រាជធានីភ្នំពេញ ៖ យុវជនម្នាក់អាយុក្រោម២០ឆ្នាំ បានលបចូលលួចរបស់របរនៅក្នុងផ្ទះពលរដ្ឋ ខណៈទ្វារចំហ ប៉ុន្តែបម្រុងនឹងចេញទៅវិញហើយ ស្រាប់តែម្ចាស់ផ្ទះឃើញទាន់ក៏ចាប់ជាប់ និងបានស្រែកថា ចោរៗ ធ្វើឱ្យមនុស្សម្នាជាច្រើនរត់មកចោមរោមមើល និងដាក់ម្នាក់មួយមួយជើង ប៉ុន្តែយុវជនរូបនោះលើកដៃសំពះអង្វរប្រាប់ថា រូបគេឆ្កួតជ្រូក ។ សកម្មភាពលបចូលលួចរបស់របរនេះកើតឡើងកាលពីវេលាម៉ោង៤និង២០នាទីទៀបភ្លឺ ថ្ងៃទី២៤ មិថុនា ២០១១ តាមវិថីព្រះស៊ីសុវត្ថិ ម្តុំបារបារាំង ក្នុងសង្កាត់ផ្សារកណ្តាលទី១ ខណ្ឌដូនពេញ ។
ប្រភពព័ត៌មានបានឱ្យដឹងថា ខណៈពេលម្ចាស់បើកទ្វារផ្ទះដើម្បីត្រៀមប្រកបរបររកស៊ី ស្រាប់តែមានយុវជនម្នាក់លបចូលលួចយករបស់របរក្នុងផ្ទះ សូម្បីតែ USB ក៏ប្រមូលយកបម្រុងរត់គេចដែរ ត្រូវម្ចាស់ផ្ទះឃើញទាន់ក៏ចាប់ក្របួចរួចស្រែកថា ចោរៗ ស្របពេលនោះអ្នកធ្វើដំណើរតាមផ្លូវទៅហាត់ប្រាណក៏ឈប់មើល ហើយខ្លះវាយមួយដៃ មួយជើង ត្រូវបុរសនោះស្រែកប្រាប់ថា រូបគេឆ្កួតជ្រូកទេ ប៉ុន្តែម្ចាស់ផ្ទះ និងអ្នកចោមរោមមើលមិនជឿទេ ព្រោះធម្មតា ចោរឱ្យតែគេចាប់បានគឺតែងតែនិយាយដោះសា ។
ស្របពេលនោះ មានអ្នកដំណើរម្នាក់ចូលទៅមើលស្គាល់ថា យុវជននោះឡប់សតិមែន ទើបចាប់យកទៅដាក់ក្រោមដើមឈើនៅចិញ្ចើមផ្លូវលេខ១១០ កែងវិថីព្រះស៊ីសុវត្ថិ ខាងកើតផ្សារចាស់ ពេលទៅដល់យុវជននោះបានដើរសំពះអង្វរអ្នកចោមរោមមើលគ្រប់ៗគ្នាឱ្យជួយផង ប៉ុន្តែគេមិនរវល់ ៕
ចែករំលែកព័តមាននេះ