ទីក្រុងហាណូយ ៖ ប្រទេសវៀតណាមបាននាំចេញបន្លែ និងផ្លែឈើ តម្លៃជាកំណត់ត្រា ៤,០៦ពាន់លានដុល្លារអាមេរិកទៅកាន់ប្រទេសចិនក្នុងរយៈពេល ៩ ខែដំបូងនៃឆ្នាំនេះ ដែលជាការកើនឡើង ១៩%…
ទីក្រុងហាណូយ ៖ ប្រទេសវៀតណាមបាននាំចេញបន្លែ និងផ្លែឈើ តម្លៃជាកំណត់ត្រា ៤,០៦ពាន់លានដុល្លារអាមេរិកទៅកាន់ប្រទេសចិនក្នុងរយៈពេល ៩ ខែដំបូងនៃឆ្នាំនេះ ដែលជាការកើនឡើង ១៩% បើធៀបទៅនឹងរយៈពេលដូចគ្នា កាលពីឆ្នាំមុន ជំរុញជាពិសេសដោយសារនាំចេញផ្លែទុរេន និងចេក។ នេះបើយោងតាមប្រភពពីសារព័ត៌មាន VnExpress ចេញផ្សាយនៅថ្ងៃទី១២ ខែវិច្ឆិកា ឆ្នាំ២០២៥។
យោងតាមទិន្នន័យគយចិនបានបង្ហាញថា ផ្លែទុរេនមានចំណែក ២០% នៃការនាំចូលបន្លែ និងផ្លែឈើសរុបរបស់ប្រទេសចិន កើនឡើងពី ១៧,៩% បើធៀបនឹងឆ្នាំមុន។ ផ្លែទុរេននៅតែជាទំនិញនាំចេញដ៏សំខាន់របស់វៀតណាម ដោយការនាំចេញមានតម្លៃ ២,៣ពាន់លានដុល្លារ។ តម្លៃនាំចេញជាមធ្យមគឺ ៣ ៦៩៦ដុល្លារក្នុង១តោន ទាបជាងតម្លៃផ្លែទុរេនថៃ ១៤% ទៅ ១៥%។ ដ្បិតវៀតណាម គឺជាប្រទេសនាំចេញផ្លែឈើធំជាងគេទីពីរទៅកាន់ប្រទេសចិន បន្ទាប់ពីប្រទេសថៃ។
ក្រៅពីទុរេន ចេក ក៏ជាការនាំចេញដ៏សំខាន់មួយទៀតរបស់វៀតណាមផងដែរ ដោយមានចំនួន ២៣២លានដុល្លារ កើនឡើង ១៦% បើធៀបនឹងឆ្នាំមុន។ តម្លៃនាំចេញជាមធ្យមគឺ ៤០៩ដុល្លារក្នុង១តោន តម្លៃទាបជាងចេកពីប្រទេសហ្វីលីពីន និងអេក្វាឌ័រ ដែលមានតម្លៃ ៥៨៩ ដុល្លារ និង ៧៥៧ ដុល្លារ។ ដោយសារតម្លៃនេះហើយ ទើបធ្វើឱ្យចេកវៀតណាមមានប្រជាប្រិយភាពជាមួយអ្នកនាំចូលចិន ជាពិសេសនៅខេត្តជិតព្រំដែនដូចជា ខេត្តក្វាងស៊ី និងក្វាងទុង ជាខេត្តដែលអ្នកទទួលទានចូលចិត្តផលិតផលស្រស់ៗ តម្លៃសមរម្យ និងគុណភាពល្អ។
ការនាំចូលបន្លែ និងផ្លែឈើរបស់ប្រទេសចិនមានតម្លៃជិត ២០,៣ពាន់លានដុល្លារនៅក្នុងរយៈពេល ៩ ខែដំបូង ឆ្នាំនេះ។ ថៃ គឺជាអ្នកផ្គត់ផ្គង់ធំជាងគេ ដោយមានតម្លៃ ៦,៧ពាន់លានដុល្លារ ពោលកើនឡើង ១០% បើធៀបនឹងរយៈពេលដូចគ្នា កាលពីឆ្នាំមុន និងមានចំណែកទីផ្សារ ៣៣%។
នៅឆ្នាំនេះ អាជីវកម្មវៀតណាមជាច្រើនបានធ្វើការកែប្រែឱ្យប្រសើរឡើងនូវចម្ការផ្លែឈើ ការវេចខ្ចប់ និងទីតាំងរក្សាទុកក្រោមសីតុណ្ហភាពខាងក្រៅ ដើម្បីបំពេញតាមស្តង់ដារ និងតម្រូវការនាំចូលដ៏តឹងរ៉ឹងរបស់ចិន។ ផ្លែទុរេនមានចំនួនជាងពាក់កណ្តាលនៃការនាំចេញផ្លែឈើ និងបន្លែរបស់វៀតណាមទៅកាន់ចិន ប៉ុន្តែទោះយ៉ាងណាអ្នកជំនាញបានព្រមានគួរកុំពឹងផ្អែកខ្លាំងពេកលើផលិតផលតែ១មុខ ដើម្បីបង្កើនចំណែកទីផ្សារនៅក្នុងប្រទេសចិន វៀតណាមត្រូវធ្វើពិពិធកម្មផលិតផលរបស់ខ្លួន កែលម្អបច្ចេកវិទ្យារក្សាទុក ព្រមទាំងរក្សាស្តង់ដារគុណភាព៕
ចែករំលែកព័តមាននេះ