ខេត្តកំពត ៖ លំនៅឋានប្រជាពលរដ្ឋខ្មែរអ៊ិស្លាម មួយខ្នងមានទំហំ៨មែ៉ត្រគុណ១១មែ៉ត្រ សង់អំពីឈើ ដំបូលប្រក់ហ្វីប្រូស៊ីម៉ង់ត៍ ជញ្ជាំងក្តារ រនាបក្តារ បានត្រូវអគ្គិភ័យលេបត្របាក់ហ្មត់ កាលពីវេលាម៉ោង១១យប់ថ្ងៃទី២៧ វិច្ឆិកា ស្ថិតនៅក្នុងភូមិម៉ាក់ប្រាង ឃុំកំពង់គ្រែង ស្រុកទឹកឈូ ។តាមសម្តីម្ចាស់ផ្ទះឈ្មោះ លី ម៉ាត់ អាយុ៤៩ឆ្នាំ ជាប្តី និងឈ្មោះ វ៉ា វី អាយុ៤៦ឆ្នាំ ជាប្រពន្ធបានឱ្យដឹងថា មុនពេលកើតហេតុផ្ទះដែលត្រូវភ្លើងឆេះនេះ ពុំមានមនុស្សស្នាក់នៅទេ រីឯសម្ភារ ប្រើប្រាស់លុយកាក់ក៏គ្មានទុកនៅក្នុងផ្ទះនេះដែរ ដោយក្រុមគ្រួសារគាត់ទៅស្នាក់នៅផ្ទះថ្មី ដែលទើបនឹងសង់ហើយមានចម្ងាយជាង៣០០មែ៉ត្រពីផ្ទះឆេះនេះ ។
ម្ចាស់ផ្ទះឱ្យដឹងថា ផ្ទះរបស់ខ្លួនពុំមានតភ្លើងអគ្គិសនីចូលទេ ប្រហែលជាមានគេលួចដុតទើបឆេះអស់យ៉ាងនេះ ។ ពួកគាត់មានការសោកស្តាយយ៉ាងខ្លាំង ទោះបីជាគ្មានបាត់បង់សម្ភារ ឬទ្រព្យសម្បត្តិលុយកាក់ក៏ដោយចុះ។ ជុំវិញករណីអគ្គិភ័យឆេះលំនៅឋានខាងលើ សមត្ថកិច្ចប៉ុស្តិ៍រដ្ឋបាលឃុំបានសន្និដ្ឋានថា ពិតជាមានជនកំហូចលួចដុតបំផ្លាញដោយមានគំនិតឈ្នានីសលើម្ចាស់ផ្ទះនេះ ។ ទោះជាយ៉ាងណា សមត្ថកិច្ចកំពុងស្រាវជ្រាវរកមុខជនដៃដល់ ដើម្បីចាប់ខ្លួនយកមកផ្តន្ទាទោសតាមច្បាប់ ៕
ចែករំលែកព័តមាននេះ