ខេត្តកំពង់ស្ពឺ ៖ មរណភាពគួរឱ្យភ្ញាក់ផ្អើលបំផុតនាដើមឆ្នាំ២០១២នេះ គឺការស្លាប់របស់ជនជាតិបារាំង រួមជាមួយកូន៤នាក់នៅក្នុងរថយន្តពន្លិចទឹកត្រពាំងក្នុងបរិវេណដីលំនៅឋានរបស់ខ្លួន ក្នុងភូមិទួលធ្នង់ សង្កាត់រកាធំ ក្រុងច្បារមន កាលពីថ្ងៃទី១៤ មករា ។ រហូតមកដល់ពេលនេះ មូលហេតុនៃមរណភាពគ្រួសារជនជាតិបារាំងនេះ មិនទាន់ត្រូវបានបង្ហើបឱ្យដឹងថា បែបណានោះទេ ខណៈសមត្ថកិច្ចគ្រប់លំដាប់ថ្នាក់និងស្ថានទូតបារាំងប្រចាំកម្ពុជាកំពុងធ្វើការស៊ើបអង្កេតយ៉ាងស្ងៀមស្ងាត់ជុំវិញករណីនេះ នៅឡើយ ប្រយោជន៍ដើម្បីរកឱ្យឃើញថា តើមរណភាពដែលធ្វើឱ្យមានការចាប់អារម្មណ៍ជាទូទៅនេះមានមូលហេតុបែបណា ?
ជុំវិញមរណភាពគ្រួសារជនជាតិបារាំង រហូតដល់ការប្រទះឃើញសាកសពគឺផ្តើមចេញពីការបាត់ខ្លួន បុរសពោះម៉ាយបារាំង លោកឡូរ៉ង់់ វ៉ាលីយេ ព្រមទាំងកូនតូចៗចំនួន៤នាក់ ត្រូវបានសមត្ថកិច្ចធ្វើការតាមដានអស់រយៈពេល៤លើក។
លើកទី១-គឺការភ្ញាក់ផ្អើលពីប្រជាពលរដ្ឋក្នុងភូមិទួលធ្នង់ ពីការបាត់ខ្លួនតាំងពីក្នុងរដូវបុណ្យភ្ជុំបិណ្ឌខែកញ្ញា ហើយការបាត់ខ្លួននេះក៏ធ្វើឱ្យមានការឆោឡោនៅថ្ងៃទី៥ ធ្នូ ២០១១ ដោយសមត្ថកិច្ចបានចុះធ្វើការត្រួតពិនិត្យក្រៅបរិវេណផ្ទះទាំងពីរ តែពុំមានលទ្ធផលអ្វីនោះទេ ដោយបានទុកស្ថានភាពឱ្យនៅដដែល ។
លើកទី២-ក៏មានការត្រួតពិនិត្យម្តងទៀតនៅថ្ងៃទី៥ មករា ២០១២ ដោយមានការចូលរួមពីសមត្ថកិច្ចចម្រុះពាក់ព័ន្ធនឹងការងារបាត់ខ្លួនជនជាតិបារាំងនេះ តែការឆែកឆេរក្នុងផ្ទះមិនបានបង្ហាញថា ពួកគេស្ថិតនៅក្នុងផ្ទះទេ ។
លើកទី៣ នៅថ្ងៃទី១៤ មករា គឺជាថ្ងៃដែលបង្ហាញច្បាស់ថា ការបាត់ខ្លួនរបស់បារាំងពោះម៉ាយនិងពួកកូនៗមិនបានបាត់ទៅណាទេ គឺពួកគេស្លាប់ទាំងអស់ ហើយការភ្ញាក់ផ្អើលជុំវិញហេតុការណ៍នេះបានកើតឡើងដោយអ្នកភូមិម្នាក់ឈ្មោះផាត មានទីលំនៅក្នុងភូមិទួលធ្នង់ បានទៅទាក់លលកក្បែររបងផ្ទះបារាំងជាប់ស្រះទឹកទំហំ១០ម៉ែត្រ×៣០ម៉ែត្រ ជម្រៅប្រមាណ៣ទៅ៤ម៉ែត្រ ដោយសារឃើញដំបូលរថយន្តផ្នែកខាងក្រោយអណ្តែតប្រមាណ២តឹក ដោយសារទឹកត្រពាំងរីងស្ងួតនាខែប្រាំង ក៏សង្ស័យ ហើយរត់ទៅប្រាប់សមត្ថកិច្ចឱ្យមកត្រួតពិនិត្យ ។
ការត្រួតពិនិត្យលើកនេះមានសមត្ថកិច្ចចម្រុះបច្ចេកទេសវិទ្យាសាស្ត្រនៃអគ្គនាយកដ្ឋាននគរបាលជាតិ ស្ថានទូតបារាំង ក្រុមវេជ្ជបណ្ឌិត កងរាជអាវុធហត្ថខេត្ត-ក្រុងយ៉ាងកុះករ រួមទាំងព្រះរាជអាជ្ញាផងដែរ ។
ជុំវិញការត្រួតពិនិត្យបានឃើញថា មនុស្សស្លាប់នោះជាបុរសពោះម៉ាយជនជាតិបារាំងឈ្មោះឡូរ៉ង់ ព្រមទាំងកូន៤នាក់ (ស្រីពីរ)ស្លាប់រលួយក្នុងរថយន្តម៉ាក DATROL NISSAN ពណ៌ស ដែលជាកម្មសិទ្ធិរបស់ជនរងគ្រោះ ។ ទោះបីជាបែបណា ស្ថានទូតបារាំងក៏បានចេញសេចក្តីប្រកាសរបស់ខ្លួនភ្លាមៗ ជុំវិញការប្រទះឃើញសាកសពនេះ តែមិនទាន់វាយតម្លៃថា តើជាសពលោកឡូរ៉ង់ វ៉ាលីយេ ឬបែបណាទេតែបានប្រកាសពីការតាមដានរបស់ខ្លួនជាមួយសមត្ថកិច្ចកម្ពុជាក្នុងការស៊ើបអង្កេតជុំវិញបញ្ហានេះ ។
ទោះបីជាបែបណា បុរសពោះម៉ាយជនជាតិបារាំង និងពួកកូនៗដែលស្លាប់ទៅបានបន្សល់ទុកនូវស្នាមអនុស្សាវរីយ៍សម្រាប់អ្នកភូមិទួលធ្នង់ផងដែរ ស្តីពីជីវិតបុរសជនជាតិបារាំងមានប្រពន្ធខ្មែរ និងកូនៗទាំង៤នាក់ ។ អ្នកភូមិបានរំលឹកថា គ្រួសាររបស់លោក LauRent Valire និងកូន៤នាក់ត្រូវបានបញ្ជាក់ថា ពិតជាបានបាត់ខ្លួនតាំងពី៤ខែមុននេះ គឺនៅថ្ងៃបិណ្ឌរដូវភ្ជុំថ្ងៃទី១៤ កញ្ញា ឆ្នាំ២០១១ រហូតថ្ងៃទី១៤ មករា ឆ្នាំ២០១២ ទើបដឹងច្បាស់ជាក់ស្តែង ។ ជនជាតិបារាំងរូបនេះបានទិញផ្ទះពីមិត្តភក្តិជនជាតិបារាំងដូចគ្នាឈ្មោះមីសែល ដែលមានមុខរបរជាអ្នកដាំបន្លែលក់ ។ ផ្ទះចំនួន២នៅទល់មុខគ្នា ជនជាតិបារាំងឈ្មោះមីសែលក៏មានប្រពន្ធខ្មែរ និងកូន២នាក់ដែរ ។ មីសែលត្រូវស្លាប់ដោយគ្រោះថ្នាក់ចរាចរណ៍ ហើយស្ត្រីជាប្រពន្ធក៏បានលក់ផ្ទះឱ្យលោកឡូរ៉ង់ វ៉ាលីយេ ។
លោកឡូរ៉ង់ វ៉ាលីយេ ដែលមករស់នៅបន្តនៅភូមិទួលធ្នង់នេះ គឺមានកូន៣នាក់រួចទៅហើយជាមួយប្រពន្ធខ្មែរ ។ ការមករស់នៅក្នុងភូមិទួលធ្នង់ សង្កាត់រកាធំនេះ លោកវ៉ាលីយេ និងប្រពន្ធខ្មែរ ឈ្មោះលួត ស៊ីណាហៅច្រឹប មានកូន៣នាក់ដែលកាលពី២ឆ្នាំមុនបានរស់នៅឯខេត្តព្រៃវែង ។ លុះមករស់នៅខេត្តកំពង់ស្ពឺ ក៏បានសម្រាលកូនប្រុសមួយទៀត ទើបនាងជាប្រពន្ធស្លាប់នៅក្នុងមន្ទីរពេទ្យខេត្តកំពង់ស្ពឺ បន្សល់ទុកឱ្យលោកវ៉ាលីយេបន្តចិញ្ចឹមកូនទាំង៤នាក់ក្នុងនាមជាបុរសពោះម៉ាយ ។
អ្នកភូមិទួលធ្នង់ក៏ដូចជាបងប្អូនសាច់សាលោហិតបុរសបារាំងនេះនិយាយថា លោកវ៉ាលីយេស្រឡាញ់កូនស្មើជីវិត និងចេះថ្នមថ្នាក់ពួកគេដែលគ្មានម្តាយ។ បញ្ជូនកូនទៅរៀននៅសាលាបឋមសិក្សាអនុវត្តរៀនភាសាខ្មែ ហើយពួកកូនៗចេះនិយាយខ្មែរ និងបារាំងផងដែរ ។ តាមអ្នកភូមិធ្លាប់ចេញចូលពេលនាងជាប្រពន្ធខ្មែរនៅរស់បាននិយាយថា ក្រោយពីប្រពន្ធស្លាប់ទៅលោកវ៉ាលីយេក្លាយជាបុរសពោះម៉ាយ ចិញ្ចឹមកូនទាំង៤នាក់ក្នុងបន្ទុក ទោះបីប្អូនស្រីបង្កើតខាងប្រពន្ធធ្វើបាយទឹកជាប្រចាំក៏គាត់ដូចជានឿយណាយលែងចង់ឱ្យធ្វើម្ហូបដែរ ព្រោះក្រោយពីប្រពន្ធស្លាប់ លោកវ៉ាលីយេមានអារម្មណ៍ពុំល្អ តែងមួម៉ៅក្នុងចិត្តជានិច្ច។ ដេោយសារស្រឡាញ់ប្រពន្ធពេកលោកបានយកធាតុប្រពន្ធមករក្សាទុកក្បែរខ្លួនជានិច្ច ទោះបើកបររថយន្តទៅទីណាក៏យកធាតុប្រពន្ធដាក់ក្នុងរថយន្តទៅតាមដែរ ។ មានការកត់សម្គាល់ទៀតថា អាហារដែលពេញចិត្តសម្រាប់លោកវ៉ា លីយេ គឺបាយឆាសាច់ជ្រូក ឈូសការ៉ុតដាក់ពីលើ រួចយកខ្លាញ់ស្រោចពីលើបាយនោះជាការស្រេច គឺហូបតែម្តង ជាមួយទឹកសុទ្ធមួយដប ។ ជួនកាលរកទឹកក្តៅដែរ ឯកូនៗក៏ដូចគ្នា ។
អ្នកភូមិទួលធ្នង់និយាយទៀតថា លោកវ៉ា លីយេ ចេះនិយាយភាសាខ្មែរបានល្អ ចំណែកកូនៗក៏ចេះភាសាខ្មែរច្បាស់លាស់ផងដែរ និងចេះនិយាយភាសាបារាំងទៀត ។ បុរសជាតិបារាំងនេះស្រឡាញ់រាប់អានអ្នកភូមិ ឯអ្នកភូមិក៏ស្រឡាញ់រាប់អានលោកដែរ គឺមិនដែលមានបញ្ហាអ្វីជាមួយគ្នាទទេ ។
លោកជំទប់ទី១ សង្កាត់រកាធំ មានប្រសាសន៍ រំលឹកថា ការរាប់អានល្អូកល្អិនរវាងប្រជាពលរដ្ឋរស់នៅក្បែរផ្ទះមានសភាពធម្មតា តែអ្នកក្រៅពុំអនុញ្ញាតឱ្យចូលក្នុងបរិវេណផ្ទះទេ ព្រោះពុំធ្លាប់ស្គាល់ ។ ពិសេសលោកវ៉ា លីយេ ពុំសូវនៅផ្ទះប៉ុន្មានទេ តែពុំដែលភ្លេចនាំកូនទៅសាលា និងនាំពីសាលាមកផ្ទះវិញដែរ ។
អ្នកគ្រូបង្រៀនកូនជនជាតិបារាំងនេះ និយាយថា ការរាប់អានរវាងឪពុកពួកគេ និងគ្រូល្អូកល្អិន ដោយលោកវ៉ាលីយ៉េ តែងសុំឱ្យគ្រូជួយបណ្តុះបណ្តាលឱ្យពួកកូនៗបានចេះដឹង និងស្ទាត់ជំនាញផង ។ ពិសេសទៀតកូនកាត់បារាំងទាំងនេះមានភាពស្និទ្ធស្នាល និងកូនខ្មែរឥតរើសអើងគ្នាទេ ។ចំពោះចំណាត់ថ្នាក់ គឺធម្មតាមិនពូកែ ឬខ្សោយនោះទេ ប៉ុន្តែពួកគេគឺជាសិស្សល្អ ជាកូនល្អ ចេះស្រឡាញ់រាប់អានសិស្សដូចគ្នាជាធម្មតា។
ជុំវិញមរណភាពរបស់គ្រួសារបារាំងនេះ ការសន្និដ្ឋានរហូតមកទល់ថ្ងៃទី២០មករា នៅតែមានចំណុចខុសៗគ្នាទាំងអស់ ដែលចេញពីមាត់ប្រជាពលរដ្ឋ ។ សមត្ថកិច្ចចម្រុះរួមទាំងព្រះរាជអាជ្ញាផង ពុំទាន់កំណត់ថា ជាអំពើអ្វីឡើយ ដែលជាមូលហេតុនៃការស្លាប់ជនជាតិបារាំងមួយគ្រួសារនេះ ។ ប៉ុន្តែក្រោយពីការស្លាប់ជនជាតិបារាំងមួយគ្រួសារនេះ ឪពុកម្តាយក្មេកនៅឯខេត្តព្រៃវែង បានដាក់ពាក្យសុំកាន់កាប់ទ្រព្យសម្បត្តិដីធ្លីទាំងពីរផ្ទះនេះផងដែរ តែអាជ្ញាធរដែនដីអត់សម្រេចទេ ៕
ចែករំលែកព័តមាននេះ