រាជធានីភ្នំពេញ ៖ ក្មេងទំនើង២ក្រុមបានដេញកាប់ចាក់ និងគប់ដុំថ្មដាក់គ្នាយ៉ាងអនាធិបតេយ្យនៅមុខក្លឹបស្ពេស ដែលមានទីតាំងនៅតាមបណ្ដោយមហាវិថីព្រះមុនីវង្ស ក្នុងសង្កាត់មិត្ដភាព ខណ្ឌ៧មករា កាលពីវេលាម៉ោង១រំលងអធ្រាត្រថ្ងៃទី២៨ មីនា ។
ប្រភពព័ត៌មានពីក្រុមបង្កម្នាក់ឈ្មោះធី សុធា ភេទប្រុស អាយុ១៨ឆ្នាំ ជាអ្នករត់តុនៅភោជនីយដ្ឋានម្លប់មៀន ស្នាក់នៅសង្កាត់ទន្លេបាសាក់ ខណ្ឌចំការមន ដែលត្រូវកងរាជអាវុធហត្ថឃាត់ខ្លួនបានឱ្យដឹងថា មុនពេលកើតហេតុក្រុមរបស់គេមានគ្នា៨នាក់ ជិះម៉ូតូ៣គ្រឿង ទៅអង្គុយលេងនៅមុខណាហ្គាវើល ស្រាប់តែមានយុវជន១ក្រុមទៀត មានគ្នា៦នាក់ ជិះម៉ូតូទៅរករឿងឈ្លោះប្រកែកជាមួយពួកគេ ហើយបោះពាក្យសំដីថា បើចង់ជួបពួកគេទៅចាំនៅមុខក្លឹបស្ពេស ។ ប្រភពដដែលបន្ដទៀតថា បន្ទាប់មកពួកខ្លួន ក៏ទៅចាំនៅមុខក្លឹបស្ពេស ក៏ឃើញក្រុមនោះដើរចេញពីក្នុងក្លឹប ។ ពួកខ្លួនដែលប្រដាប់ដោយដាវសាំមូរ៉ៃ និងកាំបិតបានរត់ទៅដេញកាប់និងចាក់ក្រុមនេោះ បណ្ដាលឱ្យរងរបួសម្នាក់ ស្របពេលនោះមានកម្លាំងកងរាជអាវុធហត្ថដើរល្បាតឃើញក៏ដេញប៉ផាប់ចាប់ពភីង បណ្ដាលឱ្យក្រុមរបស់ខ្លួនជិះម៉ូតូសេ១២៥ ស៊េរី២០០៨ ជិះគ្នា២នាក់ ទៅបុកគម្របលូខូចម៉ូតូខ្ទេចបើកទៅមុខលែងរួចហើយម្នាក់រត់ទៅជិះម៉ូតូអាយខុន ឯរត់ទៅពួននៅក្នុងហាងអីុនធើរណេតត្រូវកម្លាំងកងរាជអាវុធហត្ថក្របួចបានតែម្តង ។
បើតាមការបំភ្លឺរបស់ក្រុមជនរងគ្រោះឈ្មោះ ពេជ្រ សត្យា ភេទប្រុស អាយុ២១ឆ្នាំ រងរបួសបែកត្របកភ្នែកស្ដាំ និងម្នាក់ទៀតឈ្មោះប៊ុន សុខពិសិដ្ឋ អាយុ២៣ឆ្នាំ ជិះម៉ូតូស្គូពី ពណ៌ផ្ទៃមេឃលាយសបានឱ្យនិយាយថា ពួកគេជាជនរងគ្រោះមានគ្នា៦នាក់មិនបាន ទៅលេងនៅណាហ្គាវើលដូចក្រុមជនបង្កចោទប្រកាន់នោះទេ គឺពួកគេចេញពីផ្ទះនៅវេលាម៉ោង១០យប់ ហើយ ក៏នាំគ្នាទៅរាំកម្សាន្ដនៅក្លឹបស្ពេសតែម្ដងពោល គឺពុំមានទំនាក់ទំនងអីជាមួយក្រុមបង្កទេ ៕
ចែករំលែកព័តមាននេះ