រាជធានីភ្នំពេញ ៖ ស្ថានីយទូរទស្សន៍ CTN សហការជាមួយសហព័ន្ធកីឡាប្រដាល់កម្ពុជា ក្រោមការជួយឧបត្ថម្ភពីក្រុមហ៊ុនស្រាផែនដី បានរៀបចំធ្វើសន្និសីទកាសែតមួយកាលពីព្រឹកថ្ងៃទី១៣ ឧសភា ស្តីពីការប្រកួតកីឡាប្រដាល់ក្បាច់គុនបុរាណខ្មែរដណ្តើមខ្សែក្រវាត់ជើងឯក១០លានរៀលរបស់ក្រុមហ៊ុនស្រាផែនដី ទម្ងន់៧១គីឡូក្រាម ។
រាជធានីភ្នំពេញ ៖ ស្ថានីយទូរទស្សន៍ CTN សហការជាមួយសហព័ន្ធកីឡាប្រដាល់កម្ពុជា ក្រោមការជួយឧបត្ថម្ភពីក្រុមហ៊ុនស្រាផែនដី បានរៀបចំធ្វើសន្និសីទកាសែតមួយកាលពីព្រឹកថ្ងៃទី១៣ ឧសភា ស្តីពីការប្រកួតកីឡាប្រដាល់ក្បាច់គុនបុរាណខ្មែរដណ្តើមខ្សែក្រវាត់ជើងឯក១០លានរៀលរបស់ក្រុមហ៊ុនស្រាផែនដី ទម្ងន់៧១គីឡូក្រាម ។
លោកម៉ា សេរី អ្នករៀបចំកម្មវិធីប្រដាល់ប្រចាំស្ថានីយទូរទស្សន៍ CTN បានឱ្យដឹងថា ការប្រកួតលើកនេះប្រមូលផ្តុំទៅដោយកីឡាករជើងខ្លាំងចំនួន៨រូបធ្វើការប្រកួតជម្រុះវិលជុំ បានន័យថា ពួកគេម្នាក់ៗត្រូវឆ្លងកាត់ការប្រកួតរហូតដល់ទៅ៧ដងម្នាក់ ហើយចុងក្រោយត្រូវជម្រុះយកតែ៤រូបប៉ុណ្ណោះឡើងទៅប្រកួតនៅវគ្គពាក់កណ្តាលផ្តាច់ព្រ័ត្រ និងផ្តាច់ព្រ័ត្រជាបន្តទៀត ។ កីឡាករទាំង៨រូបដែលមានមុខឡើងប្រកួតនោះមាន មាស ភិរម្យ មកពីក្លិបកងទ័ពជើងទឹក, វី សាយ័ន មកពីក្លិបខ្លារខិនមានឫទ្ធិ, ខុន រាជ មកពីក្លិបកងពលធំអន្តរាគមន៍លេខ៣ ប្រាសាទព្រះវិហារ, សាំង ស៊ីថា មកពីសមាគមកីឡាប្រដាល់ក្រសួងការពារជាតិ, ឌុន រដ្ឋា មកពីក្លិបអេភូថងកីឡា, វ៉ោយ សុធន មកពីក្លិបរាជសីហ៍ខេត្តបន្ទាយមានជ័យ, ពៅ ស័ក្តិសិទ្ធិ មកពីសមាគមកីឡាប្រដាល់ក្រសួងមហាផ្ទៃ និង ម៉ន សំណាង មកពីក្លិបវិស្វកម្មបច្ចេកទេសកងទ័ពជើងគោកព្រែកឯង ។ ការប្រកួតគ្រោងចាប់ផ្តើមធ្វើពីថ្ងៃសៅរ៍ ទី២៥ ឧសភាខាងមុខនេះនៅវេលាម៉ោង២រសៀល ដែលក្នុង១សប្តាហ៍មាន២ប្រកួត ។
គួររំលឹកផងដែរថា ការប្រកួតដណ្តើមខ្សែក្រវាត់ជើងឯក១០លានរៀលនេះគឺផ្តោតសំខាន់ទៅលើអ្នកដែលទទួលបានចំណាត់ថ្នាក់លេខ១ប៉ុណ្ណោះ ដែលត្រូវទទួលបានប្រាក់រង្វាន់១០លានរៀលអមជាមួយនឹងខ្សែក្រវាត់ ។ ចំណាត់ថ្នាក់លេខ២ ទទួលបានប្រាក់២លាន៥សែនរៀល និងពាន១ ។ ចំណាត់ថ្នាក់លេខ៣ ទទួលបានប្រាក់១លាន៥សែនរៀល និងពាន១ និងចំណាត់ថ្នាក់លេខ៤ ទទួលបានប្រាក់១លានរៀល និងពាន១ ។
លោកឧត្តមសេនីយ៍ទោ តែម ម៉ឺន ប្រធានសហព័ន្ធកីឡាប្រដាល់កម្ពុជាបានធ្វើការណែនាំដល់កីឡាករ និងគ្រូបង្វឹកបូករួមទាំងថ្នាក់ដឹកនាំទាំងអស់ត្រូវតែគោរពវិន័យក្រមសីលធម៌ និងច្បាប់ប្រកួតឱ្យបាន មិនត្រូវធ្វើអ្វីដែលនាំឱ្យខូចដល់កម្មវិធីប្រកួតឡើយ ។ ជាមួយគ្នានេះផងដែរ លោកក៏បានធ្វើការព្រមានខ្លាំងៗចំពោះកីឡាករ និងថ្នាក់ដឹកនាំរបស់ក្លិបនីមួយៗផងដែរ បើមិនគោរពច្បាប់ប្រកួតឱ្យបានត្រឹមត្រូវទេនោះនឹងទទួលរងការដាក់ពិន័យមិនខានឡើយ ។
លោកម៉ា សេរី ក៏បានលើកឡើងពីទម្លាប់អាក្រក់របស់ប្រធានក្លិបមួយចំនួនគឺនៅពេលសិស្សខ្លួនឯងឡើងប្រកួត បែរជាឈរស្រែកបោះព្រុយយ៉ុងទាំងស្លៀកសម្លៀកបំពាក់ជាគណៈកម្មការរៀបចំការប្រកួតទៅវិញ ដែលទង្វើបែបនេះវាជះឥទ្ធិពលអាក្រក់បំផុតដល់អ្នកទស្សនាទូទៅ ។ ទោះបីយ៉ាងណា ទង្វើបែបនេះមិនធ្លាប់កើតមាននៅ CTN ឡើយ ហើយលោកសង្ឃឹមថា អ្វីៗទាំងអស់នឹងដំណើរការទៅយ៉ាងរលូនតាំងពីដើមដល់ចប់មិនខាន ៕
ចែករំលែកព័តមាននេះ