រាជធានីភ្នំពេញ ៖ ទីភ្នាក់ងារសហប្រតិបត្ដិការអន្ដរជាតិកូរ៉េ ដែលត្រូវបានគេស្គាល់ថាកូយកា នឹងប្រគល់មជ្ឈមណ្ឌលអប់រំពីចម្ងាយ
(e-Leaning Center) ជូនកម្ពុជា នាថ្ងៃទី០៤ ឧសភា ឆ្នាំ២០១២ នៅវិទ្យាស្ថានបច្ចេកវិទ្យាកម្ពុជា ក្នុងពិធីដែលនឹងប្រារព្ធឡើង
រាជធានីភ្នំពេញ ៖ ទីភ្នាក់ងារសហប្រតិបត្ដិការអន្ដរជាតិកូរ៉េ ដែលត្រូវបានគេស្គាល់ថាកូយកា នឹងប្រគល់មជ្ឈមណ្ឌលអប់រំពីចម្ងាយ
(e-Leaning Center) ជូនកម្ពុជា នាថ្ងៃទី០៤ ឧសភា ឆ្នាំ២០១២ នៅវិទ្យាស្ថានបច្ចេកវិទ្យាកម្ពុជា ក្នុងពិធីដែលនឹងប្រារព្ធឡើងក្រោមអធិបតីភាពលោក អឹុម សិទ្ធី រដ្ឋមន្ដ្រីក្រសួងអប់រំ យុវជន និងកីឡា និងលោក គីម ហានស៊ូ ឯកអគ្គរដ្ឋទូតសាធារណរដ្ឋកូរ៉េប្រចាំនៅកម្ពុជា ។
មជ្ឈមណ្ឌលអប់រំពីចម្ងាយនេះ ជាសមិទ្ធផលមួយក្នុងចំណោមសមិទ្ធផលជាច្រើននៃគម្រោងតម្លៃ១លានដុល្លារ ដែលមានឈ្មោះថា ការពង្រឹងសមត្ថភាពអប់រំពីចម្ងាយដល់ប្រទេសកម្ពុជា សម្រាប់អាស៊ានសាយប៊ឺយូនី វឺស៊ីធី ដែលត្រូវបានគាំទ្រថវិកាដោយរដ្ឋាភិបាលកូរ៉េ តាមរយៈកូយកាប្រចាំនៅកម្ពុជា សម្រាប់រយៈពេល៣ឆ្នាំ ពីឆ្នាំ២០១០ ដល់២០១២ ដោយរាប់បញ្ចូលទាំងដំណាក់កាលសិក្សាលទ្ធភាពផងដែរ។
គម្រោងនេះ ត្រូវបានអនុវត្ដស្របពេលជាមួយគ្នាជាមួយគម្រោង៣ផ្សេងទៀតក្នុងប្រទេសឡាវ ភូមា និងវៀតណាម ដើម្បីសម្រេចឱ្យបានគោលដៅចំនួនពីរ ។ ទីមួយ ដើម្បីកសាងសមត្ថភាពធនធានមនុស្សរបស់ប្រទេសកម្ពុជា តាមរយៈសាកលវិទ្យាល័យសាយប៊ឺអាស៊ាន ដោយបង្កើតមជ្ឈមណ្ឌលអប់រំពីចម្ងាយនៅវិទ្យាស្ថាន បច្ចេកវិទ្យាកម្ពុជា និងដោយផ្ទេរចំណេះដឹង និងបទពិសោធន៍របស់កូរ៉េ ។ ទីពីរ ដើម្បីរួមចំណែកកាត់បន្ថយភាពខុសគ្នានៃបច្ចេកវិទ្យាឌីជីថល និងពង្រីកកិច្ចសហប្រតិបត្ដិការលើវិស័យព័ត៌មានវិទ្យា និងបច្ចេកវិទ្យាទំនាក់ទំនងក្នុងចំណោមប្រទេសជាសមាជិកអាស៊ាន ។
លើសពីមជ្ឈមណ្ឌលអប់រំពីចម្ងាយនេះ គម្រោងនេះក៏ផ្ដល់អោយមន្ដ្រីមកពីវិទ្យាស្ថានបច្ចេកវិទ្យាកម្ពុជា និងក្រសួងអប់រំផងដែរនូវការគាំទ្រផ្សេងៗទៀត ដើម្បីធានាថាពួកគេអាចបន្ដគ្រប់គ្រងមជ្ឈមណ្ឌលនេះបាន បន្ទាប់ពីគម្រោងចប់ទៅ ។ ការគាំទ្រទាំងនោះរួមមាន ការបង្កើតប្រព័ន្ធគ្រប់គ្រងការសិក្សា កម្មវិធីសិក្សា និងសមាសធាតុនៃការអប់រំពីចម្ងាយ និងការពង្រឹងសមត្ថភាព តាមរយៈការអញ្ជើញមន្ដ្រីកម្ពុជា ទៅចូលរួមវគ្គបណ្ដុះបណ្ដាលនៅប្រទេសកូរ៉េ ។
គម្រោងនេះគឺជាជំហានទីមួយនៃកិច្ចខិតខំប្រឹងប្រែង ដែលនាំមុខដោយរដ្ឋាភិបាលកូរ៉េ ឆ្ពោះទៅកាន់គំនិតផ្ដួចផ្ដើមដើម្បីសមាហរណកម្មអាស៊ាន តាមរយៈការពង្រឹងហេដ្ឋារចនាសម្ព័ន្ធ និងធនធានមនុស្ស ផ្នែកព័ត៌មានវិទ្យា និងបច្ចេកវិទ្យា ទំនាក់ទំនងនៃប្រទេស CLMV ពោលគឺ កម្ពុជា ឡាវ ភូមា និងវៀតណាម ដើម្បីអោយប្រទេសទាំងនេះអាចដើរទាន់បណ្ដាប្រទេសជាសមាជិកអាស៊ានផ្សេងៗទៀត និងចូលរួមជាមួយសាកលវិទ្យាល័យសាយប៊ឺអាស៊ាន-កូរ៉េ ដែលត្រូវបានស្នើឱ្យបង្កើតឡើងកាលពីកិច្ចប្រជុំកំពូលអាស៊ានបូកកូរ៉េខែមិថុនាឆ្នាំ២០០៩ ។
ប្រសិនបើគម្រោងទីមួយនេះទទួលបានជោគជ័យ សាកលវិទ្យាល័យសាយប៊ឺអាស៊ាន-កូរ៉េ នឹងដើរតួនាទីយ៉ាងសំខាន់ក្នុងការតភ្ជាប់បណ្ដាប្រទេសជាសមាជិកអាស៊ាន ជាមួយសាធារណរដ្ឋកូរ៉េ ក្នុងការងារអប់រំពីចម្ងាយ ដោយផ្ដោតទៅលើការអភិវឌ្ឍធនធានមនុស្ស និងវិស័យអប់រំនៅក្នុងតំបន់ ៕
ចែករំលែកព័តមាននេះ