំលែកព័តមាននេះ