ក្រុងប៉ោយប៉ែត ៖ រថយន្តពន្លត់អគ្គិភ័យរបស់អាជ្ញាធរក្រុងប៉ោយប៉ែត និងរថយន្តពន្លត់អគ្គិភ័យរបស់ក្រុមហ៊ុនកាស៊ីណូ ព្រមទាំងរថយន្តពន្លត់អគ្គិភ័យរបស់អាជ្ញាធរថៃដែលមានព្រំប្រទល់ជាប់គ្នាសរុបជាង១០គ្រឿងបានវាយប្រយុទ្ធយ៉ាងខ្លាំងក្លាបង្ក្រាបអគ្គិភ័យដែលឆាបឆេះផ្ទះថ្មធំមួយជារបស់ថៅកែខោអាវជជុះល្បីឈ្មោះម្នាក់រកស៊ីលក់ដូរនៅផ្សាររុងក្លឿ ប្រទេសថៃ ជាប់ក្រុងប៉ោយប៉ែត ប្រទេសកម្ពុជា មកដល់ពេលនេះជិត៣ម៉ោងហើយភ្លើងបានប្រើអំណាចទំពាលេបសាច់ក្រណាត់ខោអាវជជុះយ៉ាងហំហាន ហាក់មិនញញើតកម្លាំងទឹករបស់សមត្ថកិច្ចបន្តិចណាឡើយ… ពោលគឺមិនទាន់រលត់ទេ… ការឆេះនេះបានបង្កឱ្យមានអណ្តាតភ្លើង និងផ្សែងខ្មៅអាប់ខ្មួលខ្មាញ់អណ្តែតត្រសែតទៅលើអាកាសវេហាស៍ ។
អគ្គិភ័យដែលមើលទៅខ្មៅអាប់គួរឱ្យរន្ធត់នេះបានកើតឡើងនៅ ភូមិក្បាលស្ពាន២ សង្កាត់ប៉ោយប៉ែត កណ្ដាលក្រុងប៉ោយប៉ែត បង្កឱ្យមានការភ្ញាក់ផ្អើលយ៉ាងខ្លាំងដល់អ្នកក្រុងប៉ោយប៉ែត កាលពីវេលាម៉ោង១១និង៣៥នាទី ថ្ងៃទី១៥ កម្ភៈ ២០១៣ ហើយពេលនេះប៉ូលិសកំពុងចាត់ចែងបាញ់ទឹកពន្លត់យ៉ាងញាប់ដៃញាប់ជើង… រថយន្តពន្លត់អគ្គិភ័យជាង១០គ្រឿងបានផ្លាស់ប្តូរវេនគ្នាបាញ់ទឹកពន្លត់យ៉ាងសកម្ម… បានជាមិនងាយរលត់ ពីព្រោះតែភ្លើងឆេះសាច់ក្រណាត់ខោអាវជជុះដែលដាក់ស្តុបពេញផ្ទះ ដូច្នេះធ្វើឱ្យភ្លើងឆេះងំមិនងាយរលត់ទេ ។
ថៅកែខោអាវជជុះដែលភ្លើងកំពុងឆេះផ្ទះរបស់គាត់នេះឈ្មោះម៉េង ហ៊ាង អាយុ៤៥ឆ្នាំ មានប្រពន្ធឈ្មោះម៉ី…. ពេលដែលអគ្គិភ័យចាប់ផ្តើមឆាបឆេះ ប្តី-ប្រពន្ធថៅកែខោអាវជជុះនេះមិននៅផ្ទះទេ គឺចេញទៅលក់ដូរនៅផ្សាររុងក្លឿ ប្រទេសថៃ អស់ហើយ នៅសល់តែកូនៗប៉ុន្មាននាក់ប៉ុណ្ណោះចាំផ្ទះ។
មូលហេតុដែលឆាបឆេះមិនទាន់ត្រូវបានសមត្ថកិច្ចអះអាងជាផ្លូវការថា បណ្តាលមកពីអ្វីនៅឡើយទេ ប៉ុន្តែបើតាមអ្នកនៅក្បែរកន្លែងកើតហេតុបាននិយាយថា មុនពេលឆាបឆេះគេឮស្នូរសំឡេងផ្ទុះលាន់ឡើងដូចជាផ្ទុះហ្គាស ហើយបន្តិចក្រោយមកមានការឆាបឆេះតែម្តង… សណ្ឋានផ្លូវនៅទីនោះហាក់ពិបាកចេញចូលបន្តិច ពីព្រោះតែរបងថ្មធ្វើសម្រាប់តែរថយន្តតូចរបស់ម្ចាស់ផ្ទះចេញ-ចូលផ្ទះប៉ុណ្ណោះ… ចៀសវាងភ្លើងឆេះរាលដាលធ្ងន់ធ្ងរ អាជ្ញាធរបានបញ្ជាឱ្យយកអិុចស្កាវាទ័រ វាយកម្ទេចរបងថ្មរបស់ម្ចាស់ផ្ទះចោល ដើម្បីបើកផ្លូវឱ្យរថយន្តពន្លត់អគ្គិភ័យចូលបាញ់ទឹក ៕
ចែករំលែកព័តមាននេះ