តម្លៃមាសអន្តរជាតិហក់ឡើងដល់កម្រិតខ្ពស់បំផុត នៅក្នុងរយៈពេលជាង២សប្តាហ៍
បរទេស ៖ តម្លៃមាសអន្តរជាតិកើនឡើង ៣% គិតត្រឹមព្រឹកថ្ងៃទី១១ ខែវិច្ឆិកា ឆ្នាំ២០២៥ ដើម្បីឈានដល់កម្រិតខ្ពស់បំផុតនៅក្នុងរយៈពេលជាង ២ សប្តាហ៍…
បរទេស ៖ តម្លៃមាសអន្តរជាតិកើនឡើង ៣% គិតត្រឹមព្រឹកថ្ងៃទី១១ ខែវិច្ឆិកា ឆ្នាំ២០២៥ ដើម្បីឈានដល់កម្រិតខ្ពស់បំផុតនៅក្នុងរយៈពេលជាង ២ សប្តាហ៍ ដោយសារទិន្នន័យសេដ្ឋកិច្ចទន់ខ្សោយចេញពីសហរដ្ឋអាមេរិកបានពង្រឹងការរំពឹងទុកថា ធនាគារកណ្តាលអាមេរិក (Fed) នឹងកាត់បន្ថយអត្រាការប្រាក់ ដោយបង្កើនតម្រូវការមាស ដែលត្រូវបានចាត់ទុកជាទ្រព្យសម្បត្តិដ៏មានសុវត្ថិភាពបំផុត អំឡុងពេលភាពមិនប្រាកដប្រជា។ នេះបើយោងតាមប្រភពពីទីភ្នាក់ងារសារព័ត៌មាន Reuters បានចេញផ្សាយ។
តម្លៃមាសអន្តរជាតិបានកើនឡើងជិត ៣% ពេញមួយយប់ថ្ងៃទី១០ ខែវិច្ឆិកា កន្លងទៅ ហើយស្ថិតនៅតម្លៃ ៤,១៣៨ដុល្លារក្នុង១អោន ឬ ៤ ៩៨៥ដុល្លារក្នុង១តម្លឹង គិតត្រឹមម៉ោង ៩:៤៥នាទីព្រឹកថ្ងៃទី១១ ខែវិច្ឆិកា (ម៉ោងនៅកម្ពុជា)។ តម្លៃមាសអន្តរជាតិបានហក់ឡើងដល់កម្រិតខ្ពស់បំផុត ៤ ៣៨១ដុល្លារក្នុង១អោន ឬ ៥ ២៧៨ដុល្លារក្នុង១តម្លឹង កាលពីចុងខែតុលាកន្លងទៅ។
លោក Peter Grant អនុប្រធាន និងជាអ្នកយុទ្ធសាស្ត្រជាន់ខ្ពស់នៅឯក្រុមហ៊ុន Zaner Metals បានឱ្យដឹងថា ទិន្នន័យសេដ្ឋកិច្ចទន់ខ្សោយមួយចំនួននៅសហរដ្ឋអាមេរិក កាលពីសប្តាហ៍មុន បានធ្វើឱ្យទីផ្សារមាសមានទំនោរទៅរកការរំពឹងទុកសម្រាប់ការកាត់បន្ថយអត្រារបស់ Fed ហើយគ្រប់គ្នានៅតែអាចមើលឃើញការកាត់បន្ថយអត្រាការប្រាក់នៅខែធ្នូខាងមុខនេះ។
ទិន្នន័យកាលពីសប្តាហ៍មុនបានបង្ហាញថា សេដ្ឋកិច្ចអាមេរិកជួបបញ្ហា ដោយសារតែអត្រាបាត់បង់ការងារនៅក្នុងខែតុលាកើនឡើង ជាមួយនឹងការខាតបង់នៅក្នុងវិស័យមួយចំនួន និងការលក់រាយ។ លើសពីនេះ អារម្មណ៍អ្នកប្រើប្រាស់នៅអាមេរិកបានធ្លាក់ចុះ នៅដើមខែវិច្ឆិកា ដោយសារមានការព្រួយបារម្ភអំពីការធ្លាក់ចុះនៃសេដ្ឋកិច្ចរបស់ប្រទេសមហាអំណាចសេដ្ឋកិច្ចទី ១ ពិភពលោកមួយនេះ។
ឥឡូវនេះ វិនិយោគិនកំពុងមើលឃើញឱកាស ៦៤% នៃការកាត់បន្ថយអត្រាការប្រាក់របស់ Fed នៅក្នុងខែធ្នូខាងមុខនេះ។
លោក Grant បានបន្ថែមថា តម្លៃមាសអន្តរជាតិអាចមានចន្លោះពី ៤ ២០០ដុល្លារ ទៅ ៤ ៣០០ដុល្លារក្នុង១អោន ឬ ៥ ០៦០ដុល្លារ ទៅ ៥ ១៨០ដុល្លារក្នុង១តម្លឹង នៅចុងឆ្នាំនេះ ហើយ ៥ ០០០ដុល្លារក្នុង១អោន ៦ ០២៤ដុល្លារក្នុង១តម្លឹង នៅតែជាគោលដៅសមហេតុផលសម្រាប់ត្រីមាសទី១ នៃឆ្នាំ ២០២៦៕
ចែករំលែកព័តមាននេះ