រាជធានីភ្នំពេញ ៖ កម្ពុជានឹងធ្វើជាម្ចាស់ផ្ទះព្រឹត្តិការណ៍ប្រកួតកីឡាវ៉ូវីណាម ជ្រើសរើសជើងឯកអាស៊ីអាគ្នេយ៍លើកទី២នៅខេត្តសៀមរាបដែលចាប់ផ្តើមធ្វើនៅថ្ងៃទី២៨ ឧសភា និងគ្រោងបញ្ចប់នៅថ្ងៃទី៣០ ឧសភា ឆ្នាំ២០១៣ ដោយមានប្រទេសនៅក្នុងតំបន់អាស៊ានចំនួន៥សន្យាថា នឹងមកចូលរួមប្រកួតតែសម្រាប់ពេលនេះទើបតែមានប្រទេសចំនួន៣ប៉ុណ្ណោះដែលបានចុះឈ្មោះចូលរួមជាផ្លូវការ ឯពីរទៀតមិនទាន់ចុះឈ្មោះទេ ។
លោកទេព ជីវសុខុម អគ្គលេខាធិការសហព័ន្ធកីឡាវ៉ូវីណាមកម្ពុជា និងជាគ្រូជម្រើសជាតិផងនោះ បានមានប្រសាសន៍ឱ្យដឹងថា មកដល់ពេលនេះមានប្រទេសចំនួន៣ហើយដែលបានចុះឈ្មោះចូលរួមប្រកួតជាផ្លូវការក្នុងនោះមានកម្ពុជាជាម្ចាស់ផ្ទះ វៀតណាម និងឡាវ ខណៈប្រទេស២ផ្សេងទៀតគឺមីយ៉ាន់ម៉ា និងឥណ្ឌូណេស៊ីមិនទាន់ចុះឈ្មោះនៅឡើយទេ ។ លោកបន្តថា ពួកគេនឹងរូតរះចុះឈ្មោះនាសប្តាហ៍ក្រោយពោលគឺពេលនេះទៅដល់ថ្ងៃប្រកួតមានរយៈពេលមិនយូរប៉ុន្មានទេ មានន័យថា គណៈកម្មការរៀបចំការប្រកួតបានទុកពេលរហូតដល់ថ្ងៃទី២៥ ឧសភា ដោយគណៈកម្មាធិការជាតិអូឡាំពិកកម្ពុជា ជាអ្នករៀបចំការប្រកួតនោះឯសហព័ន្ធជាអ្នកសហការលើការងារបច្ចេកទេសប៉ុណ្ណោះ ។ ព្រឹត្តិការណ៍នេះ គ្រោងចំណាយប្រាក់៧ម៉ឺនដុល្លារ ព្រមទាំងមានកីឡាករ កីឡាការិនីចូលរួមចំនួនជាង២០០នាក់ ។
សូមរំលឹកថា ការប្រកួតវីឡាវ៉ូវីណាមជ្រើសរើសជើងឯកអាស៊ីអាគ្នេយ៍កាលពីលើកទី១កម្ពុជាធ្លាប់ធ្វើជាម្ចាស់ផ្ទះរួចម្តងមកហើយដោយមានប្រទេស៤ចូលរួមប្រកួតគឺកម្ពុជា វៀតណាម ឡាវ និងឥណ្ឌូណេស៊ី ដោយពេលនោះប្រទេសវៀតណាមទទួលបានមេដាយច្រើនជាងគេ គឺមាស៩ និងប្រាក់១០ បន្ទាប់មកប្រទេសឥណ្ឌូណេស៊ីទទួលបានមេដាយមាស ៥ប្រាក់៥ និងសំរឹទ្ធ៧ ។ ចំណែកប្រទេសកម្ពុជាទទួលបានមេដាយមាស៣ ប្រាក់៥ និងសំរឹទ្ធ១០ និងប្រទេសឡាវ ទទួលបានមេដាយមាស៣ ប្រាក់១ និងសំរឹទ្ធ៨ ។
គួរបញ្ជាក់ផងដែរថា ប្រភេទកីឡាវ៉ូវីណាម ក៏នឹងមានវត្តមាននៅក្នុងព្រឹត្តិការណ៍កីឡាស៊ីហ្គេមលើកទី២៧ នៅប្រទេសមីយ៉ាន់ម៉ានាចុងឆ្នាំនេះដែរ ដោយមានមេដាយសរុបចំនួន៧២ ក្នុងនោះមាស១៨ ប្រាក់១៨ និងសំរឹទ្ធ៣៦ ទុកឱ្យកីឡាករ-កីឡាការិនីទាំងអស់ដណ្តើមគ្នា លើវិញ្ញាសាសរុប១៨ (បុរស៨ ស្ត្រី៧ និងចម្រុះ៣) ៕
ចែករំលែកព័តមាននេះ