ខេត្តកំពង់ចាម ៖ ក្មេងទំនើង២ក្រុមបានផ្ទុះហិង្សាដាក់គ្នានៅកន្លែងរាំធុងបាស់ក្នុងពិធីសែនព្រេនកូនកំលោះ-ក្រមុំ១គូ នៅក្នុងភូមិស្វាយពក ឃុំមៀន ស្រុកអូររាំងឪ កាលពីវេលាម៉ោង៧និង៣០នាទីយប់ថ្ងៃទី១៥ សីហា បណ្តាលឱ្យយុវជនម្នាក់ឈ្មោះហឿន ជំនោរ អាយុ២១ឆ្នាំ រស់នៅភូមិមេឡូ ឃុំមៀន រងរបួសធ្ងន់ និងក្រោយមកក៏បានស្លាប់ពេលបញ្ជូនទៅសង្គ្រោះនៅមន្ទីរពេទ្យបង្អែកស្រុកអូររាំងឪ ។
លោកញែ៉ម សុខុម អធិការនគរបាលស្រុកអូររាំងឪ ប្រាប់ឱ្យដឹងថា នៅភូមិ-ឃុំខាងលើនាថ្ងៃនោះមានគេរៀបចំសែនព្រេន ដល់គូស្វាមីភរិយាវ័យចំណាស់១គូ តាមប្រពៃណីខ្មែរ ហើយនៅពេលយប់មានជាក់ធុងបាស់រាំកម្សាន្តលេង ដោយមានអ្នកភូមិផងរបងជាមួយមកចូលរាំសប្បាយផងដែរ ។ ខណៈពេលកំពុងរាំលេងនោះ ស្រាប់តែមានក្មេងទំនើង២ក្រុមឈ្លោះប្រកែកគ្នាទៅវិញទៅមក ហើយក្រុមនៅភូមិព្រៃសំបួរ ឃុំមៀននេះដែរ បានយកអាវុធចុងស្រួចមកចាក់ត្រូវពោះរបស់យុវជនឈ្មោះជំនោរ នៅចម្ងាយប្រហែល២០ម៉ែត្រពីវង់រាំ ។ បន្ទាប់មកអ្នករងរបួសត្រូវបានសាច់ញាតិនាំទៅសង្គ្រោះនៅមន្ទីរពេទ្យបង្អែកស្រុកអូររាំងឪ តែដោយរបួសធ្ងន់ពេក គ្រូពេទ្យមិនអាចសង្គ្រោះបានក៏ស្លាប់ទៅ ។
លោកញ៉ែម សុខុម បញ្ជាក់ថា ចំពោះមូលហេតុដែលឈានដល់ផ្ទុះហិង្សានេះ គឺបណ្តាលមកពីមានជម្លោះរវាងគ្នាទៅវិញទៅមកនាពេលកន្លងមក ។ លុះពេលឃើញគ្នានៅកន្លែងរាំសែនព្រេនក៏បញ្ចេញកំហឹងដាក់គ្នា ទើបក្រុមភូមិព្រៃសំបួរ យកអាវុធចុងស្រួចមកចាក់ត្រូវពោះអ្នករងគ្រោះបណ្តាលឱ្យស្លាប់ ។ ពេលនេះ មន្ត្រីជំនាញកំពុងស្រាវជ្រាវតាមចាប់ខ្លួនក្រុមជនដៃដល់ ដើម្បីនាំខ្លួនមកផ្តន្ទាទោសតាមច្បាប់ ៕
ចែករំលែកព័តមាននេះ