រាជធានីភ្នំពេញ ៖ ការប្រកួតរវាងកីឡាករហ៊ុន សោភ័ណ្ឌ មកពីក្លិបយុវកីឡាខេត្តកណ្តាល និងកីឡាករយ៉ាម រ៉េត មកពីក្លិបរស្មីកុមារកំព្រានៅសង្វៀនស្ថានីយទូរទស្សន៍ប៉ុស្តិ៍លេខ៥ កាលពីថ្ងៃអាទិត្យ ទី១២ ឧសភា បានធ្វើឱ្យមហាជនខកចិត្តយ៉ាងខ្លាំងដោយសារតែកីឡាករយ៉ាម រ៉េត ត្រូវគេឃើញអន់សាច់តាំងពីចុងទឹកទី២ ទៅហើយ បែរជា ហ៊ុន សោភ័ណ្ឌ មិនអាចវាយឱ្យសន្លប់ ហើយស្ទើរតែចាញ់ខ្លួនឯងទៅវិញ ។ ដើម្បីការពារខ្លួនពីការចោទប្រកាន់ថា គេជាប់ពាក់ព័ន្ធលក់ខ្លួន កីឡាករហ៊ុន សោភ័ណ្ឌ បានចេញមុខបកស្រាយ ។
ជើងខ្លាំង ហ៊ុន សោភ័ណ្ឌ និយាយថា ក្នុងពេលវាយសម្រុកទៅកាន់កីឡាករយ៉ាម រ៉េត ពីដំបូងខ្លួនបានទទួលជោគជ័យយ៉ាងខ្លាំងដោយបានទាំងធ្វើឱ្យ យ៉ាម រ៉េត ខូចជើងស្តាំស្ទើរទប់ជំហរលែងនឹងតាំងពីដើមទឹកទី២ទៀតផង ។ អញ្ចឹងហើយទើបលោកប្រឹងសម្រុកបន្ថែមទៀតដើម្បីធ្វើឱ្យគូប្រកួតរបស់ខ្លួនសន្លប់ ។ ប៉ុន្តែសុខៗស្រាប់តែរបួសជើងស្តាំរបស់លោកធ្វើទុក្ខកណ្តាលទី ទើបបណ្តាលឱ្យលោកមិនអាចបន្តការសម្រុកដូចការគ្រោងទុក ។ លោកអះអាងថា អ្នកទស្សនាមិនតិចនោះទេដែលយល់ច្រឡំថា លោកទទួលសំណូកក្នុងពេលគេឱ្យទឹក ទើបប្រកួតខ្លាំងសុខៗស្រាប់តែថមថយថាមពល ដោយធ្វើជារបួសជើងស្តាំ ។ ប៉ុន្តែការពិតជើងស្តាំរបស់លោកមានសភាពរបួសធ្ងន់គួរសមក្នុងឆ្អឹង តាំងពីពេលលោកឡើងរេញប្រកួតជាមួយដៃគូផ្សេងមុននេះម៉្លេះ ។ បើកុំតែសភាពជើងស្តាំរបស់លោកស្រាប់តែឈឺកណ្តាលទី កុំអីលោកបន្ថែមការវាយលុកឱ្យបានល្អដូចក្នុងទឹកទី១ និងទី២ ដើម្បីឱ្យកីឡាករយ៉ាម រ៉េត សន្លប់បាត់ទៅហើយ ។ លោកសោកស្តាយយ៉ាងខ្លាំងដែលមិនអាចសម្រេចផែនការនេះបាន ហើយបែរជាធ្វើឱ្យលោកប៊ិះតែមិនឈ្នះពិន្ទុនៅវគ្គចុងក្រោយ ។
ពេលការប្រកួតឈានចូលដល់ទឹកទី៣ កីឡាករហ៊ុន សោភ័ណ្ឌ ស្រាប់តែមានអាការរបួសដោយមិនឃើញកីឡាករយ៉ាម រ៉េត ទាត់ត្រូវទាល់តែសោះ ។ អ្នកខ្លះសង្ស័យថាលោកតដៃឱ្យគេហើយធ្វើពុតជាឈឺជើង ។ អញ្ចឹងហើយទើបគ្រាន់តែបញ្ចប់ការប្រកួតភ្លាម លោកត្រូវក្រុមគណៈកម្មការចោទសួរភ្លាម ដើម្បីស្វែងរកមូលហេតុពាក់ព័ន្ធនឹងសភាពឈឺជើងរបស់លោកដោយគ្មានមូលហេតុ និងស្វែងរកហេតុផលដែលធ្វើឱ្យលោកបន្ថយការវាយសម្រុកទៅលើកីឡាករយ៉ាម រ៉េត ដែលតាមពិតគឺត្រូវសន្លប់តាំងពីទឹកទី៣ ព្រោះតែអស់ស៊ុហ្វទៅហើយនោះ។ ក្រោយការបកស្រាយម្នាក់ៗនិយាយថា បើកុំតែ យ៉ាម រ៉េត មិនច្បាស់ពីស្នៀតដែលត្រូវវាយលុកក្នុងទឹកទី៤ និងទី៥ កុំអីសូម្បីតែលទ្ធផលឈ្នះពិន្ទុ ក៏ ហ៊ុន សោភ័ណ្ឌ ប្រហែលមិនទទួលបាននោះដែរនាពេលនោះ ។ គូប្រកួតទាំងពីរនេះត្រូវគេអះអាងថា នឹងជួបគ្នាម្តងទៀតក្នុងពេលឆាប់ៗដើម្បីឱ្យប្រាកដថា តើនរណាជាអ្នកឈ្នះសម្រាប់ការប្រកួតលើកក្រោយ ៕
ចែករំលែកព័តមាននេះ