រាជធានីភ្នំពេញ ៖ ការប្រកួតជម្រុះកីឡាអុកចត្រង្គដំណាក់កាលទី១ ដើម្បីជ្រើសរើសយកបេក្ខជនជើងខ្លាំងចំនួន៨រូបទៅប្រកួតអបអរសាទរព្រឹត្តិការណ៍អង្គរសង្ក្រាន្តក្នុងឱកាសបុណ្យចូលឆ្នាំថ្មីប្រពៃណីជាតិនាពេលខាងមុខនេះ បានរកឃើញហើយ ក្នុងនោះមានកីឡាករក្រូច ចន្ថារិទ្ធ, សំរិទ្ធ សៀ, ចាន់ ប្រាថ្នា, កែវ វឌ្ឍនា, ឈាវ បូរ៉ា, សេង ចាន់, សូ សំភី និងកីឡាករប៉ាវ សុខណា ។
ការប្រកួតជម្រុះដំណាក់កាលទី១ នេះ គឺប្រើរយៈពេល២ថ្ងៃចាប់ពីថ្ងៃទី៨ រហូតដល់ថ្ងៃទី៩ ខែមេសា ឆ្នាំ២០១៤ នៅក្នុងទីស្នាក់ការគណៈកម្មាធិការជាតិអូឡាំពិកកម្ពុជា ដោយមានកីឡាករចូលរួមសរុបចំនួន៦៤នាក់ ។ លោកវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានមានប្រសាសន៍ថា ចំពោះកីឡាករជើងខ្លាំងទាំង៨នាក់ដែលឆ្លងផុតដំណាក់កាលទី១ ត្រូវត្រៀមខ្លួនប្រកួតវគ្គផ្តាច់ព្រ័ត្រនៅមុខប្រាសាទអង្គរវត្តរយៈពេល៣ថ្ងៃ ចាប់ពីថ្ងៃទី១៤ រហូតដល់ថ្ងៃទី១៦ ខែមេសា ឆ្នាំ២០១៤ ដើម្បីអបអរសាទរព្រឹត្តិការណ៍អង្គរសង្ក្រាន្តក្នុងឱកាសបុណ្យចូលឆ្នាំថ្មីប្រពៃណីជាតិនាពេលខាងមុខ ។ លោកបន្តទៀតថា ក្រោយពីចប់ការប្រកួតកីឡាអុកចត្រង្គលើកនេះ នៅដើមឆ្នាំក្រោយយើងនឹងមានរៀបចំការប្រកួតដណ្តើមពានរង្វាន់សម្តេចតេជោ ហ៊ុន សែន ប្រចាំឆ្នាំតែម្តង ហើយគណៈកម្មាធិការជាតិអូឡាំពិកកម្ពុជា ក៏កំពុងសម្រេចដាក់វិញ្ញាសាកីឡាអុកចត្រង្គនេះចូលក្នុងព្រឹត្តិការណ៍កីឡា SEA Games លើកទី៣២ នាឆ្នាំ២០២៣ ផងដែរ ។
ចំពោះប្រាក់រង្វាន់ដែលត្រូវប្រគល់ជូនដល់ជ័យលាភីឆ្នាំនេះ ចំណាត់ថ្នាក់លេខ១ ទទួលបាន១.០០០ដុល្លារ, លេខ២ បាន៧០០ដុល្លារ, លេខ៣ បាន៤០០ដុល្លារ និងលេខ៤ បាន២០០ដុល្លារ ។ គួរបញ្ជាក់ផងដែរថា គូប្រកួតដែលធ្វើឱ្យមានការចាប់អារម្មណ៍ និងភ្ញាក់ផ្អើលជាងគេក្នុងការប្រកួតនាពេលនោះ គឺជាការប្រកួតរវាងលោកឆយ វីរ៉ា ជើងឯកពានរង្វាន់សម្តេចតេជោ ហ៊ុន សែន ឆ្នាំ២០១០ និងលោកសុខ ភារ៉ា ជាជើងឯករង ហើយជាលទ្ធផលកីឡាករជើងឯកត្រូវបានកីឡាកររងជើងឯកបំបាក់ក្នុងជុំទី១ ។ មិនត្រឹមតែបុ៉ណ្ណោះ ការប្រកួតបន្តត្រឹមជុំទី៣ កីឡាករពីលេខ១ ដល់លេខ៤ បានបាត់បង់ឱកាសឡើងទៅប្រកួតវគ្គបន្ត បន្ទាប់ពីធ្លាក់ត្រឹមវគ្គជម្រុះដំណាក់កាលទី១ នោះ ។
សូមរំលឹកថា ល្បែងអុកចត្រង្គ ឬចត្រង្គ គឺជាព្រលឹងវប្បធម៌ជាតិមួយរបស់ខ្មែរដែលគេពេញនិយមលេងតាំងពីសម័យអង្គរមកម៉្លេះ ហើយកីឡាអុក ឬចត្រង្គ គឺជាល្បែងកីឡាល្បងប្រាជ្ញាមួយប្រភេទដែលត្រូវប្រើប្រាស់យុទ្ធសាស្ត្រ, វិធីសាស្ត្រ និងបទពិសោធន៍ខ្ពស់ក្នុងការរៀបចំក្បួន បញ្ជា ទប់ទល់ វាយប្រហារ ជាពិសេសគឺចេះពីរបៀបគ្រប់គ្រងដឹកនាំវាយលុក ឬដកថយតាមក្បួនយុទ្ធសាស្ត្រ ។ បុ៉ន្តែយុទ្ធសាស្ត្រ និងវិធីសាស្ត្រដើម្បីលេងកីឡាអុកចត្រង្គ គឺអាស្រ័យលើស្ថានភាពជាក់ស្តែង និងកាលៈទេសៈពិតប្រាកដក្នុងសមរភូមិប្រយុទ្ធដោយមិនប្រើក្បួន ឬយុទ្ធសាស្ត្របម្រុងទុកបានឡើយ ។ ចំណុចពិសេសក្នុងល្បែងអុក ឬចត្រង្គ គឺភាពបុិនប្រសប់នៃការបញ្ឆោតគូបដិបក្ខឱ្យចូលក្នុងយុទ្ធសាស្ត្រ ឬក្នុងក្បួនដើម្បីសម្លាប់ ៕
ចែករំលែកព័តមាននេះ