រាជធានីភ្នំពេញ ៖ ក្រុមបាល់ទាត់ព្រះខ័នរាជស្វាយរៀង បានបង្កើតរឿងភ្ញាក់ផ្អើល និងភាពរីករាយខ្លាំងដល់អ្នកគាំទ្រទស្សនាផ្ទាល់នៅពហុកីឡដ្ឋានជាតិមរតកតេជោ និងនៅតាមគេហដ្ឋាន បន្ទាប់ពីបានបំបាក់ក្រុមជើងខ្លាំងមីយ៉ាន់ម៉ា Shan United លទ្ធផល…
រាជធានីភ្នំពេញ ៖ ក្រុមបាល់ទាត់ព្រះខ័នរាជស្វាយរៀង បានបង្កើតរឿងភ្ញាក់ផ្អើល និងភាពរីករាយខ្លាំងដល់អ្នកគាំទ្រទស្សនាផ្ទាល់នៅពហុកីឡដ្ឋានជាតិមរតកតេជោ និងនៅតាមគេហដ្ឋាន បន្ទាប់ពីបានបំបាក់ក្រុមជើងខ្លាំងមីយ៉ាន់ម៉ា Shan United លទ្ធផល ៦ទល់នឹង២ សម្រាប់ការប្រកួតជើងទី១ វគ្គ៨ក្រុមចុងក្រោយ ពានរង្វាន់ AFC Challenge League រដូវកាល ២០២៤-២៥ កាលពីយប់ថ្ងៃទី៦ ខែមីនា ឆ្នាំ២០២៥។
ខ្សែប្រយុទ្ធសញ្ជាតិប្រេស៊ីល Cristian Roque បង្ហាញទម្រង់លេងដ៏ទាក់ទាញបំផុតនៅលើទីលាន ក្រោយរកបាន៣គ្រាប់ម្នាក់ឯងក្នុងចំណោម៦គ្រាប់របស់ព្រះខ័នរាជស្វាយរៀងយកឈ្នះលើភ្ញៀវ Shan United ស្របពេលកីឡាករសញ្ជាតិជប៉ុន Roy Fujii រកបាន១គ្រាប់ កីឡាករ មិន រតនៈ ១គ្រាប់ ព្រមទាំង១គ្រាប់ទៀតជាគ្រាប់បាល់ចូលទីខ្លួនឯងពីសំណាក់ខ្សែការពារក្រុមភ្ញៀវ។
តាមរយៈលទ្ធផលនេះ ជាទុនដ៏សំខាន់សម្រាប់ព្រះខ័នរាជស្វាយរៀងនៅជើងទី២ ធ្វើឡើងនៅទឹកដីមីយ៉ាន់ម៉ា នាថ្ងៃទី១៣ ខែមីនា ឆ្នាំ២០២៥ ដ្បិតក្រុមជើងខ្លាំងកម្ពុជាមួយនេះ មានភាគរយខ្ពស់ជាងក្រុម Shan United សម្រាប់ដំណើរឆ្ពោះទៅវគ្គពាក់កណ្ដាលផ្ដាច់ព្រ័ត្រ។
គិតត្រឹមពេលនេះ ព្រះខ័នរាជស្វាយរៀងរកបានប្រាក់រង្វាន់ ១៨ម៉ឺនដុល្លារអាមេរិកដាក់ក្នុងហោប៉ៅរួចហើយ នឹងត្រៀមក្លាយជាម្ចាស់ប្រាក់រង្វាន់ ១២ម៉ឺនដុល្លារបន្ថែមទៀត ប្រសិនបើឈ្នះ Shan United បន្តឡើងទៅវគ្គពាក់កណ្តាលផ្តាច់ព្រ័ត្រ។ ដោយហេតុថា ការប្រកួតពានរង្វាន់កម្រិតទី៣ ប្រចាំតំបន់អាស៊ី AFC Challenge League រដូវកាល ២០២៤-២៥ ចំណាយលើប្រាក់រង្វាន់សរុបចំនួន ៤,៤២០,០០០ដុល្លារ។
១៨ក្រុមចូលវគ្គសន្សំពិន្ទុតាមពូលនីមួយៗ ទទួលបានប្រាក់រង្វាន់ ១០ម៉ឺនដុល្លារ។ ក្រុមឡើងដល់វគ្គ៨ក្រុមចុងក្រោយបាន ៨ម៉ឺនដុល្លារបន្ថែម។ ក្រុមឡើងដល់វគ្គពាក់កណ្តាលផ្តាច់ព្រ័ត្របាន ១២ម៉ឺនដុល្លារបន្ថែម។ ចំណែកក្រុមរងជើងឯកបានប្រាក់រង្វាន់ ៥០ម៉ឺនលានដុល្លារ ខណៈក្រុមជើងឯកបានប្រាក់រង្វាន់ ១លានដុល្លារ។ ដូច្នេះក្រុមឈ្នះជើងឯកនឹងទទួលប្រាក់រង្វាន់សរុបចំនួន ១,៣លានដុល្លារ រីឯក្រុមរងជើងឯករកបានសរុបចំនួន ៨០ម៉ឺនដុល្លារ។
សូមជម្រាបជូនថា AFC Challenge League រដូវកាល ២០២៤-២៥ ត្រូវបានសហព័ន្ធបាល់ទាត់ទ្វីបអាស៊ី AFC បែងចែកជា២តំបន់ តំបន់ខាងកើត និងតំបន់ខាងលិច ដោយប្រកួតវគ្គចែកពូលទៅតាមតំបន់រៀងខ្លួន ដើម្បីចម្រាញ់យកក្រុមបន្តទៅកាន់វគ្គ៨ក្រុមចុងក្រោយ រហូតដល់រកឃើញមួយក្រុមពីតំបន់ខាងកើត និងមួយក្រុមពីតំបន់ខាងលិច ដើម្បីទូទាត់គ្នា នៅវគ្គផ្ដាច់ព្រ័ត្រ។
វគ្គ៨ក្រុមចុងក្រោយ តំបន់ខាងកើត ៖
-ក្រុមព្រះខ័នរាជស្វាយរៀង (កម្ពុជា) ប៉ះក្រុម Shan United (មីយ៉ាន់ម៉ា)
-ក្រុម Tainan City (ឆាយនីសតៃប៉ិ) ប៉ះក្រុម Madura United (ឥណ្ឌូណេស៊ី)
វគ្គ៨ក្រុមចុងក្រោយ តំបន់ខាងលិច ៖
-ក្រុម Al-Arabi (គុយវ៉ែត) ប៉ះក្រុម Al-Seeb (អូម៉ង់)
-ក្រុម East Bengal (ឥណ្ឌា) ប៉ះក្រុម Arkadag (តួកម៉េនីស្ថាន)៕ រូបភាព ៖ Preah Khan Reach Svay Rieng FC និង AFC Challenge League
ចែករំលែកព័តមាននេះ