ខេត្តកំពង់ឆ្នាំង ជនសង្ស័យ២នាក់ប្តីប្រពន្ធវ័យក្មេងមួយគូត្រូវបានប៉ូលិសព្រហ្មទណ្ឌក្រុងកំពង់ឆ្នាំងធ្វើការចាប់ឃាត់ខ្លួន កាលពីព្រឹកថ្ងៃទី១ សីហា ដោយប្តីត្រូវចោទពីបទចោរកម្ម និងប្រពន្ធពីបទសមគំនិត ដែលប្រព្រឹត្តឡើងកាលពីវេលាម៉ោង១១និង៣០នាទីយប់ថ្ងៃទី៣១ កក្កដា ដោយបន្លំលួចយកម៉ូតូម៉ាកហុងដាសេ១២៥ ស៊េរី២០០៩ មួយគ្រឿងពីជនរងគ្រោះ ខណៈដែលមានគ្រោះថ្នាក់ចរាចរណ៍បានកើតឡើងនៅលើកំណាត់ផ្លូវជាតិលេខ៥ ត្រង់ចំណុចមុខផ្សារទួលក្រឡាញ់ ក្នុងភូមិទួលក្រឡាញ់ សង្កាត់កំពង់ឆ្នាំង ក្រុងកំពង់ឆ្នាំង ។
លោកហ៊ុល វាសនា អធិការរងក្រុងកំពង់ឆ្នាំង បានឱ្យដឹងថា ជនសង្ស័យធ្វើជាអ្នកចិត្តបុណ្យ តែក្នុងខ្លួនមានចិត្តបាបនោះឈ្មោះអឿង សុធារ៉ា អាយុ២៦ឆ្នាំ មានទីលំនៅភូមិស្រែព្រីង សង្កាត់កំពង់ឆ្នាំង ចំណែកប្រពន្ធឈ្មោះឈុន ស្រីរុំ អាយុ២៦ឆ្នាំ ។ មុនពេលកើេតហេតុមានយុវជនម្នាក់ឈ្មោះឆាយ ប៉ាវ អាយុ១៨ឆ្នាំ មានទីលំនៅភូមិម៉ុងបារាំង សង្កាត់ប្អេរ ក្រុងកំពង់ឆ្នាំង បានខ្ចីម៉ូតូគេមួយគ្រឿងម៉ាកហុងដាសេ១២៥ សេ៊រី២០០៩ ពណ៌ខ្មៅ ជិះទៅទិញទឹកបរិសុទ្ធ ហើយបានជិះបន្តទៅភូមិទួលក្រឡាញ់ ក្នុងល្បឿនយ៉ាងលឿន ។ លុះមកដល់ចំណុចកើតហេតុបានវ៉ារថយន្តមួយគ្រឿងទៀត ក៏ស្រាប់តែដួលបណ្តាលឱ្យរងរបួសធ្ងន់តែម្នាក់ឯង ហើយរថយន្តបានព្យាយាមបើកគេចផុត ។ លោកបានបន្តថា នៅពេលនោះជនសង្ស័យឈ្មោះអឿង សុធារ៉ា បានរត់មកជួួយជនរងគ្រោះ ប៉ុន្តែឆ្លៀតឱកាសឃើញជនរងគ្រោះកំពុងរងរបួសធ្ងន់មិនទាន់ដឹងខ្លួន ក៏បន្លំអូសយកម៉ូតូទៅលាក់ទុកក្នុងបន្ទប់ផ្ទះរបស់ខ្លួន ដោយគ្របភួយ និងអាវធំពីលើថែមទៀត ។
ដោយឡែក ជនរងគ្រោះដែលខ្ចីម៉ូតូគេជិះវិញ ក្រោយពីដឹងខ្លួនបានបន្តិចពេលគេសួរនាំប្រាប់គេថា មានចោរវាយប្លន់ម៉ូតូ ធ្វើឱ្យប៉ូលិសកាន់តែឈឺក្បាលថែមទៀត តែតាមការពិតជនរងគ្រោះស្រវឹងជិះម៉ូតូលឿនដួលខ្លួនឯងសោះ ។លោកអធិការរងរូបនោះបានបន្តថា លុះព្រឹកឡើងលោកបានដឹកនាំកម្លាំងចុះស្រាវជ្រាវ ដោយផ្អែកលើសាក្សីជាអ្នករត់ម៉ូតូឌុបផងនោះ ទើបលោកបានទៅឆែកផ្ទះឈ្មោះអឿង សុធារ៉ា ហើយឈ្មោះនេះបានសារភាពថា ខ្លួនគឺជាអ្នកយកម៉ូតូជនរងគ្រោះទៅរក្សាទុកឱ្យ ប៉ុន្តែលោកថា នេះមិនមែនយកទៅទុកឱ្យទេ គឺលួចយកទៅលាក់ទុកក្នុងបន្ទប់ ព្រោះមានយកភួយគ្របពីលើ មិនត្រឹមតែប៉ុណ្ណោះថែមទាំងដោះក្បាលចង្កៀងមុខម៉ូតូលាក់ទុកកន្លែងផ្សេងទៀតផង ហើយបើកុំតែមានសាក្សីចង្អុលប្រាប់និងឆែកឃើញ គឺបាត់តែម្តង ។
ដោយហេតុនេះហើយ និងដោយយោងតាមបណ្តឹងរបស់ម្ចាស់ម៉ូតូផងនោះ ទើបលោកសម្រេចកសាងសំណុំរឿងបញ្ជូនទៅតុលាការតាមផ្លូវច្បាប់ ចំណែកឯប្រពន្ធក៏ជាប់ក្នុងបទសមគំនិតដែរ ព្រោះពេលប្តីអូសម៉ូតូគេទៅលាក់ទុកប្រពន្ធក៏ជួួយលាក់បាំង និងលាក់ប៉ូលិសពេលទៅសួរនាំផងដែរ ៕
ចែករំលែកព័តមាននេះ