រាជធានីភ្នំពេញ ៖ ជាងជួសជុលម៉ូតូម្នាក់បានត្រូវគេបោកយកម៉ូតូទៅបាត់ តែសំណាងល្អ ម៉ូតូនេះបាត់តែ២ថ្ងៃ ក៏ត្រូវម្ចាស់តាមរកឃើញវិញកាលពីវេលាម៉ោង១១និង៣០នាទីព្រឹកថ្ងៃទី១ តុលា ខណៈជនសង្ស័យយកទៅផ្ទះជួលក្នុងភូមិសាមគ្តី សង្កាត់ឫស្សីកែវ ខណ្ឌឫស្សីកែវ ហើយក៏ឃាត់ខ្លួនជនឆបោករូបនេះប្រគល់ឱ្យសមត្ថកិច្ចចាត់ការតាមផ្លូវច្បាប់ ។
មន្ត្រីប៉ូលិសព្រហ្មទណ្ឌខណ្ឌសែនសុខ ឱ្យដឹងថា ជនសង្ស័យខាងលើឈ្មោះ ម៉ុន ថារី ភេទប្រុស អាយុ២០ឆ្នាំ ជាកម្មករសំណង់ ស្នាក់នៅផ្ទះជួលក្នុងក្រុមទី២ ផ្លូវលំ ភូមិសាមគ្គី សង្កាត់ឫស្សីកែវ ខណ្ឌឫស្សីកែវ ។ ចំណែកម្ចាស់ម៉ូតូឈ្មោះ គ្រី ចាន់ថន ភេទប្រុស អាយុ២២ឆ្នាំ ជាជាងជួសជុលម៉ូតូស្នាក់នៅភូមិស្លែងដីដុះ ឃុំព្រែកតាទែន ស្រុកពញាឮ ខេត្តកណ្តាល ។
មន្រី្តប៉ូលិសបន្តថា កាលពីថ្ងៃទី២៩ កញ្ញា ជនសង្ស័យបានប្រើល្បិចឱ្យម្ចាស់ម៉ូតូដែលជាមនុស្សធ្លាប់ស្គាល់គ្នាយកម៉ូតូហុងដាគុបជ្រុងជូនខ្លួនទៅទិញគ្រឿងបន្លាស់ម៉ូតូនៅផ្សារព្រែកព្នៅ ខណ្ឌសែនសុខ ។ ពេលដល់ផ្សារព្រែកព្នៅ ជនសង្ស័យបានប្រើល្បិចឱ្យម្ចាស់ម៉ូតូចាំនៅមុខផ្សារមួយភ្លែតដោយគេខ្ចីម៉ូតូទៅលេងបងប្អូនបន្តិច ក៏ជិះម៉ូតូយកទៅបាត់ស្រមោលតែម្តង ។
នៅថ្ងៃទី១ តុលា ម្ចាស់ម៉ូតូបានតាមរកជនសង្ស័យឃើញជាមួយម៉ូតូរបស់ខ្លួននៅចំណុចខាងលើ ក៏នាំជនសង្ស័យប្រគល់ឱ្យប៉ូលិសប៉ុស្តិ៍ព្រែកព្នៅ ដើម្បីចាត់ការទៅតាមច្បាប់ ៕
ចែករំលែកព័តមាននេះ