រាជធានីភ្នំពេញ ៖ កាលពីល្ងាចថ្ងៃទី១៣ ឧសភា ឆ្នាំ២០១៣ នៅទីស្នាក់ការក្លិបបាល់ទាត់ភ្នំពេញក្រោន ស្ថិតក្នុងសង្កាត់ផ្សារថ្មីទី៣ ខណ្ឌដូនពេញ រាជធានីភ្នំពេញ មានរៀបចំសន្និសីទកាសែតមួយស្តីពីការប្រកួតបាល់ទាត់ស្ត្រីថ្នាក់ជាតិអាយុក្រោម១៥ឆ្នាំលើកទី២ ដោយមានការអញ្ជើញចូលរួមពីសំណាក់លោក HORST TRILLER តំណាងស្ថានទូតអាល្លឺម៉ង់ប្រចាំនៅកម្ពុជា មន្ត្រីកីឡារបស់ក្លិបភ្នំពេញក្រោន និងគ្រូបង្វឹកមកពីតាមបណ្តាខេត្តនានាជាច្រើនរូប ។
លោក HORST TRILLER មានប្រសាសន៍ក្នុងឱកាសនោះថា លោកមានចិត្តសប្បាយរីករាយណាស់ដែលបានចូលរួមចំណែកក្នុងវិស័យបាល់ទាត់ក្នុងប្រទេសកម្ពុជា ជាពិសេសបាល់ទាត់ស្ត្រី ហើយនេះជាលើកទី២ ហើយដែលយើងបានរៀបចំការប្រកួតបាល់ទាត់ស្ត្រីក្នុងប្រទេសកម្ពុជា ។ យើងជឿជាក់ថា កម្មវិធីនេះនឹងទទួលបានជោគជ័យ ព្រោះយើងធ្លាប់ទទួលបានជោគជ័យយ៉ាងធំធេងម្តងរួចមកហើយនៅក្នុងខេត្តបាត់ដំបង ។
សម្រាប់ក្លិបដែលបានចូលរួមប្រកួតមកពី១១ខេត្ត-ក្រុងដូចជា ៖ ក្រុងប៉ោយប៉ែត ខេត្តប៉ៃលិន ខេត្តសៀមរាប ខេត្តពោធិ៍សាត់ ខេត្តកំពង់ស្ពឺ ខេត្តកំពង់ឆ្នាំង ខេត្តព្រះសីហនុ ខេត្តកណ្តាល រាជធានីភ្នំពេញ ខេត្តកំពង់ធំ និងខេត្តបាត់ដំបង ដោយចែកចេញជា៣ពូល ក្នុងមួយពូលៗមាន៤ក្រុម ។ សម្រាប់ពូលA នោះមានខេត្តបាត់ដំបង ខេត្តព្រះសីហនុ ខេត្តប៉ៃលិន និងក្រុងប៉ោយប៉ែត។ ពូលB មានភ្នំពេញក្រោន ខេត្តពោធិ៍សាត់ ខេត្តកំពង់ធំ និងខេត្តកំពង់ឆ្នាំង និងពូលC មានខេត្តសៀមរាប, ក្រុម Mighty Girl ខេត្តកំពង់ស្ពឺ និងក្រុម New Day Cambodia។
ការប្រកួតគឺក្នុងមួយពូលៗជម្រុះចេញ២ក្រុមដើម្បីយក២ក្រុមដែលមានពិន្ទុល្អជាងគេឡើងទៅលេងវគ្គបន្ត ។ ចំពោះ៦ក្រុមដែលមិនបានឡើងទៅលេងវគ្គបន្តនោះ គឺត្រូវប្រកួតគ្នាដណ្តើមពានមួយផ្សេងទៀតសម្រាប់ក្រុមដែលខ្សោយដូចគ្នា ។ ការប្រកួតនេះគឺលេងម្ខាង៧នាក់ ដោយលេងលើទីលានដែលមានបណ្តោយ៦០ម៉ែត្រ និងទទឹង៤៥ម៉ែត្រ ឯទីមានប្រវែង៥ម៉ែត្រ កម្ពស់២ម៉ែត្រ និងមាន២តង់ក្នុងមួយតង់មានរយៈពេល១២នាទី ។
សូមបញ្ជាក់ថា ការប្រកួតបាល់ទាត់ស្ត្រីថ្នាក់ជាតិអាយុក្រោម១៥ឆ្នាំលើកទី២នេះបានចាប់ផ្តើមធ្វើតាំងពីថ្ងៃទី១១ ឧសភាមកម៉្លេះ និងត្រូវបញ្ចប់នៅល្ងាចថ្ងៃទី១៥ ឧសភា នៅទីលានស្តាតចាស់ រាជធានីភ្នំពេញ ដោយមានការចូលរួមច្រៀង និងសម្តែងដោយកញ្ញាមាស សុខសោភា ផងដែរ ។ គោលបំណងបើកឱ្យមានការប្រកួតបាត់ទាត់នេះគឺដើម្បីបង្កើនការយល់ដឹងអំពីបាល់ទាត់ស្ត្រីក្នុងប្រទេសកម្ពុជា សម្រាប់ផ្តល់ឱកាសឱ្យស្ត្រីបានហ្វឹកហាត់ និងលេងបាល់ទាត់ មិនតែប៉ុណ្ណោះពួកគេមានឱកាសអភិវឌ្ឍន៍ខ្លួនដើម្បីក្លាយជាអាជ្ញាកណ្តាល ឬជំនួយការអាជ្ញាកណ្តាលថ្នាក់ជាតិទៀតផង ។
ព្រឹត្តិការណ៍នេះត្រូវបានរៀបចំឡើងដោយអង្គការសលត៍ (Salt Academy) ដែលជាអង្គការមួយជួយលើវិស័យបាល់ទាត់ស្ត្រីក្នុងប្រទេសកម្ពុជា៤ឆ្នាំកន្លងមកហើយ ដោយមានការឧបត្ថម្ភគាំទ្រពីស្ថានទូតអាល្លឺម៉ង់ប្រចាំនៅកម្ពុជា និងបណ្តាដៃគូឧបត្ថម្ភជាច្រើនទៀត ៕
ចែករំលែកព័តមាននេះ