បន្ទាប់ពីបានឆ្លងកាត់ការប្រកួតអស់រយៈពេល១៦ថ្ងៃចាប់ពីថ្ងៃទី ២៧កក្កដាដល់ថ្ងៃទី១២សីហារួចមក ព្រឹត្តិការណ៍អូឡាំពិករដូវក្តៅលើកទី៣០នៅទីក្រុងឡុង ប្រទេសអង់គ្លេសបានប្រារព្វពិធីបិទការប្រកួតជាផ្លូវការណ៍របស់ខ្លួនហើយកាលពីល្ងាចថ្ងៃអាទិត្យ ទី១២សីហា នៅទីក្រុង ប្រទេសអង់គ្លេសដោយមានការចូលរួមពីមនុស្សប្រមាណជា៨ម៉ឺននាក់ ។
ឆ្លងកាត់ការប្រកួតពេញ១៦ថ្ងៃ សហរដ្ឋអាមេរិកគឺជាប្រទេសនាំមុខគេលើតារាងមេដាយសរុបដោយបានមានមេដាយ ១០៤គ្រឿងក្នុងនោះមាស ៤៦គ្រឿង។ ចិនដែលជាប្រទេសនាំមុខគេកាលពីព្រឹត្តិការណ៍អូឡាំពិកក្រុងប៉េកាំងឆ្នាំ ២០០៨ ស្ថិតនៅលំដាប់ទី២ដោយមានមេដាយសរុប ៨៧គ្រឿង ក្នុងនោះមាស ៣៨គ្រឿង ។ ដោយឡែកម្ចាស់ផ្ទះអង់គ្លេសស្ថិតនៅលំដាប់ទី៣ មានមេដាយមាស២៩គ្រឿង ប្រាក់១៧ សំរឹទ្ធិ ១៩ សរុប៦៥គ្រឿង ។ ស្ថិតនៅលំដាប់ទី៤ គឺប្រទេសរុស្ស៊ី ។ រុស្ស៊ីថ្វីដ្បិតតែដណ្តើមបានមេដាយសរុបដល់ទៅ៨២គ្រឿង ប៉ុន្តែចំនួនមេដាយមាសចាញ់អង់គ្លេស៥គ្រឿង នាំមុខកូរ៉េខាងត្បូងមានមេដាយមាស ១៣គ្រឿង ប្រាក់៨ និងសំរឹទ្ធិ ៧គ្រឿង។ សរុបមេដាយ ២៨គ្រឿង ។
ប្រធានគណៈកម្មាធិការអូឡាំពិកអន្តរជាតិលោកហ្សាក់ រ៉ូសដែលបានចូលរួមក្នុងពិធីបិទការប្រកួតមានរយៈពេល៣ម៉ោងថ្លែងសរសើរព្រឹត្តិការណ៍លើកនេះថា ពោរពេញដោយការរីករាយនិងភាពរុងរឿង ។ លោកបញ្ជាក់ថា ៖«តាមរយៈការប្រកួតដោយយុត្តិធម៌របស់អស់លោកអ្នក ការគោរពលើគូប្រកួត ព្រមទាំងភាពអនុគ្រោះរបស់អស់លោកអ្នកពេលបរាជ័យក៏ដូចជាទទួលបានជ័យជម្នះគឺមានន័យថា អស់លោកអ្នកទទួលបានសិទ្ធិស្របច្បាប់មួយក្នុងនាមជាអត្តពលិកអូឡាំពិក ។
ទាំងនេះគឺជាព្រឹត្តិការណ៍ដែលពោរពេញដោយភាពសប្បាយរីករាយនិងភាពរុងរឿង »។អំឡុងពិធីនោះ ក៏មានការប្រគល់ទង់អូឡាំពិកឱ្យទៅអភិបាលក្រុងរីយ៉ូ ប្រទេសប្រេស៊ីលផងដែរដែលទីក្រុងនេះនឹងធ្វើជាម្ចាស់ផ្ទះអូឡាំពិករដូវក្តៅឆ្នាំ ២០១៦ ៕
ចែករំលែកព័តមាននេះ