រាជធានីភ្នំពេញ ៖ ការប្រកួតកីឡាជ្រើសរើសជើងឯកនិស្សិតឧត្តមសិក្សា និងមធ្យមសិក្សាបច្ចេកទេសទូទាំងប្រទេសឆ្នាំសិក្សា២០១១-២០១២បានប្រកាសបើកការប្រកួតជាផ្លូវការនៅរាជធានីភ្នំពេញ ចាប់ពីថ្ងៃទី២០ មិថុនា នេះតទៅ ហើយការប្រកួតនេះធ្វើឡើងក្រោមប្រធានបទ«កីឡាគ្មានផ្សែងថ្នាំជក់» ដែលអាចចាត់ទុកថាជាព្រឹត្តិការណ៍ដ៏មានសារសំខាន់បំផុត និងមិនធ្លាប់មានពីមុនមកឡើយ ។
ពិធីបើកការប្រកួតនាឱកាសនោះមានការចូលរួមពីសំណាក់សិស្ស-និស្សិតជិត៣.០០០នាក់ និងមានកីឡាករកីឡាការិនីជាង១.០០០នាក់ ។ លោក ប៊ុន សុខ រដ្ឋលេខាធិការក្រសួងអប់រំយុវជននិងកីឡា ដែលបានចូលរួមជាគណៈអធិបតីក្នុងពិធីបើកការប្រកួតនេះបានមានប្រសាសន៍ផ្តាំផ្ញើដល់សិស្ស-និស្សិតដែលមកពីតាមគ្រឹះស្ថានឧត្តមសិក្សា មធ្យមសិក្សា និងវិទ្យាស្ថាននានាថា ធ្វើយ៉ាងណាត្រូវគោរពឱ្យបាននូវសីលធម៌ ការសាមគ្គី រក្សាឱ្យបាននូវវិន័យល្អក្នុងនាមជាអ្នកកីឡា ។ ជាពិសេសគោរពឱ្យបានទៅតាមបទបញ្ជានៃការប្រកួតដែលគណៈកម្មការរៀបចំការប្រកួតបានដាក់ចេញ ។ លោករដ្ឋលេខាធិការបានមានប្រសាសន៍បន្ថែមទៀតថា ឆ្នាំនេះគណៈកម្មការរៀបចំការប្រកួតក៏មានកម្មវិធីបញ្ជ្រាបការអប់រំផ្សព្វផ្សាយអំពីកីឡាគ្មានផ្សែងថ្នាំជក់ផងដែរ ។ នេះគឺជាសកម្មភាពរួមចំណែកក្នុងការកាត់បន្ថយអត្រាមរណៈ និងការខាតបង់ថវិកាដោយសារការជក់បារី ហើយការជក់បារីបានធ្វើឱ្យប្រជាជនកម្ពុជាស្លាប់ជាង១ម៉ឺននាក់ជារៀងរាល់ឆ្នាំ ។
«កីឡាគ្មានផ្សែងថ្នាំជក់»គឺជាចលនាពិភពលោកមួយដើម្បីរួមចំណែកលើកកម្ពស់គុណភាពកីឡានិងការពារទស្សនិកជនពីការស្រូបផ្សែងបារីពីគេ ដែលបានផ្តួចផ្តើមឡើងដោយអង្គការសុខភាពពិភពលោកនាឆ្នាំ២០១២ ។ បណ្តាប្រទេស និងព្រឹត្តិការណ៍កីឡាជាច្រើន ទាំងថ្នាក់ជាតិ និងអន្តរជាតិទទួលយកគោលការណ៍កីឡាគ្មានផ្សែងថ្នាំជក់ ដូចជា កីឡាអូឡាពិក២០០៨ នៅចិន និងកីឡាស៊ីហ្គេមជាដើម ៕
ចែករំលែកព័តមាននេះ