រាជធានីភ្នំពេញ ៖ តារាកំប្លែងនាងជួន ចាន់រតនា ហៅក្អយ ដែលបានបាត់ស្រមោលពីពិភពសិល្បៈ បន្ទាប់ពីម្ចាស់បំណុលជាច្រើនរូបដាក់ពាក្យប្ដឹងទាមទារឱ្យនាងចេញមុខដោះស្រាយ រហូតឡើងដល់តុលាការនោះ ឥឡូវភពខ្មៅងងឹតជិតរំលងផុតពីជីវិតនាងហើយ ព្រោះសងបំណុលគេបានប្រមាណ៧០ភាគរយហើយ ព្រមទាំងបានចូលរួមសម្ដែងខ្លះៗហើយដែរ គ្រាន់តែពុំទាន់លេចមុខ
រាជធានីភ្នំពេញ ៖ តារាកំប្លែងនាងជួន ចាន់រតនា ហៅក្អយ ដែលបានបាត់ស្រមោលពីពិភពសិល្បៈ បន្ទាប់ពីម្ចាស់បំណុលជាច្រើនរូបដាក់ពាក្យប្ដឹងទាមទារឱ្យនាងចេញមុខដោះស្រាយ រហូតឡើងដល់តុលាការនោះ ឥឡូវភពខ្មៅងងឹតជិតរំលងផុតពីជីវិតនាងហើយ ព្រោះសងបំណុលគេបានប្រមាណ៧០ភាគរយហើយ ព្រមទាំងបានចូលរួមសម្ដែងខ្លះៗហើយដែរ គ្រាន់តែពុំទាន់លេចមុខតាមកញ្ចក់ទូរទស្សន៍ប៉ុណ្ណោះ ។ ជាក់ស្ដែងនៅក្នុងពិធីជួបជុំអតីតសិស្សវិទ្យាល័យព្រះស៊ីសុវត្ថិនៃរាជធានីភ្នំពេញ កាលពីរាត្រីថ្ងៃសៅរ៍ទី២៥ ឧសភា ២០១៣ ដែលប្រមូលផ្ដុំដោយភ្ញៀវកិត្ដិយសគ្រប់ឋានៈ និងមានសិល្បករល្បីៗចូលរួមនោះ គេឃើញវត្ដមាននាងក្អយដែរ គឺបង្ហាញច្បាស់ថា នាងលែងលាក់មុខទៀតហើយ ។
គ្មានអ្នកណាមិនភ្ញាក់ផ្អើលទេ ទាំងមហាជន ទាំងអ្នកនៅក្នុងសង្គមសិល្បៈ ខណៈឃើញមុខតារាកំប្លែងនាងក្អយដែលល្បីជំពាក់ជំពិនបំណុលគេច្រើនសន្ធឹកនោះ លេចមុខក្នុងពិធីធំដុំជួបជុំអតីតសិស្សវិទ្យាល័យព្រះស៊ីសុវត្ថិនោះ ។ អ្នកសិល្បៈនៅទីនោះម្នាក់ៗគ្រាន់តែឃើញនាងក្អយភ្លាម សួរនាំពីនេះពីនោះ ពិសេសសុខទុក្ខរបស់នាងពេលបាត់មុខអស់ជាច្រើនខែពីពិភពសិល្បៈ ។ គ្រានោះនាងក្អយដែលគ្រងសម្លៀកបំពាក់ឈុតខ្មៅ និងកន្សែងរុំកបានសំពះរាក់ទាក់ដាក់អ្នកសិល្បៈជាមួយនឹងភាពស្រស់ស្អាត ពិសេសគេឃើញនាងកែខ្ទង់ច្រមុះជួយឱ្យសម្រស់កាន់តែលេចធ្លោខ្លាំងឡើង ។
នាងក្អយគ្រានោះបានក្លាយជាផ្ទាំងស៊ីបយ៉ាងសំខាន់ ពិសេសអ្នកកាសែតស្ទុះទៅរកនាង ខណៈនាងមិនខ្លាចការតាមផ្ដិតយករូបភាពឡើយ ថែមទាំងញញឹមដាក់កាមេរ៉ាយ៉ាងស្រស់គ្មានឱ្យទើសចិត្ដឡើយ ។
ចង់ដឹងពីបញ្ហាដែលកើតឡើងកាលពីពេលកន្លងមក កោះសន្ដិភាពបានសុំការបកស្រាយដោយផ្ទាល់ពីនាងជួន ចាន់រតនា ហៅក្អយ ។ តារាកំប្លែងដែលមានប្រភពចេញពីខេត្ដតាកែវរូបនេះបានស្វាគមន៍ និងនិយាយថា នាងមិនចង់ចេញមុខបកស្រាយរឿងរ៉ាវនាពេលនេះទេ ព្រោះតែនាងកំពុងតែដោះស្រាយពីបញ្ហារបស់នាងមិនទាន់ចប់ចុងចប់ដើមជ្រះឱ្យស្រឡះនៅឡើយ ។ នាងនិយាយថា តាំងពីមានរឿងនោះមក នាងមិនដែលចង់រត់ចោលស្រុកឡើយ ពោលគឺចង់ដោះស្រាយឱ្យម្ចាស់បំណុលឱ្យទាល់តែអស់ ។ ទោះជាត្រូវសងយូរបន្ដិចមែន តែនាងបានសន្យាជាមួយពួកគាត់ឱ្យចប់ ព្រោះនាងមិនចង់ធ្វើជាមនុស្សមិនល្អទេ ។ នាងយល់ថាមនុស្សយើងណាដែលមិនមានកំហុស តែសំខាន់ពេលដឹងខុសហ៊ានទទួលខុសត្រូវ ហើយកែខ្លួនវិញ គឺជារឿងត្រឹមត្រូវ ។ គិតរហូតមកទល់ពេលនេះនាងសងបំណុលបានប្រមាន៧០ភាគរយហើយ ។ នៅសល់បន្ដិចបន្ដួចទៀតនាងបានសន្យាថានឹងព្យាយាមដោះស្រាយជូនម្ចាស់បំណុលឱ្យអស់ ។ នាងនិយាយថា នាងក៏ជាជនរងគ្រោះម្នាក់ដែរ ដូច្នេះសុំឱ្យពួកគាត់ទុកពេលឱ្យនាងបានធ្វើការងាររកលុយសងបំណុលឱ្យអស់ មិនទុកឱ្យរសេមរសាមទេ ។
តារាកំប្លែងរូបនេះនិយាយថា «បើខ្ញុំមិនដោះស្រាយជាមួយម្ចាស់បំណុលស្មានតែខ្ញុំនៅសុខ ហើយមានមុខមកជួបគេឯងឈរញញឹមឱ្យគេថតបានស្រួលដូចពេលនេះឬ ច្បាស់ជាម្ចាស់បំណុលតាមមកជាន់ក បោចសក់ ទះកុំផ្លៀងខ្ញុំមិនខានឡើយ» ។
តារាកំប្លែងដែលធ្លាប់លេចធ្លោក្នុងក្រុមកំប្លែងនាយក្រឹមរូបនេះ បានចាត់ទុករឿងដែលនាងខុសឆ្គងថា ជារឿងបន្ទុចបង្អាក់ដល់ជីវិតសិល្បៈដ៏ផូរផង់របស់នាង ។ នាងក្អយនិយាយទាំងមុខស្រពោនថា «ការពិតនាងខ្ញុំពិតជាសោកស្ដាយណាស់ព្រោះតែជ្រុលមួយពេល ស្ទើរតែរកផ្លូវដើរគ្មាន ពិសេសអាជីពសិល្បៈរបស់នាងខ្ញុំដែលប្រឹងតស៊ូពីជំហានដំបូងក៏ត្រូវបាត់បង់ការទាក់ទាញ ។ តែពេលនេះមិនអីទេ នាងខ្ញុំជិតរួចផុតទុក្ខទាំងអស់នេះហើយ ។ យ៉ាងយូរនៅក្រោយពេលបោះឆ្នោតថ្នាក់ជាតិ នាងខ្ញុំប្រហែលជាលៃលករកកន្លែងឡើងប៉ុស្ដិ៍ទូរទស្សន៍វិញហើយ ដើម្បីបម្រើអារម្មណ៍មហាជនជាថ្មី ។ ទោះត្រូវត្រួសត្រាយផ្លូវសាដើមក៏នាងខ្ញុំមិនតូចចិត្ដដែរ នាងខ្ញុំត្រូវតែតស៊ូដើម្បីកេរ្ដិ៍ឈ្មោះ» ។
នៅពេលសួរថា តើនាងមានសង្ឃឹមប៉ុនណាអាចមានមុខឡើងសម្ដែងបាននៅតាមកញ្ចក់ទូរទស្សន៍វិញ ។ នាងក្អយអះអាងថា នាងអត់រត់ ឬធ្វើខ្លួនជាអ្នកទោសទេ គឺនៅសងគេឱ្យអស់។ នាងសង្ឃឹមថា ក្រោយពេលសាងកំហុសរួចហើយនឹងមានការយោគយល់ចំពោះនាងច្រើនពីមជ្ឈដ្ឋានទូទៅ ពិសេសនាងរំពឹងថាតាមស្ថានីយទូរទស្សន៍ពិតជាអធ្យាស្រ័យដល់រូបនាងមិនខាន ។
នាងក្អយបានវិលចូលពិភពសិល្បៈបណ្ដើរៗហើយ ដោយបានចូលរួមច្រៀងកាត់សក់ក្នុងពិធីមង្គលការជាច្រើនរោងនារដូវកាលនេះ ដោយគ្រាន់តែនាងមិនទាន់បានបង្ហាញមុននៅតាមកញ្ចក់ទូរទស្សន៍ប៉ុណ្ណោះ ។ បន្ទាប់ពីដោះបំណុលគេអស់ គេរំពឹងថាជីវិតជាតារាកំប្លែងរបស់នាងក្អយនឹងរីកស្រស់បំព្រងឡើងវិញមិនខាន ៕
ចែករំលែកព័តមាននេះ