ចំនួនប្រជាជននៅលើពិភពលោកនឹងឡើងដល់៧,២ពាន់លាននាក់នៅខែក្រោយ ហើយនឹងឡើងដល់១០,៩ពាន់លាននាក់ក្នុងឆ្នាំ២១០០ ។ កំណើនភាគច្រើនកើតចេញពីអត្រាកំណើតខ្ពស់នៅក្នុងប្រទេសកំពុងអភិវឌ្ឍន៍ ។ នេះបើយោងតាមអង្គការសហប្រជាជាតិឲ្យដឹងកាលពីថ្ងៃព្រហស្បតិ៍ទី១៣ មិថុនា ២០១៣ ។
ចំនួនប្រជាជននៅលើពិភពលោកនឹងឡើងដល់៧,២ពាន់លាននាក់នៅខែក្រោយ ហើយនឹងឡើងដល់១០,៩ពាន់លាននាក់ក្នុងឆ្នាំ២១០០ ។ កំណើនភាគច្រើនកើតចេញពីអត្រាកំណើតខ្ពស់នៅក្នុងប្រទេសកំពុងអភិវឌ្ឍន៍ ។ នេះបើយោងតាមអង្គការសហប្រជាជាតិឲ្យដឹងកាលពីថ្ងៃព្រហស្បតិ៍ទី១៣ មិថុនា ២០១៣ ។
យោងតាមរបាយការណ៍ថ្មីបំផុតរបស់អង្គការសហប្រជាជាតិមានចំណងជើងថា «ទស្សនៈវិស័យចំនួនប្រជាជនពិភពលោក» បង្ហាញថា ចំនួនប្រជាជនដែលតាំងទីលំនៅនៅលើផែនដីនៅដើមសតវត្សក្រោយអាចឡើងដល់១៦,៦ពាន់លាននាក់ ។
UN និយាយថា នៅក្នុងករណីទាំងពីរ ចំនួនប្រជាជននៅក្នុងតំបន់ក្រីក្របំផុតលើពិភពលោកត្រូវបានគេប្រមើលមើលថា នឹងកើនឡើងយ៉ាងឆាប់រហ័ស ។
ចំណែកចំនួនប្រជាជនដែលតាំងទីលំនៅនៅក្នុងប្រទេសអភិវឌ្ឍន៍តិចតួចបំផុតត្រូវបានគេរំពឹងថា នឹងកើនទ្វេដង ពី៨៩៨លាននាក់នៅក្នុងឆ្នាំនេះទៅ១,៨ពាន់លាននាក់នៅក្នុងឆ្នាំ២០៥០ ។ ចំនួននេះនឹងកើនឡើងដល់២,៩ពាន់លាននាក់ក្នុងឆ្នាំ២១០០ ។
លោក Wu Hongbo អគ្គលេខាធិការរងអង្គការសហប្រជាជាតិទទួលបន្ទុកសេដ្ឋកិច្ច និងសង្គមកិច្ចនិយាយនៅក្នុងរបាយការណ៍ថា បើទោះបីជាកំណើនប្រជាជនបានធ្លាក់ចុះសម្រាប់ពិភពលោកទាំងមូលក៏ដោយ ក៏របាយការណ៍នេះបានរំលឹកយើងថា ប្រទេសកំពុងអភិវឌ្ឍន៍មួយចំនួន ជាពិសេសនៅអាហ្វ្រិកគឺនៅតែកើនឡើងយ៉ាងលឿន។
ផ្ទុយទៅវិញ ចំនួនប្រជាជននៅក្នុងប្រទេសអភិវឌ្ឍន៍ត្រូវបានគេរំពឹងថា នឹងនៅតែមិនមានការប្រែប្រួលជាដុំកំភួនដដែល ពោលគឺកើនពី១,២៥ពាន់លាននាក់ក្នុងឆ្នាំនេះ ទៅ១,២៨ពាន់លាននាក់ក្នុងឆ្នាំ២១០០ ។របាយការណ៍ដដែលបានឲ្យដឹងថា ចំនួនប្រជាជនដែលរស់នៅក្នុងប្រទេសអភិវឌ្ឍន៍នឹងធ្លាក់ចុះ ប្រសិនបើមិនមានជនអន្តោប្រវេសន៍ពីប្រទេសអ្នកក្រ ដែលត្រូវបានគេព្យាករថា នឹងមានប្រជាជនជាមធ្យម២,៤លាននាក់ក្នុងមួយឆ្នាំ ចាប់ពីឆ្នាំ២០១៣ ទៅឆ្នាំ២០៥០ ។
កំណើនប្រជាជនភាគច្រើននៅលើពិភពលោកចន្លោះឆ្នាំ២០១៣ និងឆ្នាំ២០៥០ ដែលគេរំពឹងថា នឹងកើនឡើងដល់៩,៦ពាន់លាននាក់ នឹងកើតមានឡើងនៅទ្វីបអាហ្វ្រិក ។របាយការណ៍និយាយថា ពាក់កណ្តាលនៃកំណើនប្រជាជនចន្លោះឆ្នាំ២០១៣ និងឆ្នាំ២១០០ ត្រូវបានគេរំពឹងថា នឹងប្រមូលផ្តុំនៅក្នុងប្រទេសតែ៨ប៉ុណ្ណោះ ដូចជា ប្រទេសនីហ្សេរីយ៉ា ឥណ្ឌា តង់សានី សាធារណរដ្ឋប្រជាធិបតេយ្យកុងហ្គោ នីហ្សេ អ៊ូហ្គង់ដា អេត្យូពី និងអាមេរិក ។
នៅក្នុងផ្នែកជាច្រើនដែលមានការអភិវឌ្ឍលើពិភពលោក ប្រជាជន២៣%មានអាយុ៦០ឆ្នាំ ឬលើសពីនេះ ។ ភាគរយនៃប្រជាជនទាំងនេះត្រូវបានគេប៉ាន់ស្មានថា កើនឡើងដល់៣២%ក្នុងឆ្នាំ២០៥០ ហើយ៣៤%ក្នុងឆ្នាំ២១០០ ។ចំនួនប្រជាជនដែលមានអាយុយ៉ាងហោច៨០ឆ្នាំ ត្រូវបានគេប៉ាន់ស្មានថា នឹងកើនឡើង៧ដងដល់៨៣០លាននាក់នៅដើមសតវត្សក្រោយ ហើយក្នុងឆ្នាំ២០៥០កើនឡើងដល់៣៩២លាននាក់។
យោងតាមរបាយការណ៍ដដែលឲ្យដឹងថា ប្រទេសដែលមានអត្រាសាយកូនទាបធំបំផុតគឺ ប្រទេសចិន អាមេរិក ប្រស៊ីល រុស្ស៊ី ជប៉ុន និងវៀតណាម ។ ដោយឡែកនៅក្នុងការរកឃើញមួយទៀតបង្ហាញថា ប្រទេសឥណ្ឌានឹងវា៉ដាច់ប្រទេសចិនជាប្រទេសដែលមានប្រជាជនច្រើនបំផុតលើពិភពលោកក្នុងរង្វង់ឆ្នាំ២០២៨ គ្រាដែលប្រទេសទាំងពីរមានប្រជាជនសរុបជិត១,៤៥ពាន់លាននាក់ ៕
ចែករំលែកព័តមាននេះ